Inki Biblia Ke Tuba Sambu na Mpasi ya Masa ya Bunkete na Ntoto ya Mvimba?

TALA NA

Beto yonso kele ti mfunu ya masa ya bunkete sambu na kuzinga. Kansi mutindu António Guterres sekretere ya nene ya kimvuka ya bo ke bingaka Nations Unies tubaka dezia na ntwala “na ntoto ya mvimba bantu ke landa kuvanda ti mpusa ya masa bunkete, yo yina beto ke mona mpasi ya masa.” Bamiliare ya bantu na ntoto ya mvimba ke vandaka ve ti masa ya bunkete ya kunwa.

Strdel/AFP via Getty Images

Keti kilumbu kele bantu yonso ta vanda ti masa ya me fwana? To beto ta vandaka kaka ti mpasi? Inki Biblia ke tuba sambu na yo?

Inki Biblia ke tuba sambu na masa

Biblia ke tuba nde na bilumbu ke kwisa, bantu ta vanda diaka ve ti mpasi ya masa. Ya kieleka, masa ya bunkete ta vanda mingi na ntoto ya mvimba.

“Bamasa ta basika na ntoto-makanga, mpi bamasa ta basika na ntoto ya zelo na zelo. Ntoto ya me yuma na mwini ta kuma dizanga ya masa ya me fuluka ti balukengi, mpi ntoto ya kukonda masa ta kuma banto ya masa.”—Yezaya 35:6, 7.

Sambu na nki beto lenda ndima mambu yai ya Biblia ke tuba? Beto tadila mambu yina Biblia ke tuba na mosi ya mitindu yina Yehowa salaka ntoto na beto.

Inki Biblia ke tuba sambu na ntoto mpi mutindu masa ke tombukaka na zulu mpi ke vutukaka na ntoto

“[Nzambi] gangaka [ntoto] ve kaka sambu na mpamba, kansi yandi salaka yo sambu bantu kuzinga.”—Yezaya 45:18.

Nzambi salaka ntoto sambu na kuzinga, yo yina yandi salaka na mpila nde yo basisaka masa mingi ya bunkete.

“[Nzambi] ke bendaka matonsi ya masa; yo ke kangamaka mpi ke kumaka mvula yina ke katukaka na lubungi na yandi; na nima matuti ke nokisaka yo na ntoto, yo ke nokilaka bantu.”—Yobi 36:27, 28.

Na kutuba ya pete, verse yai ke monisa mutindu Nzambi salaka mambu na mpila nde ntoto kuvanda ti masa mpi mutindu ntoto fwete basisaka masa yango kukonda nsuka sambu yo konda ve. Masa ya ke vandaka na ntoto mpi na nzadi-mungwa ke mataka na zulu, yo ke kumaka matuti ya kukangama, na nima yo ke nokaka bonso mvula. Mpidina, yo ke pesaka masa ya bunkete sambu na bantu mpi bambisi.—Longi 1:7; Amosi 5:8.

“Mono ta pesa beno bamvula ya ngolo na ntangu na yo, insi yina ta buta mbuma na yo, mpi banti ya bilanga ta buta mbuma na yo.”—Levi 26:4.

Nzambi tubaka nde, yandi ta sakuma bana ya Izraele ya ntangu ya ntama, bo vandaka dikanda ya bantu yina vandaka kusala bilanga, yandi ta pesa mvula ya mingi yina ta sala nde bambuma kubutuka mingi. Yandi zabaka nde sambu madia kuyela, bantu ke vandaka ti mfunu ya mvula.

Mambu yina Nzambi salaka sambu na dikanda ya Izraele ya ntama, yandi ta sala yo mpi sambu na ntoto ya mvimba. (Yezaya 30:23) Na ntwala nde ntangu yina kulunga, bisika mingi na ntoto, mpasi ya masa ke landa kukuma mingi. Kukonda mvula kele mosi ya mpasi yango ya masa. Inki ya nkaka Biblia ke tuba sambu na mpasi ya masa ya beto ke kutana ti yo bubu yai?

Inki mutindu mpasi ya masa ta mana?

Biblia ke monisa nde Nzambi ta sadila Kimfumu na yandi sambu na kumanisa mpasi ya masa yina bantu ke mona na ntoto ya mvimba bubu yai. (Matayo 6:9, 10) Kimfumu ya Nzambi kele guvernema mosi ya kele na zulu mpi ya ta yala ntoto ya mvimba. (Daniele 2:44; Kusonga 11:15) Katula yo, Kimfumu ya Nzambi ta sala mambu yina baguverma ya bantu ke kuka ve kusala disongidila, yo ta katula mambu yonso ya ke salaka nde masa kuvanda mpasi.

