Zulunalu mosi (New York Times) tubaka na Kintete 17 juin 2024 mambu yai ya Doktere Vivek Murthy ya ke salaka bantu operasio na États-Unis tubaka nde: “Maladi ya ntu yina baleke mingi ke bela, bo fwete sansa yo nswalu mpi basite Internet ya kusolula ti bantu kele na kati ya bima yina ke sala nde bo bela maladi yai.”

 Inki mutindu bibuti lenda tanina bana na bo na bigonsa yina basite Internet ya kusolula ti bantu kele ti yo? Biblia ke pesa bandongisila ya mfunu.

 Beto tadila minsiku yai tatu.

 “Muntu ya mayele ke tadilaka konso kitambi na yandi.”—Bingana 14:15.

 Basite Internet ya kusolula ti bantu lenda bebisa mwana na nge. Yo yina, kuyindula ve nde nge fwete pesa mwana na nge nswa ya kusadila yo. Na ntwala ya kupesa mwana na nge nswa ya kusadila yo, zikisa mbote-mbote kana yandi me kuma kibeni mbuta sambu kana yandi me kuma mbuta, yo ta sadisa yandi na kuzitisa ntangu yina beno me tulaka sambu yandi sadila yo, kulanda kuvanda ti banduku ya mbote mpi kutanga ve mambu ya mbi.

•   Sambu na kuzaba mambu mingi, tanga disolo “Keti Mwana na Mono Fwete Sadila Basite Internet ya Kusolula ti Bantu?” mpi disolo “Longa Mwana Mutindu ya Kusadila Mbote Basite Internet ya Kusolula ti Bantu.”

 ‘Sadila ntangu na nge mbote kibeni, sambu bilumbu kele mbi.’—Baefezo 5:16.

 Kana nge me pesa mwana na nge nswa ya kusadila basite Internet ya kusolula ti bantu, tudila yandi bansiku na yina me tala mutindu yandi fwete sadila yo mpi tendudila yandi mutindu bansiku yina ta sadisa yandi na kuditula ve na kigonsa. Kukanga ve meso kana mwana na nge me kuma ti bikalulu yina ke monisa nde yo ke lomba nde, nge tudila yandi bandilu na yina me tala kusadila basite Internet ya kusolula ti bantu.

•   Sadila video bifwanisu ya ke nikana ya kele ti ntu-diambu Vanda Mayele Ntangu Nge Ke Solula ti Bantu na Nzila ya Internet sambu na kusadisa mwana na nge na kubakisa sambu na nki yo kele mfunu na kuvanda ti bandilu na mambu ya me tala kusadila basite Internet ya kusolula ti bantu.

 Biblia ke tuba nde beto ke zinga na “bantangu ya mpasi mpi ya nku.” (2 Timoteo 3:1-5) Kansi Biblia ke pesa mpi bandongisila ya mfunu yina lenda sadisa beto na kukanga ntima. Beno lenda zwa lisiti ya masolo kuluta 20 yina ke tubila mambu ya kele na Biblia mpi ya ke tubilaka bibuti ti bana na disolo yai ya ke tubila sante ya mabanza ya batoko.