Yehowa ke zolaka kulonga bantu na yandi. Yo yina, organizasio na yandi me yidikaka banzo-nkanda mingi sambu na kulonga bansadi na yandi na kusala mambu yina bo ke lomba bo na kusala na kisalu na yandi. Na kati ya banzo-nkanda yango, beto lenda tanga Nzo-Nkanda Sambu na Bansamuni ya Kimfumu. Na bamvula ya me katuka kuluta, organizasio ya Nzambi kudipesaka kibeni na kuyidika manaka ya nzo-nkanda mpi banzo yina bana ya nzo-nkanda ke landilaka malongi yango. Lukanu ya nene kele ya kuyidika mambu na mpila nde balongi kulonga mbote mpi bana ya nzo-nkanda kulonguka mbote. Inki mutindu makabu na beno ke sadisa beto na kulungisa lukanu yai?

 Banda bamvula mingi, banzo-nkanda ya Kimfumu vandaka kusalama na Banzo ya Kimfumu mpi na Banzo ya Balukutakanu ya Nene. Ebuna sambu na nki, beto me katuka kutunga to kuyidika banzo mingi ya nkaka yina beto ke sadila sesepi yai kaka sambu na banzo-nkanda ya Kimfumu? Beto tadila bikuma tatu.

 Mpusa ya mingi. Mpangi Christopher Mavor yina kele nsadisi na Komite ya Kisalu ya Nto-Kimvuka ke tuba nde: “Babiro ya bafiliale songaka beto nde bo kele na mfunu ya bampangi-babakala mpi bampangi-bankento mingi sambu na kupesa maboko na kisalu ya kulonga nsangu ya mbote. Mu mbandu na 2019, Betele ya Brésil monaka nde bo fwete yika bampangi-babakala mpi bankento yina me kotaka Nzo-Nkanda ya Bansamuni ya Kimfumu kiteso ya 7 600 sambu na kulungisa mpusa yina kele na teritware ya Betele na bo.” Betele ya Étas-unis me monisa nde bo kele ti mfunu ya bansamuni mingi ya me fwana yina lenda longa bampangi ya nkaka mutindu ya kuta kimbangi na bisika ya bantu mingi na bambanza ya nene, na mabungu, mpi na baboloko. Departema ya Ke Talaka Kisalu ya Kutunga (LDC) mpi Bakomite ya Ke Talaka Mambu ya Kuwakana ti Balupitalu kele mpi ti mfunu ya bampangi-babakala. Bampangi ya ke baka maplome na Nzo-Nkanda ya Bansamuni ya Kimfumu lenda sadisa na kulungisa bampusa yina.

 Bana ya nzo-nkanda mingi. Babetele mingi me baka baformilere mingi kibeni kuluta yina bo ke bakaka mpi bo lenda ndima baformilere mingi. Mu mbandu na Brésil, Betele bakaka baformilere kiteso ya 2 500 sambu na Nzo-Nkanda ya Bansamuni ya Kimfumu. Kansi mutindu Betele vandaka ve ti bisika mingi, bo ndimaka baformilere ya bampangi 950 mpamba.

 Bisika ya me fwana. Ntangu bana ya nzo-nkanda ke landaka malongi na Nzo ya Kimfumu to na Nzo ya Balukutakanu ya Nene, bo ke vandaka na banzo ya bampangi ya kisika yina nzo-nkanda ke salama. Kuyidika mambu mutindu yai ke simbaka na babwala yina nzo-nkanda yai ke salamaka ve mbala mingi konso mvula. Kansi na babwala yina nzo-nkanda yai ke salamaka mbala mingi, yo ke vandaka mpasi nde bampangi ya babwala yina kuyamba bampangi na banzo na bo bangonda mingi konso mvula. Yo yina, organizasio ke pesaka bana ya nzo-nkanda bisika ya kuvanda ya me kangama ti nzo-nkanda mpi ya me fwana kibeni sambu na bana ya nzo-nkanda.

 Kisika yina kele ti nzo-nkanda mosi, nzo sambu na balongi mpi kiteso ya bana ya nzo-nkanda 30 mpi ya kele ti bima yonso yina bana ya nzo-nkanda mpi balongi kele ti yo mfunu lenda lomba badolare mingi, na kutadila kisika yina yo kele mpi mambu ya nkaka.

