Bibuti yina kele Bakristu ke zolaka nde bana na bo kukuma bansadi ya kwikama ya Yehowa. Bibuti fwete longa bana na bo malongi ya Biblia ntangu bo kele ntete bana ya fioti. (Kul 6:7; Bin 22:6) Kusala yo ke lombaka bibansa. Kansi bibansa yina ke nataka balusakumunu.—3Yn 4.

Bibuti lenda landa mbandu ya Yozefi mpi Maria. Bo “vandaka ti kikalulu ya kukwenda konso mvula na Yeruzalemi sambu na nkinsi ya Paki,” ata yo lombaka bikesa mpi mbongo mingi. (Luk 2:41) Bo vandaka kutula bampusa ya kimpeve ya dibuta na bo na kisika ya ntete. Bubu yai mpi, bibuti lenda twadisa bana na bo na nzila ya mbote ntangu bo ke sadila mabaku yonso sambu na kulonga bo mpi bo fwete vanda mbandu ya mbote sambu na bana na bo.—Nk 127:3-5.

TALA VIDEO BO SADILAKA MABAKU YONSO, MPI NA NIMA, PESA MVUTU NA BANGIUFULA YAI:

• Sambu na nki mpangi Jon ti Sharon Schiller tulaka mambu ya Kimfumu na kisika ya ntete ntangu bo vandaka kusansa bana na bo?

• Sambu na nki bibuti fwete longa mpi kusungika konso mwana na mutindu na yandi?

• Inki mutindu bibuti lenda sadisa bana na bo na kununga mambu yina lenda meka lukwikilu na bo?

• Inki bisadilu ya organizasio ya Yehowa nge me sadilaka sambu na kusadisa bana na nge na kuyela na kimpeve?