Kimvuka mosi (service de presse catholique) ya ke basisaka bansangu ya dibundu ya Katolika ke tuba nde, na messe mosi yina bo salaka na basilique Saint-Pierre na le 25 mars 2022, pape François telamaka na ntwala ya kiteki ya Maria “meso ya kukanga mpi ntu na nsi ntangu yandi vandaka kusamba na ndinga ya nsi.” Yandi “bondilaka Maria” sambu na ngemba. Rapore mosi ya bansangu ya Vatican yikaka nde “pape salaka kisambu ya bo ke bingaka Acte de consécration de l’humanité, mingi-mingi sambu na Russie mpi Ukraine, na ntima ya santu ya Maria.”

 Nge ke yindula inki? Keti yo kele mbote na kusamba na ntwala ya biteki to kusadila yo na lusambu? Beto tadila baverse yai ya Biblia:

•   “Nge fwete kudisadila ve kiteki to kima mosi ya me fwanana ti konso kima yina kele na zulu to na ntoto to na masa yina kele na nsi ya ntoto. Nge fwete fukimina yo ve to kubika nde bo pukumuna nge na kusadila yo, sambu mono Yehowa Nzambi na nge, mono kele Nzambi yina ke lombaka nde bo kangama kaka na yandi.”—Kubasika 20:4, 5. a

•   “Biteki na bo kele arza mpi wolo, kisalu ya maboko ya muntu. Yo kele na munoko, kansi yo ke tubaka ve; yo kele na meso, kansi yo ke monaka ve; yo kele na makutu, kansi yo ke waka ve; yo kele na mbombo, kansi yo ke waka ve nsudi; yo kele na maboko, kansi yo ke simbaka ve; yo kele na makulu, kansi yo ke tambulaka ve; mungungu na yo ke basisaka ve ndinga. Bantu yina ke salaka yo ta kuma kaka bonso yo, bayina yonso mpi ke tudilaka yo ntima ta kuma bonso yo.”—Nkunga 115:4-8.

•   “Mono kele Yehowa. Yo yina zina na mono; mono ke kabisaka ve nkembo na mono ti muntu ya nkaka, mono ke pesaka mpi ve lukumu na mono na biteki.”—Yezaya 42:8, noti na nsi ya lutiti.

•   “Beno tina lusambu ya biteki.”—1 Bakorinto 10:14.

•   “Beno tina biteki.”—1 Yoane 5:21.

 Sambu na kuzaba mambu mingi ya Biblia ke tubaka na yina me tala kusadila bifwanisu to biteki na lusambu, tanga disolo “D’après la Bible : Les images religieuses” to tala video Keti Nzambi Ke Ndimaka nde Beto Sadila Biteki Ntangu Beto Ke Sambila Yandi?

 Mbala ya nkaka nge ta sepela na mambu yina Biblia ke tuba sambu na bangiufula yai:

•   “La Vierge Marie : Que dit la Bible à son sujet ?”

•   “Devrait-on prier la Vierge Marie ?”

•   “Miracles et apparitions — Des manifestations divines ?”

•   “La paix dans le monde : comment sera-t-elle établie ?”

Photo credit: Vincenzo Pinto/AFP via Getty Images