Sambu mpasi ya nene ke finama, beto fwete samuna kukonda kusukinina. (Bin 24:11, 12, 20) Sambu na kusadisa bantu, beto lenda sadila bakarti ya viziti sambu na kubenda dikebi na bo na Ndinga ya Nzambi mpi na site Internet na beto. Karti yango kele ti kode yina ke nata na video Sambu na Nki Beto Fwete Longuka Biblia? mpi emvitasio sambu na kusosa kuzaba mambu mingi to kulomba kulonguka Biblia. Bantu ya nkaka ke ndimaka ve kubaka mikanda na beto kansi bo ke ndimaka kukota na site Internet na beto. Kuvanda ve na keti-keti sambu na kupesa bo karti ya viziti. Kansi, kupesa ve bakarti ya viziti na bantu yina me sepela ve.

Ntangu nge ke sala bisalu na nge ya konso kilumbu, sambu na kutedimisa mpusa ya muntu, nge lenda tuba: “Mu ke ti kima mosi ya mu ke zola kupesa nge. Karti yai ta nata nge na site Internet mosi yina kele ti bansangu mpi bavideo ya ofele ya ke tubila mambu mingi.” (Yoa 4:7) Sambu bakarti ya viziti kele nene ve, nge lenda vanda ti ndambu ya bakarti sambu na kupesa bantu konso ntangu yina okazio me monana..