Beto ke zinga na nsi-ntoto yina ke monaka nde mambu ya mbote kele mbi mpi nde mambu ya mbi kele mbote. (Yez 5:20) Diambu ya mawa kele nde bantu ya nkaka ke salaka mambu yina Yehowa ke buyaka. Mu mbandu, kuvukisa nitu bakala ti bakala to nkento ti nkento. Banduku ya nzo-nkanda to bantu ya nkaka lenda sosa kupusa bana na beto ya batoko na kusala mambu bonso bo. Inki mutindu nge lenda sadisa bana na nge na kununga mambu yai?

Beno longa bana na beno bansiku ya Yehowa. (Lev 18:3) Malembe-malembe, beno longa bo mambu yina Biblia ke tubaka na yina me tala kuvukisa nitu. Nge fwete songa bo mambu na kutadila bamvula na bo mpi yina bo lenda bakisa. (Kul 6:7) Kudiyula nde: ‘Keti mono me longaka bana na mono mambu yina me fwana nde bo sala sambu na kumonisa zola, mfunu ya kulwata na mutindu ya mbote mpi nde bantu ya nkaka fwete zitisa nitu na bo? Keti bana na mono ta zaba mambu yina bo fwete sala kana muntu mosi ke sosa kusonga bo bifwanisu yina ke monisa bantu kinkonga to ke songa bo na kusala mambu yina Yehowa ke zolaka ve?’ Kana bo me zaba mambu yai na ntwala, yo lenda sadisa bo na kutina mambu yina lenda natila bo bampasi. (Bin 27:12; Lon 7:12) Kana nge ke longa bana na nge, nge ta monisa nde nge ke zolaka dikabu yai ya kuluta mfunu yina Yehowa me pesaka nge.—Nk 127:3.

SONGA VIDEO TUNGA NZO YINA TA WUMELA—TANINA BANA NA NGE NA “MAMBU YA MBI,” MPI NA NIMA BENO PESA BAMVUTU NA BANGIUFULA YAI:

• Sambu na nki bantu ya nkaka ke kukaka ve kulonga bana na bo mambu ya me tala kuvukisa nitu?

• Sambu na nki bibuti fwete longa bana na bo na kuwakana ti ‘malongi mpi balukebisu ya Yehowa’?—Efe 6:4

• Inki organizasio ya Yehowa me basisaka sambu na kusadisa bibuti na kulonga bana na bo mambu ya me tala kuvukisa nitu?—w19.05 12, lupangu

• Sambu na nki nge fwete solulaka mbala na mbala ti bana na nge na ntwala nde bo kutana ti mambu ya mpasi?