Na août 1967, kilumbu mosi ntangu mono vandaka ti bangonda 18, mambu lutaka mbote mpi na nima mono belaka fievre. Kilumbu yina landaka, ntangu mono telamaka makulu na mono vandaka ya kulemba. Ba ekzame ya kimunganga ya bo salaka mono na opital na bwala Freetown, na Sierra Leone, kisika mono vandaka kuzinga, monisaka nde mono belaka buka-buka; yo kele maladi ya ngolo yina ke kumisaka bantu bikata, mpi bantu ke belaka yo mingi kele bana yina me lungisa ntete ve bamvula tanu. Lusansu ya bo ke bingaka physioterapie yina bo pesaka mono kumisaka ve makulu na mono ngolo. Malembe-malembe, yo lembaka ngolo yo yina mono lendaka diaka ve kutambula to kutelama. Papa vandaka kutuba mbala na mbala nde mono vandaka “mwana ya ndambu” sambu mono vandaka ti kifu na nitu. Sambu mono kumaka kaka kukomfula, mono vandaka kumona nde mono kele ve na mfunu ata fioti.

 Mono vandaka kuzinga na lupangu mosi ti mama na mono mpi mabuta ya nkaka yina vandaka bansukami ya ngolo. Ata bantu vandaka kuzola mono, mono vandaka kuvingila nde papa kuzola mono kansi yandi vandaka kusala yo ve. Bantu ya nkaka vandaka kuyindula nde maladi na mono vandaka ve ya normale kansi yo katukaka na kindoki. Bankaka songaka mama nde yandi kwendaka kubikisa mono na porte ya kisika yina bo ke kebaka bana yina kele ti bifu na nitu. Sambu na bo, kusala mutindu yina zolaka kukatula yandi kizitu ya kukeba mono. Mama buyaka dibanza na bo mpi vandaka kusala ngolo na kukeba mono.

 Sambu mno lendaka ve kutambula to kutelama, mono vandaka kukomfula. Kansi kudibenda na ntoto mpi na bisika ya nkaka vandaka kulwadisa mono. Sambu na kutanina nitu na mono, mono vandaka kulwata bilele ya kele ti musuni ya nene. Sambu na kutanina maboko na mono, mono vandaka kulwata bilele na maboko sambu yo sala bonso ba gants. Na nima, mono zwaka mabaya yina kele ti forme ya U mpi yo vandaka kutanina maboko na mono mbote. Sambu na kukwenda na ntwala, mono vandaka kutandula maboko, kutula mabaya yina na ntoto, mpi kubenda kilo na mono na ntwala. Na nima, kubenda makulu na mono na ndambu yina, na kubendaka mukongo. Na nima ya kusala “kitambi” mosi, mono vandaka kutandula diaka maboko sambu na kitambi ya me landa ya mpasi diaka. Yo vandaka kutula kizitu ya nene na maboko mpi mapeka na mono. Kutambula mutindu yina vandaka kulomba ngolo mingi kibeni yo yina mono vandaka kubasika mpenza ve na lupangu na beto. Mono vandaka kukuka ve kukwenda na nzo-nkanda to kusakana ti bana ya nkaka. Mono vandaka kudiyula kana mono ta zinga nki mutindu kana mama kufwa.

 Mono sambaka Nzambi mpi lombaka yandi na kusadisa mono mpi nde yandi bika ve mono kuma muntu ya ke lombaka bima. Mono vandaka kuyindula nde kana mono kele pene-pene ti yandi mpi ke sadila yandi na mutindu ya mbote, yandi ta lungisa bampusa na mono. Yo yina, kilumbu mosi na 1981, ata yo vandaka mpasi mingi, mono basikaka na lupangu sambu na kukwenda na nzo-nzambi yina vandaka na bala-bala na beto. Mono vandaka kusepela ve ti mutindu bantu vandaka kutala mono. Pasteur yambaka mono ve, mpi yandi nganinaka mama sambu mono vandaka na banc yina bantu ya nkaka sumbaka. Mono bakaka lukanu ya kuvutuka diaka ve kuna.

 Kilumbu mosi na suka na 1984, ntangu mono vandaka ti bamvula 18, mono mataka na escalier sambu na kuvanda kisika mono vandaka kuvanda konso kilumbu na fenetre. Yina kisika mono vandaka kutala mambu yina ke salama na nganda. Kansi na nima, mono bakaka lukanu ya kukulumuka mpi kubasika na nganda, na kisika mosi yina ke vandaka mpamba mbala mingi. Ntangu mono kumaka kuna, mono kutanaka ti babakala zole yina vandaka kulonga nsangu nzo na nzo. Bo songaka mono luzingu ya kitoko na bilumbu ke kwisa ntangu luzingu na mono ta soba. Bo tangaka Yezaya 33:24 mpi Kusonga 21:3, 4. Na nima, bo pesaka mono kamukanda ya ba couleur mingi; zina na yo Vivez éternellement heureux sur la terre!, bo tubaka nde bo ta kwisa kuvutuka sambu na kulonga mono mambu mingi.

