Mutindu beto ke na kumona yo na bitumba ya ke salama na Ukraine, bamfumu ya mabundu ke na kupusa mpenza bantu na kunwana bitumba. Tala mambu yina bamfumu ya nkaka ya mabundu ke tuba sambu na kukotila bansi na bo na bitumba ya ke salama na Ukraine:

•   Mfumu mosi ya nene ya dibundu ya orthodoxe na Ukraine (Métropolite Épiphane ya Kiev), tubaka mambu yai na zulunalu mosi (The Jerusalem Post) na Kitatu 16 mars 2022: “Beto ke kumisa mpi ke pesa mersi na basoda na beto yonso ya ke nwanisa bambeni sambu na insi na bo Ukraine . . . Konso ntangu beto ke samba na ntima na beto ya mvimba sambu na beno mpi beto ke sala yonso yina beto lenda sala sambu na kusadisa beno.”

•   Kimvuka mosi (Agence Reuters) tubaka mambu yai na Lumingu 3 avril 2022: “Na Lumingu, mfumu ya dibundu ya orthodoxe na Russie sadisaka lukutakanu mosi ya nene na zina ya dibundu sambu na basoda ya Russie. Yandi songaka bo nde mutindu Russie ke landa kunwanisa Ukraine, basoda ya Russie fwete zaba nde ‘bo mpamba’ bantu fwete nwana sambu na insi na bo.”

 Keti Bakristu fwete nwana bitumba? Inki Biblia ke tuba?

 Biblia ke tubaka nde balongoki ya Yezu fwete kudikotisa ve na bitumba.

•   “Vutula mbele na nge ya bitumba na kisika na yo, sambu bantu yonso yina ke bakaka mbele ya bitumba ta fwa na mbele ya bitumba.”—Matayo 26:52.

   Keti muntu yina ke ndima nde bantu kunwana bitumba to yina ke nwana bitumba ke lemfuka mpenza na mambu yai ya Yezu tubaka?

•   “Mono ke pesa beno nsiku mosi ya mpa, nde beno zolana beno na beno; mutindu mono zolaka beno, beno mpi beno zolana beno na beno. Na diambu yai, bantu yonso ta zaba nde beno kele balongoki na mono—kana beno ke zolana beno na beno.”—Yoane 13:34, 35.

   Keti muntu yina ke kudikotisa na bitumba ke monisa mpenza zola yina Yezu lombaka balongoki na yandi na kumonisa?

 Sambu na kuzaba mambu mingi, tanga disolo “ Peut-on concilier guerre et christianisme ? ”

 Keti yo me fwana na kutuba nde Bakristu fwete nwana ve bitumba bubu yai? Ee. Biblia tubaka na ntwala nde na bilumbu na beto, disongidila “na bilumbu ya nsuka,” bansadi ya Nzambi ya makanda yonso ta “longuka . . . diaka ve bitumba” na kuwakana ti mambu yina Yezu tubaka.—Yezaya 2:2, 4, noti na nsi ya lutiti.

•   Sambu na kuzaba mambu mingi, tanga masolo ya kulandana na Nzozulu ya Nkengi ya kele ti ntu-diambu “Inki Mutindu Nzambi Ke Tadilaka Bitumba?”

 Ntama mingi ve Yehowa a “Nzambi ya ngemba,” ta sadila Kimfumu na yandi ya zulu sambu na kugulusa bantu “na bampasi mpi na mubulu.”—Bafilipi 4:9; Nkunga 72:14.

•   Sambu na kuzaba mutindu yandi ta sala yo, tala video Kimfumu ya Nzambi Kele Nki?