Lutiti ya luyantiku ya jw.org ke vandaka ti masolo mpi bavideo yina bo ke basisaka sambu yo sepedisa bantu ya ntima-masonga yina kele ve Bambangi ya Yehowa. (Bis 13:48) Mbala mingi, yo ke tubilaka mambu yina bansangu ke tubila to yina bantu ke yindulaka to ke tubaka.

Inki mutindu nge lenda sadila lutiti ya luyantiku ya jw.org na kisalu ya kulonga nsangu ya mbote?

• Talaka yo mbala na mbala. Tala disolo ya mpa yina me basika mpi tala mutindu nge lenda sadila yo sambu na kusadisa muntu yina me sepela ti nsangu. (Sambu na kumona masolo ya nkaka yina me basika na lutiti ya luyantiku, bweta na “Voir plus.”) Kana nge ke tala lutiti yina ya luyantiku mbala na mbala, yo ta sadisa nge na kuvanda ti bangindu ya mpa ya kusadila na kisalu ya kulonga nsangu ya mbote.

• Sadila masolo mpi bavideo yina kele na lutiti ya luyantiku sambu na kuyantika kusolula ti muntu. Yo lenda sadisa beto na kuvanda ti bangindu ya mambu yina bantu ya teritware na beto lenda yindula.

• Songa bantu lutiti ya luyantiku ya jw.org. Tubila masolo yina nge ke zola kutubila mpi songa muntu mutindu ya kusadila lutiti yango.

• Tindila bantu lien. Bantu ya nkaka ke zolaka ve kusolula ti beto kansi bo ke ndimaka kukota na site ya Internet na beto. Tindila bantu yina me sepela ti nsangu lien yina ta nata bo na lutiti ya luyantiku to na disolo mosi to na video mosi yina kele na kati.