 Na mbala ya zole ya bo kwisaka, bo songaka mono nde bo ta nata misionere mosi yina me katuka kukwisa, zina na yandi Pauline, mpi mono ta fula masolo ti yandi. Bo salaka mpidina, ebuna kinduku na mono ti Pauline kumaka bonso kinduku ya mama ti mwana na yandi. Mama siamisaka mono na kulonguka Biblia ti “mama na mono ya mpa,” disongidila mpangi Pauline. Mpangi Pauline vandaka kumonisa kikalulu ya zola ya kuditambika, ntima ya nda, ntima ya mbote, mpi kutudila mono dikebi, yandi vandaka ntangu yonso kusosa kuzaba kana mono kele mbote. Yandi longaka mono na kutanga. Na nsadisa ya mukanda Mukanda ya Bankenda ya Bible, yandi sadisaka mono na zola yonso na kuzaba Tata ya zola yina mono vandaka kusosa.

 Mambu ya mono longukaka na Biblia pesaka mono kiese mingi. Kilumbu mosi, mono yulaka Pauline kana mono lenda kwenda na lukutakanu ya Bambangi ya Yehowa yina bo vandaka kubinga Kulonguka ya Mukanda ya Dibundu. a Bo vandaka kusala yo na nzo ya Mbangi ya Yehowa mosi pene-pene ya kisika mono vandaka kuzinga. Pauline ndimaka. Na Kizole yina landaka, yandi kwisaka, vingilaka sambu mono yobila mpi kulwata sambu beto kwenda kuna nzila mosi. Muntu mosi tubaka nde mono fwete songa Pauline yandi futila mono taxi, kansi mono tubaka nde, “Mono ta kwenda kuna na mabaya ya ke sadisaka mono na kutambula.”

 Ntangu lere ya kukwenda lungaka, mama ti bantu ya kartie vandaka kutala mono mpi kudiyangisa sambu na mono. Ntangu mono vandaka kuluta na kibansala, bantu ya nkaka ya kartie tubilaka Pauline na ndinga ya ngolo nde, “Nge ke pusa yandi na ngolo!”

 Pauline yulaka mono na mawete nde, “Jay, nge ke zola kukwisa?” Yo vandaka ntangu ya kumonisa nde mono ke tudilaka Yehowa ntima. (Bingana 3:5, 6) Mono vutulaka nde, “Ee, yo kele lukanu na mono.” Bantu ya kartie vandaka kutala na pima mpi bo sobaka bangindu ntangu mono pusanaka pene-pene ya porte. Ntangu mono vandaka kubasika na lupangu, bo yonso yantikaka kusikisa mono.

 Mono sepelaka mingi ti lukutakanu yina! Yo bwisaka mono ntima mingi! Bantu yonso yambaka mono mbote. Muntu mosi ve monaka mono nde mono me konda mfunu. Mono kudiwaka mbote mpenza. Yo yina, mono kumaka kukwenda mbala na mbala. Ntangu fioti na nima, mono yulaka kana mono lenda kwenda mpi na balukutakanu ya nene yina bo vandaka kusala na Nzo ya Kimfumu ya Bambangi ya Yehowa. Mono vandaka nsukami, mpi mono vandaka kaka ti bilele zole ya mono fwete pona mpi lele ya mono vandaka kulwata bonso ba gants. Ata mpidina, mono vandaka kundima nde bansadi ya Nzambi ta mona mono ve mpamba. Ya kieleka, bo yambaka mono.

 Kukwenda na Nzo ya Kimfumu vandaka kutendula “kutambula tii na nsuka ya bala-bala, kubaka taxi sambu na kukwenda na nsuka ya kamwa ngumba kisika Nzo ya Kimfumu vandaka. Na nima, bampangi vandaka kunangula mono na maboko sambu na kukotisa mono na kati.

 Sambu mono bakisaka nde mono me mona bumbote ya Yehowa, mono vandaka kuzola kubumbana na yandi. Mono bakaka lukanu ya kukwenda mbala na mbala. (Nkunga 34:8) Na nsungi ya mvula, mbala mingi mono vandaka kukuma mono me pola mvula mpi ti poto-poto, mpi mono vandaka kusoba bilele na Nzo ya Kimfumu, kansi yo vandaka kulomba kusala kibansa yina!

 Annuaire de Temoins de Jéhovah 1985 tubilaka disolo na mono. Na nima ya kutanga disolo na mono na Annaire, Josette, Mbangi ya Yehowa mosi ya nkento na Suisse, bakaka lukanu ya kutindila mono velo ya bikata ya bo ke pedalaka na maboko; yo vandaka ti bima ya kutanina mono na poto-poto mpi bamwinda na nima. Na nima, mono lendaka kutambula ti lukumu. Baleke vandaka kusepela ti yo mpi kutuba mutindu bo ke sepela kumona mono, mono ke nata velo na mono ya kitoko. Mono vandaka kukomfula diaka ve na ntoto, mono kumaka kudimona bonso nkento ya ntotila mpi muntu ya bo ke zitisa kansi ve ya bo ke menga.

