Kutunga tempelo ya Izraele lombaka kisalu ya ngolo mpi mbongo mingi. Ata mpidina, bantu ya Izraele salaka kisalu yango ti kikesa. (1Bs 29:2-9; 2Bs 6:7, 8) Ntangu tempelo manaka, bisalu ya kuyidika yina bantu ya Izraele vandaka kusala, vandaka kumonisa kana bo vandaka ti bangwisana ya mbote ti Nzambi to ve. (2Bn 22:3-6; 2Bs 28:24; 29:3) Bubu yai, Bakristu ke pesaka ntangu mpi ngolo na bo sambu na kutunga, kutula bunkete, mpi kutanina Banzo ya Kimfumu ti Banzo ya Balukutakanu ya Nene. Yo yina, kusala kumosi ti Yehowa mutindu yai kele dibaku mosi ya nene mpi yo kele na kati ya kisalu na beto ya santu.—Nk 127:1; Kus 7:15.

• Ke tula bunkete na nima ya konso lukutakanu. Kana mpila kele, beto lenda lokuta mvindu yina kele na kisika ya beto me vanda.

• Ke tula bunkete mpi ke tanina Nzo ya Kimfumu mbala na mbala. Kana bantu mingi ke pesa maboko na kisalu, yo ke pesaka kiese mpi ke kumisaka kisalu pete.—lv 92-93 § 18.

• Ke pesa mbongo sambu kisalu kusalama. Ata makabu ya ‘mbongo zole ya bibende, ya ntalu fioti kibeni’ yina beto me pesa na ntima ya mvimba ke pesaka Yehowa kiese.—Mar 12:41-44.

• Ke pesa maboko na luzolo yonso sambu na kutunga mpi kuyidika bisika ya beto ke salaka lusambu ya kieleka kana mpila kele. Yo ke lombaka ve nde beto zaba kutunga mbote sambu na kupesa maboko na bisalu yai.