Inki Biblia Ke Tuba Sambu na Nzala ya Bubu?

TALA NA

“Nzala kumana.” Yai kele mambu yina bantwadisi ya nsi-ntoto ke kana kusala sambu na kumanisa mpasi mosi ya nene na kati ya bampasi yina bantu ke mona, disongidila mutindu ya kupesa konso muntu na ntoto a madia. Kansi keti kilumbu kele nzala ta vanda diaka ve na nsi-ntoto? Inki Biblia ke tuba?

Biblia tubilaka nzala ya bubu na ntwala

Biblia tubaka dezia na ntwala nde nzala ta vanda na ntangu na beto, ntangu yina yo ke binga “bilumbu ya nsuka.” (2 Timoteo 3:1) Nzambi ve muntu me salaka nde nzala kukota na ntoto, kansi yandi me bendaka dezia dikebi sambu na yo na ntwala. (Yakobo 1:13) Tadila mambu yai zole yina Biblia tubilaka na ntwala.

“Nzala ta vanda . . . na bisika ya mutindu na mutindu.” (Matayo 24:7) Biblia tubaka na ntwala nde nzala ta vanda na bisika mingi. Rapore mosi ya bantu yina ke longukaka mutindu bo ke salaka madia mpi ke kabulaka yo ke tuba nde: “Mambu ya me tala nzala na nsi-ntoto, mpi kukonda madia ya mbote mpi ya kufwana ke landa kaka kubeba.” b Bamilio ya bantu na bansi mingi ke zwaka ve madia yina bo kele na yo mfunu. Diambu ya mawa kele nde, bantu mingi na kati na bo ke fwa.

“Mono monaka mpunda mosi ya ndombe; muntu yina vandaka na zulu na yo vandaka ti kilo na maboko na yandi.” (Kusonga 6:5) Na verse yai, mpunda ya kifwani mpi muntu yina ke tambusa yo ke monisa nzala na bilumbu ya nsuka. c Kilo yina kele na maboko ya muntu yina ke tambusa mpunda kele sambu na kutesila makanda madia. Kaka bonso muntu yai ya ke tambusa mpunda, ndinga mosi ke tuba nde ntalu ya bima ya kudia ta tombuka mingi mpi ke longisila bantu na kubumba madia ya mfunu. (Kusonga 6:6) Diambu yai ke monisa kibeni mpasi ya madia ya beto ke mona bubu yai, ntangu bamiliare ya bantu ke kuka ve kuzwa madia ya mbote mpi ya kufwana.

Inki mutindu nzala ta mana?

Bantu ya mayele ke tuba nde ntoto na beto yai ke basisaka madia mingi kuluta sambu na kudisa konso muntu ya ke zingaka na zulu na yo. Ebuna inki bampasi ke salaka nde nzala kuvanda na ntoto? Biblia ke tuba nde Yehowa, d Muntu Yina Me Salaka beto, ta sala nki sambu na kumanisa bampasi yina?

Mpasi: Baluyalu kele ve ti makuki ya kumanisa kinsukami mpi mambu ya mbi yina ke sala nde bantu kufwa na nzala.

Kima ya ta manisa yo: Kimfumu ya Nzambi ta baka kisika ya baluyalu yonso ya bantu. Yo kele Kimfumu mosi ya kukuka. (Daniele 2:44; Matayo 6:10) Bubu yai, bansukami mingi ke kukaka ve kuzwa madia ya kufwana. Kansi na Kimfumu ya Nzambi, diambu yai ta mana. Biblia ke tuba sambu na Yezu Kristu yina kele Ntotila ya Kimfumu ya Nzambi nde: “Yandi ta gulusa nsukami yina ke dila sambu na kulomba lusadisu, mpi muntu ya kukonda mfunu ti konso muntu yina me konda nsadisi. . . . Mbuma ta vanda mingi kibeni na ntoto; yo ta fuluka na nsongi ya bangumba.”—Nkunga 72:12, 16.

Mpasi: Bitumba ke bebisaka bima mpi ke salaka nde mbongo kukuma mpasi. Diambu yai ke sala nde yo kumina bantu mpasi na kuzwa madia yina bo kele na yo mfunu.

