Na Lumingu 20 Novembre 2022, lukutakanu yina ONU salaka (COP27) sambu na kutubila mambu ya Climat manaka. Bamfumu ya baluyalu mpi bantu ya nkaka ya mayele yina kotaka lukutakanu yina bakaka lukanu ya kupesa mbongo na bansi ya kele ve ti mbongo mingi sambu na kusadisa bo na kuyikana ti climat ya ke beba. Ata mpidina, bantu mingi ke tuba nde mbongo yina ta yidika ve mambu.

•   Na 19 Novembre 2022, António Guterres sekretere ya Nations-Unies tubaka nde: “Mono kele na kiese sambu beto me baka lukanu ya kubumba mbongo sambu na kusadisa bantu yina ke mona mpasi sambu na kubeba ya climat. Kansi diambu ya kieleka kele nde yo ta lunga ve . . . Ntoto na beto kele mpenza na kigonsa.”

•   Mary Robinson, prezida ya ntama ya Irlande mpi mfumu ya ntama ya kimvuka ya ONU ya ke nwaninaka banswa ya bantu (Haut-Commissaire aux droits de l’homme) tubaka mambu yai na 20 Novembre 2022: “Climat ya ntoto lenda beba kibeni ntama ve mpi yo lenda natila bantu yonso bampasi.”

 Batoko kele na kati ya bantu ya ke kudiyangisa mingi sambu na ntoto. Keti bamfumu ya baluyalu ta lungisa lukanu na bo ya kuyidika climat ya ke beba na ntoto? Inki Biblia ke tubaka?

 Biblia ke monisa nde, ata bamfumu kusala ngolo mpi bo sala mpenza bikesa sambu na kuyidika mambu yai, bo ta kuka ve kumanisa yo yonso. Yo kele sambu na bikuma yai zole:

•   “Kima yina kele nioka-nioka, bo lenda tandula yo ve.”—Longi 1:15.

   Yo Ke Tendula Nki?: Bamfumu ya baluyalu ta kuka ve kusala mambu yonso ya bo ke kana kusala sambu Nzambi salaka ve bantu sambu bo kudiyala. (Yeremia 10:23) Ata bamfumu ya baluyalu ya ntoto ya mvimba kuvukana mpi bo sala mpenza bikesa, bo ta kuka ve kumanisa bampasi yonso ya bantu.

•   “Sambu bantu ta vanda bantu ya ke kudizolaka, bantu ya ke zolaka mbongo, . . . bantu ya ke zolaka ve kuwakana.”—2 Timoteo 3:2, 3.

   Yo Ke Tendula Nki?: Biblia tubaka pwelele nde na bilumbu na beto, bantu ta sosa kaka mambote na bo mosi mpi bo ta zola ve kuwakana sambu na kusala mambu yina ta natila bantu ya nkaka mambote.

 Kubonga ya ntoto na beto ta katuka ve na mambu yina bamfumu ya baluyalu ke tuba nde bo ta sala bubu yai. Nzambi me ponaka Mfumu ya me fwana sambu na kuyala ntoto, Mfumu yango kele Yezu Kristu. Biblia ke tubaka mambu yai sambu na Yezu:

•   “Luyalu ya kimfumu ta vanda na zulu ya mapeka na yandi. Bo ta bingaka yandi Ndongisi ya Mayele, Nzambi ya Ngolo, Tata ya Kukonda Nsuka, Mfumu ya Ngemba.”—Yezaya 9:6, noti na nsi ya lutiti.

 Yezu kele Mfumu ya Kimfumu ya Nzambi to guvernema ya zulu. (Matayo 6:10) Yandi kele ti ngolo, mayele mpi mpusa ya kuyidika ntoto mpi kulungisa bampusa ya bantu yonso. (Nkunga 72:12, 16) Ntangu yandi ta yala, guvernema yai ya zulu ta fwa “bantu yina ke fwaka ntoto” mpi yo ta yidika mambu yonso ya me beba na ntoto.—Kusonga 11:18, noti na nsi ya lutiti; Yezaya 35:1, 7.

 Sambu na kuzaba mambu mingi ya nkaka ya ta sala nde mambu ya climat kubonga, tanga disolo “Climat ya Ke Soba mpi Luzingu na Beto na Bilumbu Ke Kwisa—Biblia Ke Tuba Inki Sambu na Yo?”