Biblia tubaka na ntwala nde Satana ta monisa beto mpasi sambu na kukanga nzila na kisalu na beto ya kusamuna. (Yoa 15:20; Kus 12:17) Inki mutindu beto lenda sadisa bampangi na beto Bakristu yina bo ke monisa mpasi na bansi ya nkaka? Beto lenda samba sambu na bo. “Kubondila ya muntu ya lunungu ke vandaka ngolo mingi.”—Yak 5:16.

Beto lenda samba sambu na nki mambu? Beto lenda lomba Yehowa na kupesa bampangi na beto ya babakala mpi ya bankento ngolo mpi na kusadisa bo na kuwa ve boma. (Yez 41:10-13) Beto lenda samba mpi sambu bamfumu kuvanda ti mabanza ya mbote sambu na kisalu ya kusamuna “sambu beto vanda ti luzingu ya ngemba mpi ya pima.”—1Tm 2:1, 2.

Ntangu bo vandaka kumonisa Polo ti Piere mpasi, Bakristu ya mvu-nkama ya ntete sambaka sambu na bo mpi vandaka kutanga bazina na bo. (Bis 12:5; Bar 15:30, 31) Ata beto me zaba ve bazina ya bampangi yonso yina bo ke monisa mpasi bubu, keti beto lenda tanga zina ya mabundu na bo, insi na bo, to bwala na bo?