Kima ya ta manisa yo: “[Yehowa] ke sukisa bitumba na ntoto ya mvimba. Yandi ke buka munduki ya tolo-tolo mpi dikonga; Yandi ke yoka bapusu-pusu ya basoda na tiya.” (Nkunga 46:9) Yehowa ta bebisa minduki ya bitumba mpi bantu yina ke salaka nde bitumba kusalama. Yo ta sala nde konso muntu kuzwa bima ya kudia kukonda mavwanga mpi kukonda mpasi. Biblia ke tuba nde: “Muntu ya lunungu ta yela bonso matiti ya mpa, mpi ngemba ta kuma mingi.”—Nkunga 72:7.

Mpasi: Mipepe, bamvula ti bantangu ya ngolo mpi bisumbula ya lugangu ke bebisa bima mpi ke fwa bitwisi.

Kima ya ta manisa yo: Nzambi ta yala bangolo ya lugangu, yandi ta sala na mpila nde mambu kuvanda mbote sambu bima kuyela. Biblia ke tuba nde: “[Yehowa] ke lembika mupepe ya ngolo; ebuna bitembo ya nzadi-mungwa ke kuma pima. . . . Yandi ke kumisaka ntoto ya zelo na zelo mazanga ya masa ya me fuluka ti balukengi, mpi ke kumisaka ntoto ya kuyuma ba-ntoto ya masa. Yandi ke sala nde bantu yina kele na nzala kuzinga kuna . . . Bo ke kuna bilanga mpi bilanga ya vinu yina ke buta bambuma mingi.”—Nkunga 107:29, 35-37.

Mpasi: Bantu ya bwimi mpi ya mbi ke salaka madia yina kele ve mbote na kudia to bo ke kangaka bima ya kudia sambu yo kumina ve bantu yina kele na mfunu na yo.

Kima ya ta manisa yo: Kimfumu ya Nzambi ta fwa bantu yonso ya me konda masonga mpi ya mbi. (Nkunga 37:10, 11; Yezaya 61:8) Biblia ke tubaka nde Yehowa Nzambi kele “Muntu yina ke zengaka na lunungu mambu ya bantu yina bo me kusaka, Muntu yina ke pesaka dimpa na bantu yina kele na nzala.”—Nkunga 146:7.

Mpasi: Bantu ke bebisaka to ke vidisaka madia mingi (1/3) konso mvula.

Kima ya ta manisa yo: Ntangu Kimfumu ya Nzambi ta baka mambu na maboko, bantu ta bebisaka ve madia ata fioti. Ntangu Yezu vandaka na ntoto, yandi salaka yonso sambu bantu kubebisa ve madia. Mu mbandu kilumbu mosi, yandi disaka na mutindu ya kuyituka kimvuka mosi ya bantu kuluta 5000. Na nima, yandi songaka balongoki na yandi nde: “Beno vukisa bitini yina me bikala, sambu ata kima mosi ve kubeba.”—Yoane 6:5-13.

Kimfumu ya Nzambi ta katula bampasi yonso ya ke nataka nzala. Ebuna bantu yonso ta zwa madia ya mingi mpi ya mbote. (Yezaya 25:6) Sambu na kuzaba inki ntangu Kimfumu ya Nzambi ta sala mambu yai, tala disolo “Inki Ntangu Kimfumu ya Nzambi Ta Yala Ntoto?”

a Manaka Sambu na Kuyidika Mambu tii na 2030 ya Bansi Yonso ya Kele na Nations Unies Ndimaka na 2015 (Le Programme de développement durable à l’horizon 2030, adopté par tous les États membres des Nations Unies en 2015).

b Rapore yina Kimvuka ya Nations Unies ya Ke Talaka Mambu ya Kupesa Madia mpi Kisalu ya Bilanga salaka (Organisation des Nations Unies pour l’alimentation et l’agriculture), Mbongo Yina Ke Sadisaka Bansi Yonso na Kutomisa Mambu ya Bilanga (Fonds international de développement agricole), Mbongo Yina Bansi Nations Unies Me Tulaka Sambu na Bana (Fonds des Nations Unies pour l’enfance), Manaka Nations Unies Sambu na Kupesa Bantu Yonso na Ntoto Madia (Programme alimentaire mondial des Nations Unies), mpi Kimvuka ya Ke Talaka Mambu ya Sante na Ntoto ya Mvimba (Organisation Mondiale de la Santé).

c Sambu na kuzaba mambu mingi na yina me tala bantu iya ya ke tambusa bampunda yina mukanda ya Kusonga ke tubila, tala disolo “Bantu Iya ya Ke Tambusa Bampunda—Bo Kele Banani”

d Yehowa kele zina ya Nzambi. (Nkunga 83:18) Tala disolo “Yehowa Kele Nani?”