Muyibi ya bamfumu ya luyalu ke salaka ke salamaka na ntoto ya mvimba mpi yo ke basisaka bampasi mingi. a Mu mbandu, na nsungi ya maladi ya COVID-19, bantu fundaka bamfumu ya bansi mingi nde bo vandaka kudikumisa bamvwama na mbongo yina bo pesaka bo sambu na kunwanisa maladi yai. Muyibi yai salaka nde bantu ya nkaka kubaka ve lusansu yina bo vandaka ti yo mfunu, yo yina bantu mingi monaka mpasi mpi fwaka.

 Bampasi yina muyibi ya bamfumu ya luyalu ke basisaka kele mingi mpenza. David Cameron, premier ministre ya ntama ya Royaume-Uni, tubilaka yo na bangogo yai: “Muyibi kele bonso bukondi mosi ya nene—mpi bansi yonso me kangamaka na kati na yo.”

 Ata mpidina, beto lenda ndima nde ntama mingi ve baluyalu yonso ya miyibi ta suka. Sambu na nki? Beno wa mambu yina Biblia ke tuba nde Nzambi ta sala.

 Biblia ke tuba nde Nzambi tubaka mambu yai: “Mono, Yehowa, mono ke zolaka lunungu; mono ke mengaka kimuyibi ti kukonda kusungama.” b (Yezaya 61:8) Kana bantu ke niokwama sambu bantu ya nkaka ke yiba, Nzambi ke monaka yo. (Bingana 14:31) Yandi ke sila nde: “Sambu bo ke niokula bantu ya ke mona mpasi, . . . mono ta telama sambu na kusala diambu.”—Nkunga 12:5.

 Nzambi ta sala nki? Olie ya kutomisa baluyalu yina ke yala deja, yandi ta yingisa yo na luyalu na yandi yina ta vanda na zulu; bo ke bingaka yo “Kimfumu ya Nzambi.” (Marko 1:14, 15; Matayo 6:10) Biblia ke tuba nde: “Nzambi ya zulu ta tula kimfumu mosi yina . . . ta bedisa mpi ta sukisa bimfumu yina yonso [ya nkaka], mpi yo mpamba ta bikala kimakulu.” (Daniele 2:44) Yo yina, Nzambi ta sukisa muyibi yonso yina beto ke mona bubu.

 Inki ke ndimisa beto nde Kimfumu ya Nzambi ta vanda ve ti muyibi? Tadila mambu yai ya me landa.

1.  1. Kiyeka. Kiyeka ya Kimfumu yai ke katuka na Nzambi Nkwa-Ngolo Yonso.—Kusonga 11:15.

    Sambu na nki yo kele mfunu: Sambu baluyalu ya bantu kusala bisalu, bo ke sadilaka mbongo yina bantu na yo ke pesaka bo. Mbala mingi, yo ke pesaka bamfumu mabaku ya kubaka avoka, ya kuyiba, mpi ya kukusa bantu ya nkaka. Kansi, Kimfumu yai, Nzambi Nkwa-Ngolo Yonso muntu ke sadisaka yo, yo yina yo ta kukaka ntangu yonso kulungisa bampusa ya bantu na yo.—Nkunga 145:16.

2.  2. Mfumu. Nzambi me tulaka Yezu Kristu Mfumu ya Kimfumu yina.—Daniele 7:13, 14.

    Sambu na nki yo kele mfunu: Bantu lenda pusa ata bamfumu ya kuluta mbote na kusala mambu ya mbi. (Longi 7:20) Na kuswaswana ti bo, Yezu me monisaka nde bo lenda pesa yandi ve avoka. (Matayo 4:8-11) Diaka, kima ke pusaka yandi ntangu yonso na kusala mambu kele zola yina yandi ke vandaka ti yo sambu na bantu na yandi mpi yandi ke kudiyangisaka na masonga yonso sambu na mambote na bo.—Nkunga 72:12-14.

3.  3. Bansiku. Bansiku ya Kimfumu ya Nzambi kele ya kukuka, yo ke bwisaka nkutu ntima.—Nkunga 19:7, 8.

    Sambu na nki yo kele mfunu: Mbala mingi, bansiku ya bantu ke vandaka mpasi, kizitu, to bantu ke zitisaka yo ve, yo ke salaka nde bantu kuzwa mabaku ya kubaka avoka. Na kuswaswana ti yo, bansiku ya Nzambi kele mbote mpi yo ke natilaka beto mambote. (Yezaya 48:17, 18) Diaka, bansiku yai ke tubilaka kaka ve mambu ya bantu ke salaka kansi yo ke tubilaka mpi bikuma ya ke pusaka bo na kusala yo. (Matayo 22:37, 39) Ya kieleka, Nzambi lenda tanga mambu ya kele na bantima ya bantu mpi yandi lenda zikisa nde bantu ke zitisa bansiku yina na mawa yonso.—Yeremia 17:10.

 Beto ke lomba nge na kulonguka mambu mingi ya ke tadila mambu yai ya Biblia ke sila nde na bilumbu ke kwisa beto ta vanda ti luyalu mosi ya me konda muyibi.

•   Tanga disolo “Kimfumu ya Nzambi—Luyalu Mosi ya Ta Vanda Ve ti Mambu ya Mbi” sambu na kuzaba bikuma tatu yina ke sala nde Kimfumu ya Nzambi kukuma ve muyibi ata fioti.

•   Tala video Kimfumu ya Nzambi Kele Nki? sambu na kuzaba mambu mingi ya ke tala luyalu ya Nzambi mpi mambu yina yo ta sala sambu na ntoto.

•   Meka kulonguka na beto ya Biblia ofele, ya ke salamaka na masolo, sambu na kumona mutindu balusilu ya Biblia lenda natila nge mambote.