Bambangi ya Yehowa ke kudibanzaka mingi sambu na bampangi na bo ya babakala mpi ya bankento. (1 Piere 2:17) Bampangi mingi na kati na beto ke kudiwaka bonso mpangi-nkento Tannis yina ke zingaka na Kenya. Yandi ke tuba nde: “Mono ke zolaka kibeni kuzaba mambu ya ke kumina bampangi na mono ya babakala mpi ya bankento na ntoto ya mvimba.” Inki ke sadisaka Tannis mpi bamilio ya bampangi ya nkaka na kuzaba mambu yina ke kumina bampangi? Kima ya ke sadisaka bo kele bansangu yina bo ke tulaka na site Internet na beto jw.org. Yantika na 2013, bo me kumaka kutula bansangu ya bampangi na beto na kitini Bansangu na site Internet na beto jw.org.

 Kitini yai ke pesaka bansangu ya masonga sambu na bampangi na beto Bambangi ya Yehowa. Na kitini yango, bo ke tulaka bansangu ya me tala kubasika ya Biblia, kisalu ya kusadisa bampangi yina me bwila kisumbula ya lugangu, bisalu ya kutunga mpi mambu ya nkaka ya mfunu. Yo ke sadisaka beto na kuzaba mambu ya me tala bampangi na beto ya babakala mpi ya bankento yina bo ke na kutula na boloko sambu na lukwikilu na bo. Kitini Bansangu kele mpi ti baeksperiansi yina ke pesaka beto kikesa. Baeksperiansi yango ke tubilaka bakampani ya kisalu ya kulonga nsangu ya mbote mpi ya Nkinsi ya Kuyibuka Lufwa ya Yezu. Banani ke salaka bansosa sambu na kubasisa masolo yai mpi inki mutindu bo ke yidikaka yo?

 Bampangi ya Biro ya Ke Tadilaka Bansangu (service des relations publiques) bantu ke talaka mambu ya kitini Bansangu. Biro yai ke vandaka na babiro na beto ya ke twadisaka kisalu na ntoto ya mvimba mpi Biro ya Komite ya Mitambusi ya Nto-Kimvuka ke twadisaka biro yai. Biro ya Ke Tadilaka Bansangu kele ti bampangi ya babakala mpi ya bankento kuluta 100. Na kati ya bampangi yai, beto lenda tanga bampangi yina ke pesaka maboko na luzolo yonso mpi ya ke sadisaka na kintama. Na kati ya bampangi yai, beto kele ti bansoniki, bantu ya ke salaka bansosa, bantu ya ke tadilaka bifwanisu (infographistes) mpi bankaka ke salaka kisalu ya kubalula (traducteurs). Kisalu ya bankaka na kati na bo ke vandaka ya kusolula ti bantu ya ke monisaka baluyalu, bantu ya ba-iniversite to bantu ya ke pesaka bansangu (journalistes). Biro yai ya Ke Tadilaka Bansangu ke bakaka lusadisu ya babiro kuluta 80 ya Ke Tadilaka Bansangu (bureaux des relations publiques) ya kele na Babetele ya ntoto ya mvimba.

 Sambu na kuyidika disolo mosi, Biro ya Ke Tadilaka Bansangu ya kele na babiro yina ke twadisaka kisalu na beto na ntoto ya mvimba ke salaka diboko na diboko ti Babiro ya Ke Tadilaka Bansangu ya kele na Babetele. Kana bampangi na beto me mona nde yo me fwana nde bampangi ya ntoto ya mvimba kuzaba disolo mosi buna, bo ke salaka bansosa mpi bo ke vukisaka bansangu ya masonga ya me tala disolo yango. Kana bo me kuma kisika yai, bo ke yulaka bangiufula na bantu yina ke salaka mambu yango mbote (spécialistes) mpi bo ke solulaka ti bo. Kana bo me manisa kuvukisa bansangu yonso, bo ke sonikaka disolo yango, bo ke yidikaka bisika yina kele ti bifu, bo ke tangaka yo, bo ke tulaka bafoto mpi bo ke tindaka yo na Komite ya Mitambusi sambu na kulomba nde yo basika.

