Beto ke zolaka kulosa masa na bankeni ya kieleka yina beto ke kuna. (1Bk 3:6) Kana beto me zwa muntu mosi yina me monisa mpusa, yo ta vanda mbote na kubikisa ngiufula yina beto lenda tadila kana beto me vutukila yandi. Ngiufula yina ta benda dikebi ya muwi mpi yo ta sadisa beto na kuyilama kukonda mpasi sambu na kusala mvutukilu ya mpa. Ntangu beto ta vutuka, beto lenda songa yandi nde beto me kwisa kupesa mvutu na ngiufula yina beto yulaka mbala ya nsuka ya beto kutanaka ti yandi.

• Ntangu nge ke yidika bangogo ya kukotila na masolo sambu na kisalu ya nzo na nzo, yidika mpi ngiufula yina nge ta pesa mvutu na mbala ya nima. Mvutu yango lenda vanda na mikanda yina nge ke kabula. To bo me pesaka dezia mvutu na yo na mikanda ya beto ke longukaka Biblia ti bantu. Nge lenda sadila yo ntangu nge ke vutukila yandi.

• Ntangu nge ke sukisa disolo ti muntu yina monisaka mpusa, zabisa yandi mpusa na nge ya kusolula ti yandi diaka mpi na nima yula ngiufula yina nge yidikaka sambu na kupesa mvutu na mbala ya nima. Kana mpila kele, sonika zina, adresi, to nimero ya telefone na yandi.

• Kana nge zabisa muwi nde nge ta vutukila yandi na ntangu mosi buna, zitisa yo.—Mat 5:37.