Konso mvula, bamilio ya bantu ke fwaka sambu bo sadilaka kima mosi ya mbi, ata mpi bima yina ke lawusaka. Na nsungi ya maladi ya COVID-19, diambu yai me kuma kusalama mingi kuluta. Mayele ya Biblia me sadisaka bantu mingi na kukatuka na kimpika ya bima ya ke lawusaka. Kana nge ke nwana ti diambu yai, mayele yai lenda sadisa nge mpi. a

Na disolo yai

•  Sambu na nki kusosa lusadisu na Biblia sambu na kukatuka na kimpika ya bima yina ke lawusaka?

•  Bitambi iya ya Biblia ke tubila yina ke sadisaka na kukatuka na kimpika ya bima yina ke lawusaka

•  Baverse ya Biblia yina lenda sadisa beto na kukatuka na kimpika ya bima yina ke lawusaka

•  Masolo ya nkaka ya kieleka ya luzingu ya bantu: Biblia sadisaka bo na kukatuka na kimpika ya bima yina ke lawusaka

•  Keti Biblia ke buyisaka bantu na kunwa bankisi sambu na kukatuka na kimpika ya bima yina ke lawusaka?

•  Keti Biblia ke buyisaka kusadila bima ya ke lawusaka bonso nkisi ya munganga?

 Bansosa me monisa nde mbala mingi bantu ke kumaka na kimpika ya bima yina ke lawusaka sambu bo ke nwanaka ti mambu yai ya mpasi mingi, mu mbandu kana bo ke kudiwa nde bo kele bo mosi, kana bo ke kudiyangisa, kana bo kele ti basusi, mpi kana bo ke niokwama na mabanza. Biblia lenda sadisa beto na kuvanda ti lukwikilu yina ta sadisa beto na kununga bampasi yina ke salaka nde beto vanda bampika ya bima yina ke lawusaka. Yo ke songa beto mutindu beto lenda vanda ti kinduku ya ngolo ti Nzambi. (Nkunga 25:14) Kana Nzambi ke sadisa beto, beto lenda nunga bampasi yina ke monana bonso nde beto lenda nunga yo ve beto mosi.—Marko 11:22-24.

1.  1. Longuka na kuzaba Yehowa Nzambi. b (Yoane 17:3) Yandi muntu salaka bima yonso mpi yandi kele kisina ya ngolo yina ke manaka ve. Kuluta diaka, yandi kele Tata na beto ya ke zolaka beto mingi. Yandi ke zola kuvanda ti kinduku ya ngolo ti nge mpi yandi ke zola kusadila ngolo na yandi sambu na kusadisa nge. (Yezaya 40:29-31; Yakobo 4:8) Yandi me bumbila nge luzingu ya mbote na bilumbu ke kwisa kana nge baka lukanu ya kubaka mambote ya zola na yandi.—Yeremia 29:11; Yoane 3:16.

2.  2. Lomba Yehowa na kusadisa nge. Samba Nzambi mpi lomba yandi na kusadisa nge na kukatuka na kimpika ya bima ya ke lawusaka sambu nge vanda ‘santu [to, bunkete]’ mpi sambu yandi ‘kundima’ nge. (Baroma 12:1) Na nzila ya mpeve santu na yandi, yandi ta pesa nge “ngolo yina me luta ngolo ya bantu.” (2 Bakorinto 4:7; Luka 11:13) Ngolo yai ta sadisa nge na kuyambula kusadila bima ya ke lawusaka mpi na kukuma ti “kimuntu ya mpa” yina ke wakana ti luzolo na yandi.—Bakolosai 3:9, 10.

3.  3. Fulusa mabanza na nge ti bangindu ya Nzambi. (Yezaya 55:9) Yandi ta sadisa nge na “kukuma ya mpa na ngolo yina ke twadisaka mabanza” na nge to na kusoba mutindu na nge ya kuyindula; ebuna yo ta sadisa nge na kukatuka na kimpika ya bima yina ke lawusaka. (Baefezo 4:23) Bangindu ya Nzambi ke vandaka na Biblia, yo yina yo ke mfunu nde nge tanga Biblia mbala na mbala. (Nkunga 1:1-3) Bantu mingi me bakaka mambote sambu bo me ndimaka nde bantu kusadisa bo na kubakisa mambu yina Biblia ke longaka. (Bisalu 8:30, 31) Bambangi ya Yehowa ke longukaka Biblia ti bantu ya ofele. Beto ke binga mpi na kukwisa na balukutakanu na beto; kuna beto ke tubilaka mambu yina Biblia ke tubaka mpi mutindu beto lenda sadila malongi na yo na luzingu na beto.

