Keti nge kele na kati ya bamilio ya bantu yina mipepe mpi bamvula ya ngolo me niokulaka? Mipepe mpi bamvula ya ngolo ke nataka bampasi ya mitindu mingi. Mbala mingi, mipepe ya ngolo, bamvula ya matadi mpi bamvula ya ngolo ke salaka nde masa kufuluka to yo ke bebisaka mupepe. Mvula ya ngolo lenda bwisa bantoto, mpi bamvula ya mipepe ya ngolo lenda basisa banzasi yina lenda tula tiya ya ngolo kibeni na bamfinda. Musibu, bitembo ya tiya, mpi bamvula ya mipepe ya ngolo ya nsungi ya madidi lenda vanda mpi ngolo kiteso mosi.

 Na bisika mingi na nsi-ntoto, mipepe mpi bamvula ya ngolo me kumaka kusalama mingi mpi yo ke kuma diaka ngolo kuluta. Kimvuka mosi (Fédération internationale des sociétés de la Croix-Rouge et du Croissant-Rouge) ke tuba nde: “Ntalu ya bantu yina ke niokwama sambu na bisumbula ya lugangu ke landa kukuma mingi, sambu konso mvula, bamvula ya ngolo, mipepe ya ngolo, mpi kuyuma ya banseke ti bamfinda yina ke salama mingi kuluta, ke bebisa luzingu ya bantu mpi bima ya kuzingila, mpi yo ke sala nde bamilio ya bantu kuyambula bisika ya bo ke zingaka.”

 Kana mambu ya mutindu yai me salama, bantu ke niokwamaka na nitu mpi na mabanza. Bo ke niokwamaka na mabanza sambu bo me vidisa bima na bo, banzo na bo, mpi nkutu sambu muntu ya bo vandaka kuzola me fwa.

 Kana nge me niokwamaka sambu na bampasi yina mipepe mpi bamvula ya ngolo ke nataka, Biblia lenda sadisa nge na kukanga ntima. Yo ke pesaka kikesa, kivuvu, mpi bandongisila ya mbote yina me sadisaka bantu mingi ya me kutanaka ti bisumbula ya ke katukaka na mipepe mpi bamvula ya ngolo. (Baroma 15:4) Yo ke pesaka mpi mvutu na ngiufula yai ya mfunu ya ke yangisaka bantu mingi: Sambu na nki Nzambi ke pesaka nzila nde mambu yai kusalama, keti yandi ke pesa mono ndola?

 Biblia ke longaka nde Nzambi kele ve na kisina ya bampasi yina bantu ke kutanaka ti yo. Yo ke ndimisa beto nde “Nzambi lenda mekama ve na mambu ya mbi, mpi yandi mosi ke mekaka ve ata muntu mosi.” (Yakobo 1:13) Yo ke tendula nde yandi kele ve na kisina ya mipepe mpi bamvula ya ngolo yina beto ke mona bubu.

 Biblia kele ti masolo ya ke tubila ntangu Nzambi sadilaka bangolo ya lugangu sambu na kupesa bantu ya mbi ndola. Kansi, mambu yango kele ve kiteso mosi ti mipepe mpi bamvula ya mbi ya bubu, sambu yo ke basikaka kukonda kukebisa na ntwala mpi yo ke bwilaka bantu ya mbote ti ya mbi. Kansi, masolo ya Biblia ke monisa nde ntangu yonso, Nzambi taninaka bantu ya me sala mbi ve, yandi kebisaka bantu na ntwala, mpi yandi tendulaka sambu na nki yandi salaka mambu yango. Mu mbandu, Nzambi tendulaka sambu na nki yandi nokisaka Mvula ya Ngolo na bilumbu ya Noa, yandi kebisaka bantu na ntwala ya kunokisa yo, mpi yandi taninaka Noa ti dibuta na yandi.—Kuyantika 6:13; 2 Piere 2:5.

 Sambu na kuzaba mambu mingi ya ke monisa mutindu beto me zaba nde bisambula ya lugangu ya bubu yai kele ve bandola ya Nzambi, tala disolo “Inki Biblia Ke Tubaka Sambu na Bisumbula ya Lugangu?”

 Biblia ke monisaka nde Yehowa a Nzambi ke kudiyangisaka sambu na bantu mpi ke kuditulaka na kisika na bo. Beto tadila baverse ya ke landa ya ke pesa kikesa.

•   Yezaya 63:9: “Na ntangu yonso yina bo vandaka kumona mpasi, yo vandaka kupesa [Nzambi] mpasi.”

   Ntendula na yo: Yehowa ke kudiyangisaka mingi sambu na bampasi ya bantu yina ke niokwama.

•   1 Piere 5:7: “Yandi ke kudibanzaka sambu na beno.”

   Ntendula na yo: Yehowa ke kudiyangisaka sambu na mambote na nge.

 Sambu Yehowa ke kudiyangisaka mpi ke kuditulaka na kisika ya bantu, yo ke pusaka yandi na kusadisa bo. Yandi ke pesa beto kikesa na nzila ya bandongisila ya mbote ya kele na Biblia mpi ya kivuvu ya kieleka yina yo ke pesa nde na bilumbu ke kwisa beto ta kutanaka ve ti bisumbula yina ke katukaka na mipepe mpi bamvula ya ngolo.—2 Bakorinto 1:3, 4.

