Na nsi-ntoto ya mvimba, bansi mingi kele ya kukabwana na mambu ya politiki. Na 2022 kimvuka mosi (Pew Research Center) yulaka dibanza ya bantu na diambu yango: “Bantu ya kuyela 65 na kati ya nkama (65%) ya bansi 19 tubaka nde kukonda kuwakana kele ya ngolo to ya ngolo kibeni na bansi na bo na kati ya bantu yina kele na bimvuka ya politiki ya kuswaswana.”

 Keti nge ke mona mpi nde bantu yina ke zingaka kisika nge kele ke landa kukabwana sambu na mambu ya politiki? Sambu na nki? Keti kima ya kusala kele? Tadila mambu yina Biblia ke tuba.

 Biblia tubaka na ntwala nde, na ntangu na beto yai ya Biblia ke bingaka “bilumbu ya nsuka,” bantu mingi ta vanda ti bikalulu yina ta sala nde bo kuka ve ata fioti kuzinga na bumosi.

•   “Na bilumbu ya nsuka bantangu ya mpasi mpi ya nku ta vanda. Sambu bantu ta vanda bantu ya ke kudizolaka, . . . bantu ya ke zolaka ve kuwakana.”—2 Timoteo 3:1-3.

 Ata bantu mingi ke sala ngolo sambu mambu yina baluyalu ke sala kununga, yo ke salama kaka ve. Bantu yina kele ve ti ngindu mosi ke monaka nde yo kele mpasi to nkutu nde, bo lenda sala ve na kimvuka ti bantu ya nkaka sambu na kumanisa bampasi. Mambu ya ke salama ke monisa nde mambu yina Biblia tubaka dezia bamvula mingi me luta kele ya masonga.

•   “Muntu me yalaka muntu sambu na kupesa yandi mpasi.”—Longi 8:9.

 Kansi, Biblia ke monisa mutindu yo ta mana. Luyalu yina muntu mosi ta twadisa ta katula mambu yina ke salaka nde bantu kumona mpasi bubu.

 Biblia ke tubilaka zina ya ntwadisi yina mosi mpamba ya me fwana: Yezu Kristu. Yezu kele ti ngolo, kiyeka mpi mpusa ya kuvukisa bantu yonso mpi kusala nde bo zinga na ngemba.

•   “Na bilumbu na yandi muntu ya lunungu ta yela bonso matiti ya mpa, mpi ngemba ta kuma mingi.”—Nkunga 72:7.

•   “Makanda yonso ta sadila yandi.”—Nkunga 72:11.

 Yezu kele ntwadisi ya me fwana sambu yandi ke tudilaka bantu dikebi mpi ke zolaka kusadisa bo, mingi-mingi bantu yina bo sadilaka mambu ya mbi.

•   “Yandi ta gulusa nsukami yina ke dila sambu na kulomba lusadisu, mpi muntu ya kukonda mfunu ti konso muntu yina me konda nsadisi. Yandi ta wila muntu ya kukonda mfunu mpi nsukami mawa, mpi yandi ta gulusa luzingu ya bansukami. Yandi ta gulusa bo na bampasi mpi na mubulu.”—Nkunga 72:12-14.

 Sosa kuzaba mambu mingi na yina me tala Kimfumu ya Nzambi yina kele luyalu ya zulu ya Yezu ke twadisa. Sosa kuzaba mutindu nge lenda baka mambote ya luyalu yina mpi mutindu nge lenda pesa yo maboko.

•   Tala video Kimfumu ya Nzambi Kele Nki?

•   Tanga disolo “Kimfumu ya Nzambi—Luyalu Mosi ya Ta Vanda Ve ti Mambu ya Mbi.”