DAVID MAZA | DISOLO YA LUZINGU
Dibuta ya Kiese Me Kutana ti Bampasi ya Ngolo Kansi Bo Me Vutukila Kiese na Bo
Sambu mono longukaka Biblia mpi yantikaka kusadila minsiku na yo na luzingu na mono, nsuka-nsuka mono kumaka ti luzingu ya dibuta ya kiese; mono vandaka kuyindula ntete nde mono lenda zwa yo ve ata fioti. Mono ti nkento na mono, mpi bana na beto tatu vandaka na bumosi mpi beto vandaka kusadila Yehowa na ntima ya mvimba.
Beto vandaka ve ya kuyilama na diambu ya mpasi kibeni yina salamaka na le 24 avril 2004.
Ntangu nkento na mono, Kaye, butaka mwana na beto ya nkento, Lauren, mono vandaka kuzaba ve mutindu ya kuvanda papa ya mbote. Ntangu mwana na beto ya zole Michael butukaka, mono vandaka kaka kuzaba ve mutindu ya kuvanda papa ya mbote. Ntango mono vandaka kuyela, bibuti na mono vandaka kuswana ntangu yonso mpi nsuka-nsuka bo fwaka makwela na bo. Ata mono vandaka kuzola kuvanda mfumu ya mbote ya dibuta, mono zabaka ve nki mono fwete sala.
Mambu bebaka sambu ntangu mono kumaka ti bamvula kumi ti ndambu, mono kumaka mpika ya malafu mpi ya bima yina ke lausaka. Ntangu mono kumaka mbuta, mono vandaka kukuka ve kutwadisa luzingu na mono. Mono vandaka mpika ya bima ya ke lausaka, ya malafu, mpi ya bansaka ya mbongo, ebuna yo pusaka mono na kubaka balukanu ya mbi. Mambu bebaka mpenza yo yina Kaye tinaka mono mpi kwendaka ti bana na beto zole. Mono lembaka mpenza nitu.
Mono yulaka Kaye kana mono fwete sala nki sambu yandi kwisa kuvutuka. Yandi vandaka deja kulonguka Biblia ti Gloria; Gloria vandaka Mbangi ya Yehowa; yo yina yandi songaka mono kaka nde: “Longuka Biblia.” Mono vandaka kuzaba ve kana yo ke tendula inki mpi mono vandaka kusepela ve na kulonguka Biblia kansi sambu mono vandaka kuzola nde Kaye kukwisa kuvutuka na nzo, mono ndimaka kukutana ti Gloria mpi bakala na yandi Bill.
Disolo Yina Sobaka Luzingu na Mono
Ntangu Bill ti Gloria kumaka na nzo na beto, kinduku na bo yitukisaka mono mingi kibeni. Bo songaka mono nde bana na bo yina me kumaka bambuta, yina mono vandaka mvula kiteso mosi ti bo, vandaka kusadila luzingu na bo na mutindu ya mbote. Sambu na mbala ya ntete, mono yantikaka kuyindula nde Biblia lenda longa beto mutindu ya kuvanda ti dibuta ya kiese.
Na viziti yina, Bill na Gloria tubilaka mono mambu ya mono vandaka kukutana ti yo. Bo songaka mono mambu yai ya Biblia ke tuba na Bagalatia 6:7: “Konso kima yina muntu ke kuna, yandi ta katula yo mpi.” Mono kuditubilaka nde, ‘Kana mono vandaka kusadila munsiku yai na luzingu na mono, mono zolaka kutina bampasi mingi!’
Kaye na David
Na nima, mono bakisaka nde kusadila minsiku ya Biblia tomisaka luzingu na mono mingi. Mono ti Kaye, beto yambulaka kunwa makaya, mpi mono bikisaka kusadila bima ya nkaka yina mono vandaka mpika na yo. Na 1985, ntangu beto butaka mwana na beto ya tatu, David, yina beto pesaka surnom ya Davey—mono monaka nde mono zabaka mutindu ya kuvanda papa ya mbote.
