BENO LANDA KUKENGILA!

Dikonga ya Montre ya Nsuka ya Ntoto Me Pusana—Inki Biblia Ke Tuba?

TALA NA

Dikonga ya Montre ya Nsuka ya Ntoto Me Pusana—Inki Biblia Ke Tuba?

Na Kizole 24 janvier 2023, kimvuka mosi ya bantu ya siansi tubaka nde dikonga (aiguille) ya montre a ya ke songisaka nde kilumbu ya nsuka me kuma pene-pene me pusana na midi ya mpimpa. Sambu na bo, yo ke monisa nde beto me kuma kibeni pene-pene ya nsuka ya nsi-ntoto.

Kimvuka mosi (AFP International Text Wire) tubaka nde: “Banda na Kizole ‘Montre ya Nsuka ya Nsi-Ntoto’ ya ke monisaka nde luzingu ya bantu kele na kigonsa me pusanaka ntete ve mingi mutindu yai pene-pene ya midi ya mpimpa. Dikonga yina me pusana sambu na bitumba ya ke salama na Ukraine, sambu na minduki yina lenda fwa ntoto mpi sambu mambu ya climat me beba.”
Televizio mosi (ABC News) tubaka nde: “Bantu ya siansi tubaka na kilumbu ya Kizole nde ‘Montre ya Nsuka ya Ntoto’ me pusana mpi yo me kuma na 90 secondes na ntwala nde midi ya mpimpa kulunga—bantu me bikalaka ntete ve kukuma pene-pene ya Armagedoni mutindu yai.”
Zulunalu mosi (The Guardian) tubaka nde: “Kimvuka mosi ya bantu ya siansi ya bansi ya mutindu na mutindu me tuba na ntwala nde, bubu yai luguluku ya bantu me kuma kibeni na kigonsa na mutindu yina yo me salamaka ntete ve.”

Keti kubika fioti bantu yonso mpi ntoto yai ya beto ke zingaka kufwa? Keti beto fwete wa boma ya mambu yina ta salama na bilumbu ke kwisa? Inki Biblia ke tuba?

Mambu ya ta salama na bilumbu ke kwisa

Biblia ke tuba nde, “ntoto ke bikalaka kimakulu” mpi nde yo ta vanda ti bantu yina “ta zinga kimakulu na zulu na yo.” (Longi 1:4; Nkunga 37:29) Bantu ta fwa ve ntoto to bo ta kuka ve kusala nde ntoto kuvanda diaka ve kisika yina bantu lenda zinga ve.

Kansi, Biblia ke tubilaka kibeni nsuka. Mu mbandu, yo ke tubaka nde “nsi-ntoto ke luta.”—1 Yoane 2:17.

Sambu na kuzaba inki Biblia ke zolaka kutuba ntangu yo ke tubilaka nsuka ya nsi-ntoto, tanga disolo “La fin du monde est-elle proche ? Qu’est-ce que l’apocalypse ?”
Sambu na kuzaba mambu yina Biblia ke tuba nde yo ta salama na ntoto mpi inki ntangu, tanga disolo “Quand la fin du monde viendra-t-elle ?”

Landa kuvanda ti bangindu ya mbote

Biblia lenda sadisa beto na kuvanda ti bangindu ya mbote ata mambu ya nsi-ntoto ke beba. Inki mutindu?

Biblia ke pesa beto bandongisila ya mbote ya lenda sadisa beto na luzingu ya konso kilumbu. (2 Timoteo 3:16, 17) Mu mbandu, tanga disolo “Inki Nge Lenda Sala Sambu Nge Kudiyangisa Ve Kuluta Ndilu” sambu na kuzaba inki mutindu Biblia lenda sadisa nge na kulanda kuvanda ti bangindu ya mbote ata bampasi kele mingi na luzingu.
Biblia ke pesa beto kivuvu ya me fwana kutudila ntima sambu na bilumbu ke kwisa. (Baroma 15:4) Yo ke tendula mbote-mbote mambu yina ta salama bubu mpi na bilumbu ke kwisa. Yo ke sadisa beto na kuvidisa ve kivuvu ata mambu ke beba bubu.

Sambu nge zaba mambu mingi ya kele na Biblia, meka kulonguka Biblia ti Mbangi mosi ya Yehowa.

a Kimvuka mosi (Bulletin of the Atomic Scientists) me tubaka nde: “Montre ya Nsuka ya Ntoto kele montre mosi buna (horloge conceptuelle) ya ke songaka bantu ‘ntangu’ yina me bikala na ntwala nde beto yonso kufwa sambu na bima yina beto mosi me salaka ya ke tula luzingu na kigonsa. Yo kele kidimbu mosi ya ke yibusaka beto inki makambu beto fwete yidika sambu beto mpi nsi-ntoto yai ya beto ke zinga kufwa ve.”