BENO LANDA KUKENGILA!
Mubulu na Mambu ya Politiki—Inki Biblia Ke Tuba?
Bantu ke sala mambu mingi ya mubulu sambu mambu ya politiki kusoba. Mambu yina ke salama ke sala nde bantu kukuma na boma na ntoto ya mvimba.
Na insi Mexique bo fwaka bantu 39 ya politiki. Bo me fwaka ntete ve bantu ya politiki mingi mutindu yai. Mambu ya mubulu ya mutindu na mutindu ya nkaka sambu na mambu ya politiki salamaka mpi. Yo salaka nde bantu kukipe diaka ve voti sambu na kupona bantwadisi yina salamaka na 2023-2024.
Na Eropa, na bilumbu ya me katuka kuluta, mubulu me salama mingi na mambu ya politiki mu mbandu, bo sosaka kufwa ministre ya ntete ya insi Slovaquie na Kitatu 15 mai 2024.
Bantu mingi na États-Unis ke yituka mingi na kumona mutindu muntu mosi zolaka kufwa Donald Trump prezida ya ntama ya États-Unis na kilumbu ya Mposo 13 juillet.
Sambu na nki mubulu me kuma mingi na yina me tala mambu ya politiki? Keti kilumbu kele yo ta mana? Inki Biblia ke tuba?
Biblia tubaka na ntwala nde bantu ta kabwana sambu na bangindu na bo na mambu ya politiki
Biblia tubaka na ntwala nde na ntangu na beto, yina yo ke bingaka nde “bilumbu ya nsuka,” bantu mingi ta nataka mubulu mpi kukonda kuwakana.
“Na bilumbu ya nsuka bantangu ya mpasi mpi ya nku ta vanda. Sambu bantu ta vanda . . . bantu ya ke pesaka ve matondo, bantu ya me konda kwikama, . . . bantu ya ke zolaka ve kuwakana, . . . bantu ya nku, . . . bantu ya ke tekaka bankaka, bantu ya ntu-ngolo, bantu ya me fuluka ti lulendo.”—2 Timoteo 3:1-4.
Biblia tubaka mpi na ntwala nde mavwanga mu mbandu, bantu ta kuma kutelamina baluyalu mpi mavwanga ya politiki ta kuma mingi na ntangu yai. (Luka 21:9, noti na nsi ya lutiti) Ata mpidina, mubulu na mambu ya politiki mpi kukabwana ta wumela ve dibela.
Mubulu na mambu ya politiki ta mana
Biblia ke tuba nde Nzambi ta katula baluyalu yonso ya bantu mpi yandi ta tula luyalu na yandi mosi yina kele dezia na zulu.
“Nzambi ya zulu ta tula kimfumu mosi yina . . . ta bedisa mpi ta sukisa bimfumu yina yonso [ya nkaka], mpi yo mpamba ta bikala kimakulu.”—Daniele 2:44.
Kimfumu ya Nzambi ta vukisa kibeni bantu mpi yo ta tula ngemba ya kieleka na ntoto ya mvimba.
Ntwadisi ya Kimfumu ya Nzambi, Yezu Kristu, Biblia ke binga yandi “Mfumu ya Ngemba.” Yandi ta sala nde ‘ngemba kuvanda kukonda nsuka.’—Yezaya 9:6, 7.
Ata bubu yai, bantu yina Kimfumu yina ke yala ke longuka mutindu ya kuzinga na ngemba. Yo yina, Biblia ke tuba nde: “Bo ta kumisa bambele na bo ya bitumba bima ya kubundudila ntoto mpi bo ta kumisa makonga na bo bakupu-kupu. Dikanda mosi ta nangula ve mbele ya bitumba sambu na kunwanisa dikanda ya nkaka, bo ta longuka mpi diaka ve bitumba.”—Yezaya 2:3, 4.
Sambu na kuzaba mambu mingi, tanga disolo “Que fera le royaume de Dieu ?” mpi tala video Kimfumu ya Nzambi Kele Nki?