Beto Yonso Ke Sadila Yehowa
Mono ti Kaye beto monaka nde kulonga bana na beto na kuzola Yehowa sadisaka beto mpi na kukuma banduku na yandi ya ngolo. Beto longukaka mambu mingi na mikanda bonso Longuka na Longi ya Nene! Diaka, mabuta yina vandaka na dibundu na beto vandaka bambandu ya mbote sambu na beto mpi sambu na bana na beto.
Michael ti nkento na yandi, Diana
Na nima, bana na beto yonso kumaka bapasudi-nzila. Na luyantiku ya mvu 2004, Lauren vandaka na dibundu ya Ki-espagnole. Michael katukaka kubasika na Betele sambu na kukwenda kukwela; na nima yandi ti nkento na yandi, Diana, yilamaka sambu na kukwenda kulonga nsangu ya mbote na Guam. Davey, yina vandaka ti bamvula 19, yantikaka ntama mingi ve kusala na République dominicaine.
Mono ti Kaye, beto vandaka na kiese sambu na balukanu yina bana na beto bakaka. Beto vandaka kumona bonso nde mambu yina 3 Yoane 4 ke tubaka ke lungana sambu na beto. Yo ke tuba nde: “Kiese ya mingi yina mono kele na yo, yo yai: mono wa nde bana na mono ke landa kutambula na kieleka.” Beto zabaka ve nde appel mosi ya telefone zolaka kusoba luzingu na beto.
Diambu Mosi ya Mpasi
Na le 24 avril 2004, mono ti Kaye, beto kwendaka kudia na restaurant mosi ti bampangi zole ya nkaka mpi bankento na bo. Sambu restaurant vandaka na kitamina ya bakilometre kuluta 100 ti kisika beto vandaka, beto sambanu kwendaka kuna na kamio na mono. Na nima, mono bikisaka bo na restaurant ya nkaka mpi mono kwendaka kusosa kisika ya kutula kamio. Bo bingaka mono na telefone. Yo vandaka nduku mosi, mpi ndinga na yandi vandaka ya mawa.
Yandi tubaka nde: “Diambu mosi ya mpasi me salama. Davey me sala aksida.”
Mono yulaka yandi nde: “Yandi me lwala ngolo?” Mono vandaka kuwa boma ya mvutu yina yandi ta pesa mono.
Na luyantiku, yandi vandaka kukuka ve kusonga mono. Na nima, ti badute, yandi songaka mono nde Davey me fwa.
Na nima ya kutulula telefone, mono sambaka Yehowa sambu yandi pesa mono ngolo. Na nima, mono kotaka na restaurant mpi songaka bampangi nde mono ke kudiwa ve mbote mpi nde yo ta vanda mbote nde beto vutuka. Mono vandaka kuzola kupesa Kaye nsangu ya lufwa ya Davey ntangu beto ta vanda kaka beto mosi.
Kunata kamio miniti 90 sambu na kuvutuka na nzo vandaka mpasi mingi sambu na mono. Mono vandaka kuwa Kaye ke solula na kiese yonso ti bampangi mutindu yandi vandaka kuvingila na kiese ntangu Davey ta kwisa kutala beto. Na ntangu yina, na ntwala nde Kaye kuzaba nkutu nde mwana na beto me fwa, bantu vandaka kutindila mono na telefone ba message ya kukatula beto mawa.
Na nima ya kubikisa bampangi yina na banzo na bo, beto vutukaka na nzo na beto. Kaye talaka mono mpi bakisaka nde diambu mosi ya mbi me salama. Yandi yulaka mono nde, “Inki me salama?” Mono zabaka nde mambu ya mono ta tuba ta bebisa luzingu ya Kaye, kaka mutindu appel ya telefone yina mono yambaka kiteso ya bangunga zole me luta bebisaka luzingu na mono.