 Mbala mingi, bo ke tulaka banzo-nkanda na kisika mosi ya pima na nganda ya mbanza ya nene. Kansi kisika yango fwete vanda pene-pene ti kisika yina bantu ke bakaka transpore. Bo ke tulaka yo mingi-mingi na bisika yina bansamuni ya lenda pesa maboko ke vandaka mingi. Bansamuni yango lenda sadisa na kusala mambu yina yo ke lombaka nde yo salama sambu nzo-nkanda kusalama mbote mpi kuyidika mpi kutanina banzo yina banzo-nkanda ke salamaka mpi bisadilu na yo.

 Banzo yango ke vandaka ti babiblioteke, bisika ya kutangila, baordinatere, ba imprimante, mpi bisadilu ya nkaka. Mbala mingi, bisika yango ke vandaka ti kisika yina bantu ke diaka (salle à manger). Bana ya nzo-nkanda ti balongi ke kwendaka kudia kuna kisika mosi. Bisika yango ke vandaka mpi ti bisika ya mbote yina bo lenda sala ngalasisi mpi kubaka mupepe.

 Beto ke yidika mbote kibeni banzo-nkanda. Troy ke sadilaka Yehowa ti Departema ya Ke Talaka Kisalu ya Kutunga (LDC) na Warwick na New York. Yandi ke tuba nde: “Beto yulaka Departema ya Ke Talaka Mambu ya Banzo-Nkanda ya Kimfumu sambu bo sadisa beto na kuzaba mutindu banzo-nkanda fwete vanda na kati, sambu yo vanda kisika yina me fwana sambu na kusadisa bana ya nzo-nkanda na kulonguka mbote. Bampangi songaka nene yina banzo-nkanda fwete vanda, mutindu yo fwete vanda mpi bamwinda ti bisadilu ya audio-video yina fwete vanda na banzo-nkanda yango.” Sambu na bisadilu ya audio, Zoltán longi mosi ya Nzo-Nkanda ya Bansamuni ya Kimfumu na Hongrie ke tuba nde: “Na luyantiku, beto vandaka ve ti bamikro, yo yina mbala mingi beto vandaka kusonga bana ya nzo-nkanda na kutuba na ndinga ya ngolo. Kansi sesepi ya konso kisika ya kuvanda kele ti mikro, mpasi yai kele diaka ve!”

 Mutindu bo me yidika bisika yai me sala inki na balongi mpi na bana ya nzo-nkanda? Angela landaka malongi ya nzo-nkanda yango na Palm Coast na Floride na États-Unis. Yandi ke tuba nde: “Yo kele kisika mosi ya pima. Bo yidikaka konso kima mbote-mbote, mu mbandu banzo-nkanda mpi bashambre na beto, sambu beto kudipesa na kutanga mpi na kulonguka.” Csaba, kele longi na nzo-nkanda yai na Hongrie. Yandi ke sepela mingi mutindu bo me kuma kudia ti bana ya nzo-nkanda. Yandi ke tuba nde na mabaku yai “mbala mingi, bana ya nzo-nkanda ke songa beto mambu mingi ya me tala bo mpi mambu yina bo me kutanaka ti yo na luzingu. Mpidina beto ke zabaka bana ya nzo-nkanda mbote. Yo ke sadisaka beto na kuwakanisa mbote manaka ya nzo-nkanda ti bampusa na bo.”

 Bana ya nzo-nkanda ti balongi ke monaka kibeni nde banzo yina bo me yidika sambu na banzo-nkanda yai, kele lusakumunu ya Yehowa yina kele ‘Longi na beto ya Nene.’ (Yezaya 30:20, 21) Na Philippines, mpangi-nkento mosi ya kotaka Nzo-Nkanda ya Bansamuni ya Kimfumu na kisika yina bo yidikaka sambu yo kuma nzo-nkanda tubaka nde: “Kisika nzo-nkanda kele mpi mutindu yo kele ke yibusa beto nde, beto kele kaka ve bana ya nzo-nkanda kansi mpi bantu ya sipesiali ya Yehowa me bingisa. Yandi ke zola nde beto sepela ntangu beto ke longuka Ndinga na yandi na mudindu.”

 Bo lenda tunga banzo ya kusadila banzo-nkanda, kuyidika yo mpi kutanina yo sambu beno ke pesaka makabu. Mbala mingi, beno ke pesaka makabu yango na nzila ya Internet na donate.pr418.com. Beto ke pesa beno mersi mingi sambu na kikalulu na beno ya kukaba.