Na 2022 baguvernema na ntoto ya mvimba basisaka mbongo bamiliare 2 240 ya badolare sambu na kukumisa ngolo makuki ya makesa na bo ya kunwana mpi ya kutanina bansi na bo. Baluyalu me basisaka ntete ve mbongo mingi mutindu yai. Mambu me salama mutindu yai mingi-mingi sambu na bitumba yina insi Russie ke nwanisa insi Ukraine. Rapore yina kimvuka mosi (Institut international de recherche de la paix) basisaka na avril 2023 ke tuba sambu na mvula 2022 nde:

•   Badepanse sambu na mambu ya minduki na Eropa “me tombuka na 13 % na mvula ya mvimba, badepanse yai me tombukaka ntete ve mutindu yai banda bitumba yina bo ke bingaka guerre froide me salamaka.”

•   “Insi Russie me matisa badepanse na yo na mambu ya minduki na 9,2 %. Mpidina, insi yai me katuka na kisika ya tanu yina yo vandaka na kati ya bansi yina kele ti minduki mingi na nsi ntoto ya mvimba mpi yo me kuma na kisika ya tatu.”

•   États-Unis kele kaka insi ya ntete na kati ya bansi yango. Badepanse na bo na mambu ya minduki kele ya 39 % kuluta yina bansi yonso na ntoto ya mvimba ke basisaka.

 Doktere mosi na mambu ya mbongo (docteur en économie) na zina ya Nan Tian ya pesaka mpi maboko na rapore ya kimvuka Institut international de recherche de la paix tubaka nde: “Mutindu bo ke matisa badepanse ya mambu ya minduki na ntoto ya mvimba na bamvula yai ke monisa nde, beto ke zinga na ntoto yina kele diaka ve na lutaninu.”

 Biblia tubaka na ntwala nde na bilumbu na beto, kukonda kuwakana na kati ya bansi yina kele ngolo mingi na ntoto ya mvimba ta kuma diaka ngolo. Kansi Biblia ke songa beto mpi kima kaka mosi yina ta nata ngemba na ntoto.

•   Biblia ke bingaka bilumbu yai ya beto ke zinga nde ‘ntangu ya nsuka.’—Daniele 8:19.

•   Mukanda ya Daniele tubaka na ntwala nde na ntangu yango, bangolo ya nsi-ntoto ta salaka mambu bonso bambanda. Bangolo yango ta nwanaka bo na bo sambu mosi kumonisa nde yandi kele ngolo mingi. Bitumba yina ta sala nde, bo sadila “bimvwama” mingi to mbongo mingi.—Daniele 11:40, 42, 43.

 Sambu na kuzaba mambu mingi na yina me tala mambu yai ya Biblia tubaka dezia na ntwala, tala video Kulungana ya Mbikudulu—Daniele Kapu 11.

•   Biblia ke tuba nde Nzambi ta katula baluyalu yonso ya bantu. Yandi “ta tula kimfumu mosi yina ta fwa ve ata fioti. Kimfumu yina ta kwenda ve na bantu ya nkaka. Yo ta bedisa mpi ta sukisa bimfumu yina yonso, mpi yo mpamba ta bikala kimakulu.”—Daniele 2:44.

•   Yehowa a Nzambi ta sala mpi mambu yina bantu lenda kuka ve kusala, mambu yina ta kotisa ngemba ya kieleka mpi ya mvula na mvula na ntoto. Inki yandi ta sala? Luyalu na yandi ya kele na zulu ta katula minduki yonso mpi mubulu ya mitindu yonso.—Nkunga 46:8, 9.

 Sambu na kuzaba mambu mingi na yina me tala mambu yina Kimfumu ya Nzambi ta sala, tanga disolo “Na Nsi ya Kimfumu ya Nzambi ‘Ngemba Ta Kuma Mingi.’”