Kana mwana muntu me kangula kielo, beto fwete lomba yandi na kusolula ti bibuti na yandi. Kusala mutindu yai ke monisaka luzitu sambu na kimfumu na bo. (Bin 6:20) Kana mwana kusonga beto na kukota, beto fwete buya. Kana bibuti na yandi kele ve, beto fwete vutuka na ntangu ya nkaka.

Kana mwana yango kele mbuta, ziku yandi kele ti bamvula na kati ya 15 ti 19, yo ta vanda kaka mbote na kuyula kana bibuti na yandi kele. Kana bo kele ve, beto lenda yula yandi kana bibuti na yandi ke pesaka yandi nzila ya kupona mambu yina yandi lenda tanga. Kana mpidina, beto lenda pesa yandi mukanda mpi mbala ya nkaka kusonga yandi na kukota na jw.org.

Ntangu beto ke sala mvutukilu ya mpa na leke yina monisaka mpusa, beto fwete lomba yandi na kukutana ti bibuti na yandi. Kukutana ti bo ta sadisa beto na kutendula sambu na nki beto me kwisa kutala mwana na bo mpi kusonga bo bandongisila ya me fwana na kutudila ntima yina Biblia ke pesaka sambu na mabuta. (Nk 119:86, 138) Kana beto ke monisa luzitu na bibuti, yo ta vanda kimbangi ya mbote mpi yo lenda pesa beto mabaku ya nkaka ya kuzabisa nsangu ya mbote na dibuta yina.—1Pi 2:12.