4.  4. Pona banduku ya mbote. Banduku na nge lenda vanda ti bupusi ya ngolo na luzingu na nge; bo lenda sala nde yo vanda mpasi to pete sambu nge nunga kukatuka na kimpika ya bima ya ke lawusaka. (Bingana 13:20) Nzambi ke ndimaka nde beto baka banduku na kati ya bantu yina ke sambilaka yandi, mpi yandi ke zola nde beto baka mambote na kinduku na bo. (Nkunga 119:63; Baroma 1:12) Pona mbote bansaka ya nge ke tala, sambu yo ke bonso nde nge ke lutisa ntangu ti bantu ya nge ke tala, ke widikila, to ke tanga mambu na bo. Buya konso kima yina ta lembisa lukanu na nge ya kusala mambu ya mbote.—Nkunga 101:3; Amosi 5:14.

 Bafilipi 4:13: “Sambu na mambu yonso, mono kele ti ngolo na nzila ya muntu yina ke pesaka mono ngolo.”

 “Mono zabaka nde mono vandaka ve ti ngolo ya kuyambula kusadila bima ya ke lawusaka, yo yina mono sambaka Nzambi sambu yandi sadisa mono. Yandi pesaka mono ngolo yina mono vandaka ti yo mfunu.”—Patrizia, ya Italie.

 Joseph Ehrenbogen yelaka na kisika yina mubulu vandaka mingi mpi yandi kumaka mpika ya malafu, makaya, marijuana, mpi héroïne. Yandi zolaka kufwa mbala mingi sambu yandi nwaka yo mingi kuluta. Verse mosi ya Biblia ndimisaka yandi nde yandi lenda soba. Tanga disolo na yandi na disolo “Mono Me Kumaka Kudipesa Luzitu mpi Kuzitisa Bankento.”

 Dmitry Korshunov mekaka mbala mingi na kukatuka na kimpika ya bima ya ke lawusaka kansi yandi vandaka kukuka ve. Tala video ‘Mu Va Sepela Diaka Ve ti Luzingu na Mu’ sambu na kuzaba mambu yina sadisaka yandi na kununga.

 Ve. Biblia ke ndima nde: “Bantu yina kele na mavimpi ya mbote ke vandaka na mfunu ya munganga ve, kansi bayina kele na maladi bantu ke vandaka na mfunu na yandi.” (Matayo 9:12) Mutindu mosi, kimvuka mosi ya États-Unis ya ke landilaka mambu ya bima ya ke lawusaka ke tuba nde: “Kuvanda mpika ya bima ya ke lawusaka kele maladi ya mpasi mingi, mpi mbala mingi sambu na kuyambula yo, yo ke lomabaka mambu mingi kansi kaka ve luzolo ya kuyambula yo to kudiyala.” Ya kieleka, lusadisu yina Nzambi ke pesaka ke ngolo mingi kibeni kuluta lukanu yina muntu kele ti yo. Ata mpidina, bantu mingi yina Biblia sadisaka bo na kununga na kukatuka na kimpika ya bima yina ke lawusaka vandaka mpi ti mfunu ya lusadisu ya minganga. c Mu mbandu, bakala mosi, zina na yandi Allen, ke yibuka nde: “Ntangu mono vandaka kuyambula malafu, mono vandaka kuwa mpasi ya mingi na nitu. Yina ntangu mono bakisaka nde mono vandaka ti mfunu ya lusadisu ya munganga katula lusadisu yina mono vandaka kubaka na Biblia.”

 Ve. Na kutuba ya kieleka, Biblia ke tubila kusadila malafu sambu na kubelula maladi to kulembisa mpasi yina muntu ya me kuma pene-pene ya kufwa. (Bingana 31:6; 1 Timoteo 5:23) Kansi, kaka mutindu yo kele kieleka sambu na malafu, muntu lenda kuma mpenza mpika ya bima ya ke lawusaka yina bo ke sadilaka sambu na kulembisa mpasi. Yo yina, yo kele mbote nde kumona bigonsa yina lenda vanda mpi na kusadila na mayele yonso bankisi ya bo me sonikila beto sambu na kukulumusa mpasi.—Bingana 22:3.