 Biblia ke tubila lusilu ya Yehowa ya “kupesa beno makwisa mpi kivuvu.” (Yeremia 29:11) Nzambi ke zolaka nde bantu kusepela ti luzingu na ntoto yina ta kuma paladisu, kansi yandi ke zolaka ve nde bo wa boma nde mipepe ya ngolo ta natila bo bampasi.—Kuyantika 1:28; 2:15; Yezaya 32:18.

 Nzambi ta lungisa mambu yina na nzila ya Kimfumu na yandi; yo kele luyalu ya kele na zulu yina Yezu kele Mfumu na yo. (Matayo 6:10) Yezu kele ti mayele mpi ngolo ya me fwana sambu na kukanga mipepe mpi bamvula ya ngolo nzila sambu yo salama ve. Ntangu yandi vandaka na ntoto, yandi songaka ngolo na yandi ya kuyala mupepe. (Marko 4:37-41) Yandi ta yala ti mayele ya kubakisa mambu mpi ngangu, yandi ta longa bantu mutindu ya kutanina kisika bo ke zinga mpi kuzitisa bima ya Nzambi me salaka. (Yezaya 11:2) Na nsi ya lutwadisu ya Yezu, mipepe mpi bamvula ya ngolo ta pesaka diaka ve bantu mpasi.

 Nge lenda kudiyula nde, ‘Inki ntangu Yezu ta sadila ngolo na yandi sambu na kuyala mupepe?’ Sambu na kubaka mvutu ya ngiufula yai, tala disolo “Inki Ntangu Kimfumu ya Nzambi Ta Yala Ntoto?”

 Bandongisila ya Biblia lenda sadisa nge na ntwala nde mipepe to bamvula ya ngolo kuyantika, ntangu yo ke bula to ke noka, mpi na nima na yo.

•   Na ntwala nde yo salama: Kudibongisa na kusala mambu nswalu.

   Mambu yina Biblia ke tuba: “Muntu ya mayele ke monaka kigonsa mpi ke bumbanaka, kansi bantu yina me konda mayele ke kwendaka kaka na ntwala mpi bo ke kutanaka ti bampasi.”—Bingana 22:3.

   Ntendula na yo: Sosa kuzaba bigonsa yina lenda vanda sambu nge sala mambu nswalu mpi nge tanina dibuta na nge.

   Mambu yina bantu me kutanaka ti yo: “Kilumbu yina beto tinaka tiya ya mfinda, beto vandaka ya kudibongisa. Beto vandaka ti basaki ya kutinina. Beto vandaka ti bankinsi na beto. Beto vandaka ti bilele. Bantu yina vandaka pene-pene na beto kumaka kisaka-saka, bo vandaka kukuka ve kuyindula mbote. Kansi, beto vandaka ti bima yonso ya beto vandaka na mfunu na yo, mpi mono ke pesa mersi mingi sambu na yo!”—Tamara, Californie, États-Unis.

•   Ntangu yo ke salama: Tula dikebi na mambu ya mfunu mingi.

   Mambu yina Biblia ke tuba: “Ata ntangu muntu kele ti bima mingi, luzingu na yandi ke katukaka ve na bima yina yandi kele ti yo.”—Luka 12:15.

   Ntendula na yo: Luzingu kele mfunu mingi kuluta bima ya kinsuni.

   Mambu yina bantu me kutanaka ti yo: “Ntangu mupepe ya ngolo Lawin b bebisaka nzo na beto, mono vandaka kuzaba ve mambu yina mono fwete sala. Kansi, mono sambaka Yehowa Nzambi na masonga yonso. Mono bakisaka nde beto vidisaka bima na beto kansi beto fwaka ve.”—Leslie, Philippines.

•   Na nima: Yindula mambu ya bubu kansi ve mambu ya mbasi.

   Mambu yina Biblia ke tuba: “Beno kudiyangisa ve ata fioti sambu na kilumbu yina ke landa, sambu kilumbu yina ke landa ta vanda ti basusi na yo.”—Matayo 6:34.

   Ntendula na yo: Kudiyangisa ve kuluta ndilu sambu na mambu yina ta salama na bilumbu ke kwisa.

   Mambu yina bantu me kutanaka ti yo: “Ntangu mupepe ya ngolo Irma fulusaka nzo na mono ti masa, yo vandaka kulomba kubaka badesizio mingi kibeni mpi mono vandaka kudiyangisa mingi mpenza. Mono landaka ndongisila ya Biblia ya kuyindula mambu ya kilumbu mosi mpamba. Mono bakisaka nde, kana Yehowa kusadisa mono, mono lenda nwana ti mambu mingi ya mpasi.”—Sally, Floride, États-Unis.

 Sambu na kubaka bandongisila mingi, tala disolo “Kana Kisumbula Me Salama—Mambu Yina Lenda Gulusa Bantu.”