Na bansaka (jeux olympiques) yina ke salama na nsungi été ya 2024, bo ke mona nde bantu kiteso ya 5 miliare ta landa bansaka yina bantu ya ke salaka bansaka ke sala. Bantu yango ya ke salaka bansaka me katuka na bansi 206. Thomas Bach yina kele ntwadisi ya Komite ya Bansaka yina (comité international olympique) tubaka nde: “Beto kele na nsaka mosi ya ke vukisa ntoto ya mvimba sambu yo vanda na ngemba. Bika beto kumisa mpeve yina bansaka yai ke siamisa ya ke monisa nde bantu fwete zinga na bumosi mpi na ngemba, ata beto kele ve beto yonso kiteso mosi.”

 Keti bansaka ke lungisa kibeni balukanu yina ya mbote? Keti kilumbu kele beto ta zinga na ngemba mpi na bumosi?

 Bansaka ya mvula yai me pusa bantu na kuyindula mambu mingi ya nkaka, kansi bansaka yo mosi mpamba ve. Bansaka yango me benda dikebi ya bantu na mambu yina ke salamaka na bisika ya bo ke zingaka mpi na mambu ya politiki yina ke kabula bantu. Na kati ya mambu yango beto lenda tanga, banswa ya bantu, kukonda kuzola bantu ya mpusu ya nkaka ya nitu, kusadila ve bantu mambu mbote na mabundu mpi kupona-pona.

 Bansaka ya mutindu yai ya ke vukisaka bantu ya ntoto ya mvimba ke sadisaka bantu na kulutisa ntangu. Kansi bansaka yai ke monisaka mpi nde bantu ke yindulaka mpi ke salaka mambu na mutindu yina ke kabisaka bantu, mpi bansaka yango ke pusaka bantu na kulanda kuyindula mpi kusala mambu na mutindu yina, na kisika ya kusala mambu yina ta sala nde bantu kuvanda na ngemba mpi na bumosi.

 Biblia tubaka na ntwala nde bantu ta kuma ti bikalulu yina ta sala nde kuzinga na bumosi kuvanda mpasi. (2 Timoteo 3:1-5) Sambu na kuzaba mambu mingi sambu na mambu yai ya Biblia me tubaka na ntwala, tanga disolo “Keti Biblia Tubilaka Dezia Mambu Yina Bantu Ke Yindula mpi Ke Sala Bubu Yai?”

 Biblia ke tuba nde yo kele ti kivuvu mosi ya me fwana na kutudila ntima mpi ya ke monisa nde ngemba mpi bumosi ta vanda na ntoto. Biblia ke tuba nde bantu yonso ya kele na ntoto ta vanda na bumosi ntangu guvernema mosi ya kele na zulu yina Biblia ke bingaka “Kimfumu ya Nzambi” ta yala.​—Luka 4:43; Matayo 6:10.

 Yezu Kristu ya kele Ntotila ya Kimfumu yina ta nata ngemba na ntoto ya mvimba. Biblia ke tuba nde:

•   “Muntu ya lunungu ta yela bonso matiti ya mpa, mpi ngemba ta kuma mingi.”​—Nkunga 72:7.

•   “Yandi ta gulusa nsukami yina ke dila sambu na kulomba lusadisu . . . Yandi ta gulusa bo na bampasi mpi na mubulu.”​—Nkunga 72:12, 14.

 Yo vanda bubu yai, malongi ya Yezu me salaka nde bamilio ya bantu ya kele na bansi 239 kuvanda na bumosi. Bambangi ya Yehowa kele Bakristu. Yo yina na ntoto ya mvimba, bo me longukaka na kuvanda bantu ya ngemba. Kana nge ke zola kuzaba inki mutindu, tanga disolo ya kele ti ntu-diambu “Mutindu ya Kubuya Kumenga Bantu ya Nkaka.”