Biblia ke songa beto nde beto fwete baka Bakristu yina kele bambuta bonso nde bo kele bamama mpi batata na beto mpi bayina kele baleke bonso nde bo kele bampangi na beto. (Tanga 1 Timoteo 5:1, 2.) Mingi-mingi bampangi-babakala, bo fwete sadila bampangi-bankento mambu ti luzitu.

Mpangi-bakala fwete monisa ve mawi ya zola na mpangi-nkento kana yandi ta kwela yandi ve to yandi fwete sala ve ata kima mosi yina ta sala nde mpangi-nkento kudiwa ve mbote na ntwala na yandi. (Yob 31:1) Mpangi-bakala yina me kwelaka ve fwete sakana ve ti mawi ya mpangi-nkento yina me kwelaka ve, yandi fwete monisa ve nde yandi ke zola nde mpangi-nkento kukuma kuzola yandi.

Kana na luzitu yonso mpangi-nkento mosi ke yula ngiufula mosi buna to nkutu ke songa bankuluntu diambu mosi ya ke lomba nde bo tudila yo dikebi, bankuluntu fwete widikila yandi na dikebi yonso. Bankuluntu fwete monisa luzitu mingi-mingi na bampangi-bankento yina kele ve ti babakala sambu na kutanina bo.—Rut 2:8, 9.

TALA VIDEO MONISA ZOLA YA KIELEKA NA KATI YA DIBUNDU—NA MIFWIDI MPI NA BANA YINA KELE VE TI BIBUTI , MPI NA NIMA BENO PESA BAMVUTU NA BANGIUFULA YAI:

• Inki mutindu dibundu monisaka nde bo ke zolaka kibeni mpangi-nkento Myint?

• Inki mutindu zola yina dibundu monisilaka yandi taka kimbangi ya mbote na bwala?

• Inki mutindu zola yina dibundu monisaka vandaka ti bupusi na bana ya mpangi Myint?

Inki mutindu nge lenda monisa nde nge ke zolaka bampangi-bankento ya dibundu na beno?