Mpasi: Mutindu mambu ya climat ke soba, yo ke sala nde kumata ya masa na zulu mpi kukita na yo kukuma mpasi. Na kati ya malanda na yo, beto lenda tanga musipu ya ngolo, masa ya ke fuluka na babwala mpi ya ke dindisa banzo, yo vanda sambu na bamvula ya ngolo to sambu nivo ya bamasa ya banzadi ke mata.

Kima yina ta manisa yo: Kimfumu ya Nzambi ta yidika bima yonso ya ke salaka nde masa kukuma mpasi sambu ntoto kuvutuka mutindu yo vandaka. Nzambi ke tuba nde: “Tala! Mono ke sala bima yonso ya mpa.” (Kusonga 21:5) Ntoto ya kuyuma ta fuluka ti masa ya mbote, mpi yo ta sala nde bantu kuyantika kuzinga yo vanda na bisika yina bantu ke zingaka ve bubu mpi bima ta yela. (Yezaya 41:17-20) Na maboko ya Yezu Kristu, Kimfumu ya Nzambi ta yala bangolo yonso ya ntoto.

Ntangu Yezu vandaka na ntoto, yandi yalaka mupepe mosi ya ngolo yina vandaka kupesa boma. Mpidina, yandi monisaka nde Yehowa pesaka yandi ngolo. (Marko 4:39, 41) Na nsi ya lutwadisu ya Yezu Kristu bonso Ntotila ya Kimfumu ya Nzambi, bisumbula ya lugangu ta vanda diaka ve. Bantu ta vanda na ngemba ya kieleka mpi na lutaninu, bo ta waka diaka ve boma ata ya kisumbula mosi ya lugangu.

Mpasi: Bantu ke tulaka ve dikebi na malanda ya mambu ya bo ke salaka mpi bimvuka ya bantu ya bwimi ke bebisa bamasa, banzadi mpi bima ya ke bumbaka masa na nsi ya ntoto, yo ke sala diaka nde masa ya bunkete kuvanda mpasi.

Kima yina ta manisa yo: Nzambi ta kumisa ntoto bunkete mpi yandi ta vutula bamasa, banzadi, banzadi mungwa mpi ntoto mutindu yo vandaka. Ntoto ta kuma paladisu. Biblia ke tuba na mutindu ya kifwani nde: “Ntoto-makanga ti ntoto ya kuyuma ta vanda na kiese, mpi ntoto ya zelo na zelo ta yangalala mpi ta basisa bintuntu bonso safrani.”—Yezaya 35:1.

Inki ta kumina bantu yonso yina ke tula ve dikebi na ntoto, na masa, na mupepe mpi na bima yonso ya kele na ntoto to bantu ya ke tudila ve bantu ya nkaka dikebi? Nzambi ke tuba nde yandi ‘ta fwa bantu yina ke fwaka ntoto.’—Kusonga 11:18, noti na nsi ya lutiti; Bingana 2:21, 22.

Mpasi: Bantu ke sadila ve mbote ba-nto ya masa mpi yo ke sala nde masa kubeba mingi kuluta masa yina ntoto ke basisaka.

Kima yina ta manisa yo: Na nzila ya Kimfumu, luzolo ya Nzambi kansi ve luzolo ya bantu ya bwimi, ta ‘salama na ntoto.’ (Matayo 6:9, 10) Kimfumu ya Nzambi ta longa mbote-mbote bantu yina yo ta yala. Yezaya 11:9 ke tuba nde “ntoto ta fuluka kibeni ti nzayilu ya Yehowa.” a Mutindu bantu ta fuluka ti nzayilu ya kuluta mbote mpi bo ta zola Nzambi mingi kibeni mpi bima yonso ya yandi me salaka, bo ta keba ntoto mpi bima yonso ya kele na zulu na yo na mutindu ya kukuka.

Sambu na kuzaba mambu mingi yina Kimfumu ya Nzambi ta sala, tala disolo “Inki Kimfumu ya Nzambi Ta Sala”
Kwenda na Biblia na mukanda ya Yezaya kapu 35, mpi tanga nge mosi mutindu ntoto ta kuma paladisu.
Tala video Sambu na Nki Nzambi Gangaka Ntoto? sambu na kuzaba mambu mingi na yina me tala lukanu ya Nzambi sambu na ntoto mpi bantu.