 Bampangi na beto ya babakala mpi ya bankento ke waka nki mutindu sambu na kitini Bansangu? Cheryl kele mpangi-nkento mosi ya ke zingaka na Philippines. Yandi ke tuba nde: “Sambu na kuyantika kilumbu, mono ke sepelaka mingi kutanga bansangu ya mpa ya organizasio ya Yehowa mpi ya bansadi na yandi.”

 Bantu mingi ya ke tangaka bansangu na kitini yai ke monaka nde bansangu ya kele na kitini Bansangu ya kele na jw.org kele ve ata fioti bonso bansangu ya nkaka ya bo ke pesaka na radio to na televizio. Tatiana ke zingaka na Kazakhstan. Yandi ke tuba nde: “Mono ke sepelaka kutula ntima na bansangu yina ke basikaka na jw.org. Yo ke vandaka bansangu ya kutudila ntima mpi ya kieleka.” Mpangi-nkento mosi ke zingaka na Mexique. Zina na yandi Alma. Yandi ke tuba nde: “Bansangu ya ke basikaka na kitini Bansangu ke pesaka kibeni kikesa. Yo kele ve bonso bansangu ya mbi ya beto ke landaka.”

 Bansangu ya ke basikaka na kitini yina kele bansangu ya kutudila ntima mpi yo ke kumisaka lukwikilu ngolo. Bernard ke zingaka na Kenya. Yandi ke tuba nde: “Bansangu ya ke basikaka na kitini Bansangu ke sadisaka mono na kumona nde bampangi-babakala mpi bankento ya kele na ntoto ya mvimba kele bantu ya dibuta na mono, yo vanda bo ke zingaka na wapi. Na bisambu na mono, mono lenda tanga bazina na bo mpi kutubila bampasi yina bo ke kutana ti yo.” Mpangi-nkento mosi na zina ya Bybron ke zingaka mpi na Kenya. Yandi ke tuba nde: “Mono ke waka ntangu yonso kiese kana mono me mona disolo mosi ya ke tubila kubasika ya Biblia na ndinga mosi ya mpa. Masolo yai ke yibusaka mono nde Yehowa ke pona-ponaka ve.”

 Yo vanda bansangu yina ke tubilaka bampangi na beto ya bo ke niokula lenda pesa beto mpi kikesa. Jackeline ke zingaka na Kenya. Yandi ke tuba nde: “Kuyindula kikesa yina bo ke vandaka ti yo ke kumisaka kibeni lukwikilu na mono ngolo. Mono ke sosaka ntangu yonso kuzaba inki ke sadisaka bo na kukanga ntima. Mono me zabaka nde bima yina bantu ke monaka nde yo kele “ve mpasi” mu mbandu kisambu, kutanga Biblia mpi nkutu bankunga ke vandaka mfunu sambu bampangi na beto kulanda kuvanda kikesa.”

 Beatriz ke zingaka na Costa Rica. Yandi ke sepelaka ti bansangu ya ke tubilaka bisumbula ya lugangu. Yandi ke tuba nde: “Kitini Bansangu ke sadisaka mono na kuzaba nde organizasio na beto ke salaka mambu nswalu, na mutindu ya mbote mpi na zola sambu na kusadisa bampangi na beto na kuzwa bima yina bo kele na yo mfunu. Mambu yai ke ndimisaka mono nde yai kele organizasio ya Yehowa.”

 Beto kele kibeni na kiese mutindu beto ke zwaka bansangu ya mpa ya me tala dibuta na beto ya bampangi ya ntoto ya mvimba. Kupesa bampangi bansangu yai zolaka ve kusalama kana beno vandaka ve kupesa makabu sambu na kisalu yina beto ke salaka na ntoto ya mvimba. Makabu mingi ya beno ke pesaka na kati ya makabu yai, beno ke pesaka yo na donate.pr418.com. Beto ke pesa beno mersi sambu na kikalulu na beno ya kukaba.