Beto kele na kiese mingi mutindu beto me zwa kamukanda mpi mukanda mosi ya mpa sambu na kulonguka Biblia ti bantu. Beto ke samba Yehowa sambu yandi sakumuna bikesa ya beto ta sala sambu na kukumisa bantu mingi balongoki. (Mat 28:18-20; 1Bk 3:6-9) Inki mutindu beto lenda sadila mikanda yai ya mpa?

Mukanda Zinga Mvula na Mvula!, ke monisa mutindu ya mpa ya kulonga. Ntangu nge ke kudibongisa sambu na kulonguka Biblia ti muntu mpi ntangu nge ke longuka ti yandi, sala mambu yai ke landa. *

• Tanga disolo ya beno ta longuka mpi pesa mvutu na bangiufula ya bo me yula

• Tanga baverse yina bo me sonika nde “tanga” mpi sadisa longoki na kubakisa mutindu yandi fwete sadila mambu ya beno me tanga

• Songa bavideo mpi beno tubila yo. Sadila bangiufula yina bo me yula kana yo kele

• Beno sala ngolo sambu na kumanisa dilongi mosi konso mbala ya beno ke longuka

Ntangu nge kele na kisalu ya kusamuna, pesa ntete kamukanda na muntu sambu na kuzaba kana yandi ke monisa mpusa. (Tala lupangu “ Inki Mutindu Nge Lenda Pesa Muntu Kamukanda Zinga Mvula na Mvula! na Mbala ya Ntete ya Nge Me Kutana ti Yandi.”) Kana beno me manisa kulonguka kamukanda mpi longoki ke zola nde beno landa kulonguka ti yandi, pesa yandi mukanda mpi beno yantika kulonguka dilongi 04. Kana nge ke longukaka dezia ti muntu mukanda Inki Biblia Ke Longa Beto? to mukanda Bikala na Zola ya Nzambi, nata yandi na mukanda Zinga Mvula na Mvula! mpi songa yandi kisika yina beno ta yantika.

SONGA VIDEO KUKWISA YA MBOTE NA KULONGUKA NA NGE YA BIBLIA, MPI NA NIMA BENO PESA BAMVUTU NA BANGIUFULA YAI:

• Inki longoki ya Biblia ta longuka na mukanda yai ya mpa?

• Sambu na nki nge fwete songa video yai na longoki ya mpa ya Biblia?

• Inki balukanu nge fwete siamisa longoki malembe-malembe na kubaka mpi na kulungisa? Tala tablo “ Mambu ya Mfunu mpi Mambu Longoki Lenda Sala”