Kukanga Ntima na Lufwa ya Mwana na Beto
Mono ti Kaye, beto kutanaka ti bampasi na ntwala; beto zabaka mpi nde Yehowa ke sadisaka bansadi na yandi. (Yezaya 41:10, 13) Kansi mpasi yai vandaka ya kuswaswana kibeni. Mono landaka kuditubila nde, ‘Inki mutindu diambu ya mutindu yayi lenda kumina Davey, yandi muntu me salaka mingi sambu na Yehowa? Sambu na nki Yehowa taninaka yandi ve?’
Bana na beto mpi kumaka kisaka-saka. Lauren vandaka kuzola Davey bonso mwana na yandi, yo yina lufwa yai salaka yandi mpasi mingi kibeni. Michael lembaka mpenza nitu. Ata Michael vandaka kuzinga diaka ve kisika mosi ti beto banda bamvula kiteso ya tanu, na ntwala ya lufwa ya Davey, yandi katukaka kubakisa ntama ve mutindu leke na yandi yelaka na kimpeve.
Katuka na luyantiku, bampangi ya dibundu yantikaka kusadisa beto. Mu mbandu, na ntwala nde Kaye kundima nde Davey me fwa, bampangi vandaka kukwisa na nzo sambu na kupesa beto kikesa mpi kusadisa beto. (Bingana 17:17) Mono ta vilaka ve zola yina bo monisilaka beto!
Sambu na kunwana ti mawa na beto, mono ti Kaye, beto yambulaka ve kikalulu na beto ya kusamba, ya kulonguka Biblia, mpi ya kukwenda na balukutakanu ya Bukristu mbala na mbala. Mambu yai manisaka ve mpasi na beto. Kansi beto zabaka nde yo vandaka mfunu nde beto landa kusala mambu yina ta sadisa beto na kuvanda ti kinduku ya ngolo ti Yehowa.—Bafilipi 3:16.
Lauren ti bakala na yandi, Justin
Na ntangu yina, Michael na Diana kwisaka kuzinga pene-pene ti beto, mpi Lauren vutukaka na dibundu na beto ya Anglais. Kuvanda kisika mosi ti bo na bamvula yina landaka sadisaka beto na kuyantika kudiwa mbote. Na nima, ntangu Lauren balaka, bakala na yandi, Justin, sadisaka mpi dibuta na beto mingi.
Voyage ya Mpasi
Ntangu fioti na nima ya lufwa ya Davey, kele ti diambu ya nkaka ya mpasi ya beto salaka ntangu mwana na beto fwaka, kansi diambu yango sadisaka beto mingi. Kaye ta ta disolo yango.
“Ntangu bakala na mono songaka mono nde Davey me fwa, mono vandaka diaka ve ti kivuvu mpi nzala ya kuzinga manaka, ebuna mono bikalaka mpidina na nsungi ya nda. Mono vandaka ti mawa ya mingi kibeni yo yina mono vandaka kukuka ve kusala ata mambu ya pete na luzingu. Mono vandaka kudila ntangu yonso. Na kutuba ya masonga, bantangu ya nkaka mono vandaka kuwila Yehowa mpi bantu yonso yina vandaka na luzingu makasi. Mono vandaka diaka ve kutadila mambu na mutindu ya mbote.
“Mono vandaka kuzola kukwenda na République dominicaine. Mono vandaka kuzola kuvanda kisika Davey zingaka mpi sadilaka Yehowa na bangonda ya nsuka ya luzingu na yandi. Diaka, mono vandaka ya kulemba, mpi mono vandaka ve ti ngolo ya kusala voyage yina.
“Nduku mosi ya ngolo sadisaka mono ntangu yandi songaka mono nde banduku ya Davey ya République dominicaine kele mpi na mawa, mpi nde bo ke zola kukutana ti dibuta ya Davey. Lusadisu na bo pesaka mono ngolo ya kumata na avion.
