Yindula nde nge ke zinga na Galilea na bilumbu ya Yezu. Nge me kwenda na Yeruzalemi sambu na kusala Nkinsi ya Bisasa. Mbanza me fuluka ti Bakristu ya nkaka yina katukaka na babwala ya ntama kibeni mpi kwisaka kutala Yeruzalemi. Nge me sala nzietelo mosi sambu na kunata nkombo na tempelo sambu na kupesa dikabu na Yehowa. Ntangu nge me kuma, nge me mona tempelo me fuluka ti bantu ya nkaka yina ke zola mpi kupesa bimenga na bo. Nsuka-nsuka yo me kuma ntangu na nge ya kupesa nkombo na banganga-Nzambi. Na ntangu yina, nge me yibuka nde mpangi na nge kele ti makambu ti nge. Yandi lenda vanda na kati ya kimvuka yina ya bantu to na konso kisika yina na mbanza. Yezu ke tendula mambu yina nge fwete sala. (Tanga Matayo 5:24.) Inki mutindu nge lenda sala mambu yina Yezu tubaka mpi kutula ngemba ti mpangi na nge? Na bangindu yina kele awa na nsi, tula kidimbu na mvutu ya mbote.

NGE FWETE . . .

• solula ti mpangi na nge kaka kana nge ke mona nde yo kele ti bikuma ya mbote yina lenda sala nde yandi vanda ve na kiese

• sosa kusungika mabanza ya mpangi na nge kana nge ke mona nde yo ke yangisa yandi mingi

• widikila mpangi na nge na dikebi yonso ntangu yandi ke tuba mpi ata nge ke bakisa yandi mbote kibeni ve, lomba ndolula na masonga yonso sambu na diambu ya nge salaka yina pesaka yandi mpasi

MPANGI NA NGE FWETE . . .

• sosa lusadisu na bampangi ya nkaka na dibundu mpi kusonga bo diambu ya mbi yina nge salaka yandi

• tubila nge na makasi, kusonga nge mambu yonso ya mbi yina nge salaka yandi mpi kulomba nge na kundima mbi na nge

• mona kudikulumusa mpi bikesa yina nge me sala sambu na kukwenda kusolula ti yandi, mpi kulolula nge na ntima ya mvimba

Ata beto ke pesaka diaka ve bimenga ya bambisi na lusambu na beto, inki Yezu longaka na yina me tala kuvanda na ngemba ti bampangi mpi lusambu yina Nzambi ke ndimaka?