Na janvier 2021, Nto-Kimvuka basisaka mukanda mosi ya mpa sambu na kusadisa bantu na kulonguka Biblia. Zina na yo Zinga Mvula na Mvula! a Inki mutindu nge kudiwaka ntangu nge waka nsangu yina? Mpangi Matthieu ya ke zingaka na Canada ke tuba nde: “Mono vandaka kibeni na kiese! Kiese na mono kumaka diaka mingi ntangu mono vandaka kutala badiskure mpi bavideo yina vandaka kutendula sambu na nki bo basisaka mukanda yai mpi inki mutindu bo mekaka yo. Mono vandaka na nzala ya ngolo ya kumona yo mpi ya kubanda kusadila yo.”

 Mukanda Zinga Mvula na Mvula! ke sadila mutindu ya mpa ya kutwadisa kulonguka ya Biblia. Kansi yo kele mpi ti bikuma ya nkaka ya ke sala nde mukanda yai kuvanda ve bonso mikanda yina beto vandaka kusadila sambu na kulonguka Biblia ti bantu. Kana nge ke sadila mukanda Zinga Mvula na Mvula! ya papie, nge lenda mona nde yo kele mpi ya kuswaswana kibeni. Sambu na kubakisa yo, beto tala mbote-mbote mutindu bo salaka mukanda yango.

 Bapapie ya Kilo. Sambu na nki yo vandaka mfunu? Mukanda Zinga Mvula na Mvula! kele ti bifwanisu ya bakulere kuluta 600. Bifwanisu yango kele pene-pene ya mbala 10 kuluta yina kele na mukanda Biblia Ke Longa! Balutiti ya mukanda yango kele ti bisika mingi ya kukonda bisono to bifwanisu. Kansi kima mosi ke kwendila ve sambu na mambu yai zole: Kana papie kele fioti kibeni, nge lenda mona bifwanisu ya nkaka yina kele na nima ya papie yango. Sambu na kuyidika diambu yai, bampangi yina ke salaka na Departema ya Ke Talaka Mambu ya Kuniema Mikanda na Ntoto ya Mvimba ya kele na Wallkill na New York na États-Unis, mekaka mitindu iya ya bapapie ya beto ke sadilaka sesepi na bisika yina beto ke niemaka mikanda. Komite Sambu na Kusonika ya Nto-Kimvuka tadilaka konso papie mpi ponaka papie yina lenda monisa mpenza ve bifwanisu na nima. Bapapie yai kele ntalu kuluta bapapie yina beto ke sadilaka dezia na mikanda na beto mingi. Kansi, yo ke sadisa balongoki ya Biblia na kutanga mambu ya kele na konso lutiti ya mukanda Zinga Mvula Na Mvula! kukonda nde bisono mpi bifwanisu ya kele na nima ya lutiti kukatula dikebi na bo.

 Kimpusu ya mutindu ya nkaka. Kimpusu ya mukanda yai ya mpa kele ve bonso bimpusu ya mikanda yina beto me basisaka sambu yo kele ya kuvukisa ti bima mingi yina ke tanina yo. Na kisika ya kuvukisa bima yina beto ke vukisaka sambu na kusala bimpusu ya mikanda na beto, mukanda yai kele ti kimpusu ya ke sala nde kifwanisu ya kele na lutiti ya zulu kumonana mbote. Mutindu bo me sala kimpusu ya mukanda yai ke sala nde mukanda kubeba ve ata bo ke sadila yo mbala na mbala. Kimpusu yina bo me sadila kele ntalu mbala tanu kuluta bimpusu yina beto ke sadilaka ntete. Yo yina Babetele mingi salaka mambu na kimvuka sambu na kusumba bima ya kusadila kimpusu yai na ntalu ya nsi.

 Sambu na nki bo bakaka lukanu ya kusumba bima ya ntalu mutindu yai? Mpangi-bakala mosi ya ke sadilaka Yehowa na Biro ya Ke Talaka Mambu ya Kuniema Mikanda na Ntoto ya Mvimba ke tuba nde: “Beto ke mona nde bantu ta sadila mukanda yai mingi. Yo yina beto ke zola nde yo vanda kaka bunkete ata muntu ta sadila yo mingi.” Eduardo ke sadilaka Yehowa na Biro ya Ke Talaka Mambu ya Kuniema Mikanda na Betele ya Brésil. Yandi ke tuba nde: “Beto kele na kiese mingi mutindu beto ke mona organizasio ya Yehowa me sadila bisadilu ya mbote sambu na kusala mukanda yai ya kitoko, ya ta wumela mpi ya kele mbote na kusadila mpi mutindu yo ke sadila mbote makabu yina bantu ke pesa.”