“Voyage yina dibuta na beto salaka vandaka mfunu mpenza. Yo sadisaka beto na kubakisa nde Davey vandaka kutula lusambu ya Yehowa na kisika ya ntete. Dibundu yina Davey vandaka, vandaka ti nkuluntu mosi mpamba; nkuluntu yango tubaka nde yandi vandaka kundima nde Davey ta lungisa mukumba yonso yina bo ta pesa yandi.
“Ntangu beto vandaka kutambula na bala-bala yina Davey vandaka kuzinga, bantu vandaka kukwisa kusonga beto mambu ya mbote yina Davey sadilaka bo. Mono vandaka kuzaba nde yandi vandaka muntu ya mbote, kansi mambu yai sadisaka mono na kubakisa mbote mutindu yandi vandaka kusala ngolo na kulanda mbandu ya Yezu.
Davey ntangu yandi vandaka kusala na République dominicaine
“Beto kutanaka mpi ti bantu yina Davey vandaka kulonguka Biblia ti bo; kele ti bakala mosi yina vandaka kuzinga na nzo mosi ya fioti mpi yandi vandaka kukulumuka ve na mbeto na yandi sambu na maladi. Bakala yina vandaka nsukami ya ngolo, kansi bampangi ya dibundu songaka beto nde Davey vandaka kupesa yandi lukumu mpi kuzitisa yandi na masonga yonso. Yo pusaka mono na kuwa kiese sambu na yandi!
“Voyage yai vandaka voyage ya kuluta mpasi na ba voyage yonso. Kansi, yo sadisaka beto na kudila ti bantu yina vandaka na mawa sambu na lufwa ya Davey mpi na kutubila kivuvu na beto sambu na bilumbu ke kwisa. Yo monanaka nde yo sadisaka beto na kudiwa mbote.”
Mbandu ya Davey Me Pesa Mono Kikesa
Nimero ya zulunalu Telama! ya le 8 janvier 2005, vandaka ti disolo mosi yina vandaka kutubila lufwa ya Davey mpi kisalu yina yandi salaka na République dominicaine. Na ntangu yina, dibuta na beto zabaka ve mutindu disolo yina zolaka kusadisa bantu mingi yina ta tanga yo. Mu mbandu, na mai 2019, mpangi mosi, zina na yandi Nick, bingaka beto mpi songaka beto mambu yai:
“Na nsuka ya mvu 2004, mono vandaka na nzo-nkanda mpi mono vandaka ve ti balukanu ya kimpeve. Mono vandaka ve na kiese. Mono sambaka Yehowa sambu na kulomba yandi na kusadisa mono na kusadila kileke na mono na mutindu ya mbote. Ntangu fioti na nima, mono tangaka disolo ya Telama! yina vandaka kutubila luzingu ya Davey. Yo vandaka mvutu na kisambu na mono!
“Mono yambulaka nzo-nkanda mpi yantikaka kisalu ya kimupasudi-nzila. Mono kuditudilaka mpi lukanu ya kulonguka Ki-espagnole mpi ya kukwenda na insi ya banzenza. Na nima, mono kwendaka kusala na Nicaragua mpi kotala Nzo-Nkanda ya Bansamuni ya Kimfumu ti nkento na mono. Ntangu bantu ke yulaka mono nki pusaka mono na kukuma mupasudi-nzila, mono ke songaka bo disolo ya Davey.”
Beto kutanaka ti kima ya nkaka yina yitukisaka beto ntangu beto kutanaka ti mpangi-nkento mosi, zina na yandi Abi. Bo pesaka mpangi yina mukumba ya kusala na hotele na beto ntangu beto kwendaka na Lukutakanu ya Bansi Mingi ya 2019 na Buenos Aires, na Argentine. Beto sepelaka mingi na ntima ya mbote mpi zola na yandi. Mono ti Kaye, beto monaka nde yandi kele ti bikalulu ya mutindu mosi ti Davey.
