Bansi yina Me Vukanaka (Nations unies) me monisa mambu yai:

•   Banda na Mposo 7 octobre tii na Kintete 23 octobre 2023, bitumba na kati ya Izraele ti Gaza me sala nde bantu 6 400 kufwa mpi 15 200 kulwala. Bamingi na kati na bo vandaka ve basoda. Katula yo, bantu mingi kibeni tinaka babwala yai.

•   Na Kiya 24 septembre 2023, bitumba na kati ya insi Russie ti Ukraine salaka nde bantu 9 701 kufwa mpi 17 748 kulwala na Ukraine.

 Inki kivuvu Biblia ke pesa bantu yina ke niokwama sambu na bitumba?

 Biblia tubaka na ntwala nde Nzambi ta ‘manisa bitumba na ntoto ya mvimba.’ (Nkunga 46:9) Sambu na kumanisa bitumba, yandi ta sadila guvernema mosin to kimfumu mosi ya kele na zulu. Ebuna kimfumu yango ta baka kisika ya baluyalu yonso ya bantu. (Daniele 2:44) Kimfumu ya Nzambi ta lembika bantu.

 Yai kele mambu yina Yezu Kristu ya kele Ntotila ya Kimfumu ya Nzambi ta sala:

•   “Yandi ta gulusa nsukami yina ke dila sambu na kulomba lusadisu, Mpi muntu ya kukonda mfunu ti konso muntu yina me konda nsadisi. Yandi ta wila muntu ya kukonda mfunu mpi nsukami mawa, mpi yandi ta gulusa luzingu ya bansukami. Yandi ta gulusa bo na bampasi mpi na mubulu.”—Nkunga 72:12-14.

 Nzambi ta sadila Kimfumu na yandi sambu na kumanisa bampasi yonso yina bitumba mpi mubulu me natilaka bantu.

•   “Yandi ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama me vila.”—Kusonga 21:4.

 Ntama mingi ve, Kimfumu ya Nzambi ta soba mambu mingi awa na ntoto. Biblia tubaka nde beto ta wa bo ke tubila “bitumba mpi bansangu ya bitumba.” (Matayo 24:6) Mambu yai mpi mambu ya nkaka ke monisa nde beto ke zinga na “bilumbu ya nsuka” ya luyalu ya bantu.—2 Timoteo 3:1.