 Beto yantikaka kuniema mukanda Zinga Mvula na Mvula! na luyantiku ya ngonda ya mars 2021 na ntangu yina maladi ya Coronavirus panzanaka na ntoto ya mvimba. Beto kutanaka ti mambu mingi ya mpasi. Babetele vandaka ya kukanga mpi mpila ya kubinga bampangi ya ke pesaka beto maboko mpi ya ke zingaka ve na Betele sambu na kuniema mikanda na bamasini ya beto ke sadilaka na kukwisa kusadisa beto vandaka ve. Mpila mpi ya kubinga bampangi ya nkaka sambu bo kota na Betele vandaka ve. Yo yina na bisika ya nkaka ya beto ke niemaka mikanda, bantu ya kusadisa vandaka ve mpi bisika ya nkaka diaka ya kuniema mikanda vandaka ya kukanga sambu na mwa ntangu sambu na kuzitisa bansiku yina bamfumu ya leta pesaka.

 Inki mutindu beto nungaka bampasi yai? Ntangu bo kangulaka bisika yina beto ke niemaka mikanda sambu bantu kuyantika kusala, bo lombaka bampangi-babakala mpi bankento ya ke salaka bisalu ya nkaka na Betele na kukwisa kupesa maboko. Joel ke sadilaka Yehowa na Biro ya Ke Talaka Mambu ya Kuniema Mikanda na Ntoto ya Mvimba. Yandi ke tuba nde: “Mpeve na bo ya kuditambika mpi luzolo na bo ya kulonguka bisalu ya nkaka salaka nde betu sala kisalu yina yo lombaka nde beto sala.”

 Ata beto kutanaka ti mambu mingi ya mpasi, beto me niema dezia bamilio ya mikanda Zinga Mvula na Mvula! Kusala yo ke lomba bisadilu mingi kibeni mu mbandu, bima ya bo ke niemilaka (plaques d’impression), kima ya nkaka (film de pelliculage), papie, tinta (encre) mpi kole. Na bangonda tanu ya ntete, bamilio 2,3 ya badolare basikaka sambu na kusumba bima ya kusadila kimpusu yina. Sambu na kubasisa ve mbongo mingi, beto me niema kaka ntalu ya mikanda yina mabundu kele ti yo kibeni mfunu.

 Bampangi ya ke longaka bantu Biblia mpi bantu yina ke longukaka Biblia ke tuba nki sambu na mukanda yai ya mpa? Paul kele mpangi mosi ya insi Australie. Yandi ke tuba nde: “Zinga Mvula na Mvula! kele kitoko kibeni na kusadila. Yo yina mono ke kinga ti nzala ya ngolo kusadila yo sambu na kulonguka Biblia ti bantu. Mukanda yango kele kitoko na meso mpi yo ke sadisa kibeni sambu na kusolula. Mukanda yai kele ti bansangu ya pwelele, bangiufula ya ke pusa muntu na kuyindula, bavideo, bifwanisu, batablo mpi balukanu yina longoki fwete kuditudila. Yo kele mukanda mosi ya mfunu ya ke pesa mono nzala ya kutomisa mutindu mono ke longaka.”

 Longoki ya Biblia mosi ya bakala ya ke zingaka na États-Unis ke tuba nde: “Mono ke zolaka mukanda yai ya mpa mingi kibeni. Bifwanisu na yo ke sadisa mono na kubakisa bangindu ya mfunu. Bavideo ke simba ntima na mono mpi ke pusa mono na kusala mambu ya mbote.” Longoki yai ya Biblia ke longukaka mbala zole konso mposo mpi yandi ke vukanaka mbala na mbala na balukutakanu ya dibundu.

 Beto kele diaka ti kisalu ya kuniema bamilio ya mikanda Zinga Mvula na Mvula! na bandinga mingi. Tii pana, Nto-Kimvuka me pesa nswa ya kubasisa mukanda yai na bandinga 710, disongidila mikanda 340 kuluta ntalu ya mikanda Biblia Ke Longa.

 Mbongo yina basikaka sambu na kuniema mukanda yai katukaka na wapi? Yo katukaka na makabu yina bantu ke pesaka sambu na kisalu yai ya ke salama na ntoto ya mvimba. Bamingi ke pesaka makabu yango na nzila ya Internet na donate.pr418.com. Beto ke pesa beno mersi sambu na kikalulu na beno ya kukaba. Kikalulu yai ke sadisa beto na kubasisa mikanda yina ke sadisa na kulonguka Biblia sambu na kusadisa bantu yina ke zola kuzaba Yehowa mpi kubaka luzingu ya mvula na mvula.—Nkunga 22:26.