 Yo vandaka pete sambu mono yela sambu mono vandaka deja ti luzingu ya pete mpi bikalulu ya mbote. Velo na mono sadisaka mono na kusala kisalu ya kulonguka, mpi na le 09 août 1986, mono bakaka mbotika. Mbotika sobaka luzingu na mono, yo kumaka mbote kuluta mutindu yina mono lendaka kuyindula. Mono kumaka na kiese ya kati, kudimona mfunu mpi kuditudila ntima sambu mono kumaka ti Tata yina ke zolaka mono mpi vandaka ti kumosi ti bantu yina ke keba mono na masonga yonso.

 Ntangu mono yindulaka mutindu Yehowa futaka mono, mono yindula nde mono lenda kuma mupasudi-nzila ya ntangu yonso kansi mono vandaka kundima ve nde mono ta kuka kusala yo. (Nkunga 116:12) Mono sambaka sambu na yo mpi bakaka lukanu ya kumeka. Mono kumaka mupasudi-nzila ya nene na le 01 janvier 1988, mpi mono me yambula ve kisalu yina tii bubu. Yo kele lusakumunu ya nene sambu na mono! Mono kele ti bampangi ya babakala mpi ya bankento ya ke zolaka mono yina ke sadisaka mono na kulungisa bangunga ya konso ngonda. Mono me monaka mpi mutindu Yehowa me sadisaka mono na nzila ya mpeve santu na yandi.—Nkunga 89:21.

 Ntangu mono kumaka mupasudi-nzila, mono vandaka kutambula na kikesa, mpi yo vandaka kusadisa makulu na mono, ata yo kele kaka ya kulemba. Na nima ya mwa ntangu, mono kwendaka na hopital mosi ya mpa, mono vandaka kutula ntima ya kubaka lusansu ya physioterapie mpi programe ya ngalasisi. Kansi, munganga ya hopital yango songaka mono nde mono fwete kudiyangisa ve na kukwenda kuna, sambu mono ta fwa ntama mingi ve. Ntangu munganga ya nkaka tubaka diambu ya mutindu mosi, mono lembaka nitu. Yo yina, mono vutukaka na nzo mpi sambaka Yehowa sambu yandi sadisa mono na kunwana ti bangindu ya kulemba nitu mpi kusadisa mono na kuzwa kima yina ta pesa mono ngolo na nitu.

 Kisalu ya kulonga vandaka mosi ya bankisi ya kuluta mbote sambu na mono. Yo pesaka mono bangalasisi mingi. Mwa bamvula na nima, mosi ya ba minganga yina songaka mono nde mono ta fwa ntama mingi ve vandaka kuluta na Nzo ya Kimfumu mpi yandi monaka mono. Yandi yitukaka na kumona nde mono kele kaka na luzingu!

 Ata mono kele mbefo, mono ke salaka ngolo na kuvanda kikesa na kisalu ya Yehowa. Bampangi ke sikisaka mono sambu na kikesa na mono mpi mutindu mono ke kwisaka na ntwala na balukutakanu. Mono ke salaka ntangu yonso mutindu yina sambu yo ke pesaka mono nzila ya kupesa bampangi mbote mpi ya kutudila bo dikebi.

 Mono me mekaka bumbote ya Yehowa, mpi mono me bakaka balusakumunu mingi na luzingu. Mono me bakaka kiese ya kusadisa bantu tatu na kubaka mbotika. Amelia kele na kati na bo. Yandi kwendaka na nzo-nkanda ya Gilead ya 137. Mono me kota Nzo-Nkanda ya Bapasudi-Nzila mbala mingi; yo kele kima ya kitoko ya Yehowa me yidikaka! Yehowa me kumisaka mono muntu ya kiese, ya kele ti mfunu mpi ya ke tulaka ntima. Sesepi bantu ke zitisaka mono. Mono ke kudiwaka diaka ve nsoni. Mono kele ti banduku ya mbote na dibundu, kaka ve na Freetown kisika mono ke zingaka, kansi mpi na insi mpi na ntoto ya mvimba.

 Kiteso ya bamvula 40 me luta banda mono zabaka lusilu ya Nzambi ya kusala nsi-ntoto ya mpa kisika bantu ta vanda diaka ve ti bifu na nitu. Lusilu yina ke landaka kupesa mono kikesa mpi mono ke landaka kuvingila kulungana na yo. Mono ke landaka kuvingila sambu mono me zaba nde Yehowa, Nzambi na mono, ta sukinina ve. (Mika 7:7) Mono me bakaka balusakumunu mingi sambu mono ke vingilaka yandi. Yehowa me sadisaka mono na kunwana ti mambu mingi ya mpasi. Yandi ke sadisaka mono ntangu yonso na ntangu ya mbote. Mono kele mpenza na kiese sambu yandi bakaka mono na ntoto, kisika mono vandaka kukomfula, mpi me tombulaka mono mingi kibeni na kisika mono lenda ve ata fioti kuyindula.