Bitumba ya ke salama na Ukraine mpi mambu ya mpasi yina nsoba ya climat ke nata, ke landa kusala nde bantu na ntoto ya mvimba kuvanda ve ti madia ya kufwana. Mpasi yai ke kumina mingi-mingi bansi ya ke sosa kutoma. Na bansi yina yo kele mpasi mingi sambu bantu kuzwa madia ya kufwana.

•   António Guterres yina kele sekretere ya nene (secrétaire général) ya Nations Unies tubaka na Kintete 17 juillet 2023 nde: “Kubasisa bima ya kudia mpi kupesa yo bantu me kuma mpasi sambu na bitumba, climat ya ke soba, ntalu ya enerzi mpi mambu mingi ya nkaka.”

•   Kompani mosi (Atalayar.com) tubaka na Lumingu 23 juillet 2023 nde: “Bantu ya mayele me tuba dezia nde mutindu Russie me katuka na kuwakana yina bo wakanaka sambu na kubasisaka bimenina na Ukraine ta sala nde madia kukuma diaka mpasi na ntoto mpi ntalu na yo ta tombuka mingi na bansi yina ke vandaka ve ti mbongo mingi, mingi-mingi na Afrika ya Nordi mpi na Esti ya Eropa.”

 Tala mambu yina Biblia ke tuba na yina me tala mpasi ya madia mpi bilumbu ke kwisa.

•   Yezu tubaka dezia nde: “Insi mosi ta nwanisa insi ya nkaka mpi kimfumu mosi ta nwanisa kimfumu ya nkaka, mpi nzala ta vanda.”—Matayo 24:7.

•   Mukanda ya Kusonga yina kele na Biblia ke tubila bantu iya ya kifwani ya ke tambusa bampunda. Muntu mosi na kati ya bantu yango ke monisaka bitumba. Muntu yina ke kwisa na nima na yandi ke monisaka nzala, disongidila ntangu yina yo ta kuma mpasi na kuzwa madia mpi bantu ta matisa ngolo ntalu ya madia yango. Biblia ke tuba nde: “Mono monaka mpunda mosi ya ndombe. Muntu yina me vandaka na zulu na yo, yandi me simba na diboko na yandi kima mosi ya kutesila kilo. Mono waka bonso ndinga mosi . . . ke tuba nde ‘Muntu yina me sala kilumbu ya mvimba, salere na yandi kele kilo mosi ya ble.’”—Kusonga 6:5, 6, Bible en Kituba.

 Mambu yai ya Biblia me tubaka na ntwala sambu na mpasi ya madia ke lungana bubu yai na ntangu yai ya Biblia ke binga “bilumbu ya nsuka.” (2 Timoteo 3:1) Sambu na kuzaba mambu mingi na yina me tala “bilumbu ya nsuka” mpi bantu iya yina ke tambula na zulu ya bampunda yina mukanda ya Kusonga ke tubila, tala video Mambu ya Nsi-Ntoto Me Sobaka Banda na 1914 mpi tanga disolo “Bantu Iya ya Ke Tambusa Bampunda—Bo Kele Banani?”

•   Biblia kele ti bandongisila ya mfunu yina lenda sadisa beto na kukanga ntima na bampasi mu mbandu, ntalu ya bima ya ke tombuka to nkutu nzala. Tala mwa bandongisila yina na disolo “Mutindu ya Kuzinga ti Mbongo Fioti.”

•   Biblia ke pesa beto kivuvu nde mambu ta bonga. Yo ke tuba nde yo kele ti ntangu yina “mbuma ta vanda mingi kibeni na ntoto” mpi konso muntu ta vanda ti bima mingi ya kudia. (Nkunga 72:16) Sambu na kuzaba mambu mingi na yina me tala kivuvu sambu na bilumbu ke kwisa mpi sambu na nki beto lenda tudila yo ntima, tanga disolo “Kivuvu ya Kieleka Sambu na Bilumbu ya Ke Kwisa.”