Konso mvula, ntoto ke nikanaka na bisika mingi kibeni. Ata mbala mingi yo ke nikanaka ve ngolo, kana ntoto me nikana ngolo, yo lenda bebisa bima mingi, kunata bampasi migngi mpi kufwa bantu. Kunikana ya nkaka ya ntoto ke salaka nde masa kukuma mingi ebuna yo ke bebisaka bisika yina kele pene-pene ya océan mpi yo ke fwaka bantu mingi. Keti Biblia tubilaka na ntwala kunikana ya ntoto ya ngolo?

Na disolo yai

•  Keti Biblia tubaka na ntwala nde ntoto ta nikana?

•  Keti kunikana ya ntoto ya ke salama bubu ke lungisa bambikudulu ya Biblia?

•  Bambikudulu ya Biblia ya ke tubila kuninaka ya ntoto ke tendula nki sambu na beto?

•  Bangindu ya luvunu na yina me tala bambidukulu ya Biblia mpi kunikana ya ntoto

 Biblia ke tubila kunikana ya ntoto na mbikudulu mosi yina Yezu tubaka. Bo me sonikaka mambu yina yandi tubaka na mikanda tatu ya Biblia; yandi tubaka nde:

 “Insi mosi ta nwanisa insi ya nkaka mpi kimfumu mosi ta nwanisa kimfumu ya nkaka, mpi nzala ta vanda mpi ntoto ta nikana na bisika ya mutindu na mutindu.”—Matayo 24:7.

 “Insi mosi ta nwanisa insi ya nkaka mpi kimfumu mosi ta nwanisa kimfumu ya nkaka; ntoto ta nikana na bisika ya mutindu na mutindu; nzala ta vanda mpi.”—Marko 13:8.

 “Ntoto ta nikana ngolo, mpi nzala ti kipupa ta vanda na bisika ya mutindu na mutindu.”—Luka 21:11.

 Yezu tubaka nde “ntoto ta nikana ngolo” na “bisika ya mutindu na mutindu” na ntangu yina bitumba, nzala mpi maladi ta vanda. Mambu yai yonso ke monisa nde beto ke zinga na nsungi yina bo ke binga “nsukilu ya ngidika ya bima,” to “bilumbu ya nsuka.” (Matayo 24:3; 2 Timoteo 3:1) Na kulanda masolo ya Biblia, “bilumbu ya nsuka” yantikaka na 1914 mpi yo me sukaka ntete ve.

 Ee. Mbikudulu ya Yezu, ata mpi mambu yina yandi tubaka sambu na kunikana ya ntoto, ke wakana ti mambu ya ke salama na bilumbu na beto. Banda 1914, ntoto me nikanaka ngolo mbala kuluta 1 950; na kimvuka, bakunikana yina ya ntoto me fwaka bantu kuluta bamilio zole. a Beto tadila mwa bambandu ya me salama na mvu-nkama yai.

 2004—Océan Indien. Kunikana ya ntoto ya nivo 9,1 basisaka tsunami yina kumaka na bansi kiteso ya kumi na zole mpi fwaka bantu kiteso ya 225 000.

 2008—Chine. Kunikana ya ntoto ya nivo 7,9 fwaka babwala ya nene mpi ya fioti; yo fwaka bantu kiteso ya 90 000, yo lwadisaka bantu kiteso ya 375 000, mpi yo bikisaka bamilio ya bantu kukonda banzo.

 2010—Haïti. Kunikana ya ntoto ya nivo 7,0 yina landanaka ti bakunikana ya ntoto ya fioti ya ngolo, fwaka bantu kuluta 300 000 mpi bikisaka bantu kuluta milio mosi kukonda banzo.

 2011—Japon. Kunikana ya ntoto ya nivo 9,0 mpi ba tsunami yina salamaka na nima na yo, fwaka bantu kiteso ya 18 500 mpi salaka nde bantu mingi kibeni kuyambula kisika bo vandaka kuzinga. Centrale ya courant ya Fukushima bebaka mpi aksida ya nikleyere ya ngolo salamaka. Bamvula kumi na nima, bantu kiteso ya 40 000 lendaka ve kuvutuka na banzo na bo ya kele pene-pene ya centrale yina ya courant sambu na bigonsa ya nene yina courant kele ti yo sambu na bo.

 Bambikudulu ya Biblia ya ke tubila kunikana ya ntoto ke songa beto mambu yina ta salama ntama mingi ve na bilumbu ke kwisa. Yezu tubaka nde: “Kana beno mona mambu yai ke salama, beno zaba nde Kimfumu ya Nzambi me finama.”—Luka 21:31.

 Biblia ke tuba nde Kimfumu ya Nzambi kele luyalu ya kieleka yina kele na zulu mpi Yezu Kristu muntu kele Ntotila na yo. Yezu longaka balongoki na yandi na kusamba sambu na Kimfumu yai.—Matayo 6:10.

 Ntangu Kimfumu ya Nzambi ta yala ntoto ya mvimba, Nzambi ta pesa ve nzila nde bisumbula ya lugangu, ata mpi kunikana ya ntoto, kunatila bantu bampasi. (Yezaya 32:18) Diaka, yandi ta belula bampasi yina kunikana ya ntoto ya bubu yai me natilaka bantu. (Yezaya 65:17; Kusonga 21:3, 4) Sambu na kuzaba mambu mingi, tanga disolo “Inki Mambu Kimfumu ya Nzambi Ta Sala?”