Mbandu ya Davey pusaka Abi na kuyantika kusala bonso mupasudi-nzila mpi na kukwenda na teritware yina kele ntama kibeni
Ntangu beto vutukaka na shambre na beto na hotele, beto tindilaka Abi lien ya disolo ya Telama! yina ke tubila luzingu ya Davey. Miniti fioti na nima, yandi sonikilaka beto. Yandi vandaka ti nzala ya ngolo ya kusolula ti beto, yo yina beto kwendaka kukutana ti yandi na reception. Abi vandaka kudila, mpi yandi songaka beto nde kima sadisaka yandi na kukuma mupasudi-nzila na septembre 2011 mpi na kukwenda kusala na teritware mosi ya ntama kele disolo ya Davey. Yandi tubaka nde: “Konso ntangu kana mono me kutana ti bampasi na kisalu na mono, mono ke tangaka diaka disolo yina.” Yandi vandaka nkutu ti kopi mosi ya disolo yango!
Masolo bonso yai ke monisa nde beto kele na dibuta ya ntoto ya mvimba. Ata kimvuka mosi ve kele na bumosi ya me fwanana ti yina bansadi ya Yehowa kele na yo!
Mono ti Kaye beto bakaka kikesa na kuwa nde disolo ya Davey pesaka bantu mingi kikesa. Ya kieleka, diambu yai kele masonga sambu na baleke na beto yonso yina ke kudipesaka na kisalu ya Yehowa. Mbala ya nkaka, na mitindu yina bo me zaba ve, kikesa na bo ke sadisaka bantu yina ke monaka yo, mpi na mbandu na bo, bo ke pusaka bantu ya nkaka na kusadila Yehowa na kiteso ya me fwana.
“Na Meso na Yandi Bo Yonso Kele na Luzingu”
Na Luka 20:37, Yezu ke vutukila mambu ya Yehowa tubaka ntangu yandi kudibingaka “Nzambi ya Abrahami, Nzambi ya Izaki, mpi Nzambi ya Yakobi.” Yehowa tubaka ve nde yandi vandaka Nzambi na bo kaka ntangu bo vandaka na luzingu kansi yandi kele kaka Nzambi na bo! Sambu na nki? Yezu ke pesa mvutu na verse 38, yandi ke tuba nde: “Na meso na yandi bo yonso kele na luzingu.”
Na meso ya Yehowa, bansadi na yandi yonso ya kwikama kele na luzingu; yo ke monisa nde yandi kele kibeni ti lukanu ya kufutumuna bo! (Yobi 14:15; Yoane 5:28, 29) Mono ke ndima nde Yehowa ke yindulaka mutindu yai sambu na Davey, mpi sambu na bansadi na yandi yonso ya nkaka yina me fwaka.
Mono kele ti nzala ya kumona diaka Davey, kansi kele ti kima mosi ya mono ke zola mingi kuluta: mono ke zola nde yandi kutana diaka ti Kaye. Mono me monaka ntete ve muntu ya kele na mpasi ya mingi bonso Kaye. Mambu ya Luka 7:15 ke tubaka kele mfunu mingi sambu na mono: “Ebuna muntu yina fwaka telamaka mpi yantikaka kutuba, mpi Yezu pesaka yandi na mama na yandi.”
Na septembre 2005, mono kumaka mupasudi-nzila bonso Kaye. Yo kele kiese mingi na kusala kisalu ya kimupasudi-nzila ti nkento na mono, bana na beto, mpi bankento na bo. Sambu beto kele na bumosi, beto ke sadisanaka mpi ke landaka kutula dikebi na kivuvu ya beto kele na yo ya kuzinga na nsi-ntoto ya mpa; kuna beto ta kutana diaka ti Davey ya beto vandaka kuzola mingi.