Na Yuli mpi na Augusti 2020, sambu na mbala ya ntete, bampangi na beto na ntoto ya mvimba ta landa bo yonso lukutakanu ya distrike na video kaka na nsungi mosi. Sambu bampangi yonso kulanda lukutakanu yai, yo lombaka nde bo balula badiskure na bandinga kuluta 500. Kuyidika mambu sambu kisalu yai kusalama mpi bampangi kumanisa yo lenda baka mvula mosi to kuluta. Kansi sambu maladi ya coronavirus me sala nde luzingu kukuma mpasi, yo lombaka nde bampangi yina ke salaka kisalu ya kubalula (traduction), bayina bo lombaka na kubalula Lukutakanu ya Distrike ya 2020 yina kele ti ntu-diambu “Beno Vanda Ntangu Yonso na Kiese! kumanisa kisalu yai na nima ya bangonda na nsi ya iya.

 Na Babiro Ya Ke Twadisaka Kisalu ya Bambangi ya Yehowa na Ntoto ya Mvimba, yo kele ti Badepartema ya Ke Talaka Mambu ya Kubalula mpi Departema ya Ke Sumbaka Bima. Badepartema yai sadisaka bampangi sambu na kusala kisalu yai ya nene. Badepartema ya Ke Talaka Mambu ya Kubalula monaka nde bampangi mingi ya ke salaka kisalu ya kubalula vandaka na mfunu ya bisadilu sambu na kusala kisalu yai, mingi-mingi bamikro ya mbote kibeni. Departema ya Ke Sumbaka Bima yidikaka mambu sambu bo sumba bamikro 1 000 mpi bo tinda yo na kiteso ya bansi 200.

 Sambu na kusadila mbongo na mutindu mosi ya mbote, Departema ya Ke Sumbaka Bima sumbaka bamikro mingi kibeni na mbala mosi. Bo tindaka yo ntete na kisika mosi mpi na nima bo tindaka yo na ntoto ya mvimba na bampangi yina ke salaka kisalu ya kubalula. Beto sumbaka bamikro mingi kibeni. Beto sumbaka mikro mosi na mbongo ya badolare kiteso ya 170. Mbongo ya kutindila yo kele mpi na kati ya mbongo yai. Beto sumbaka yo na ntalu ya nsi kibeni kuluta mbongo yina beto zolaka kubasisa kana beto sumbaka mikro mosi-mosi.

 Yo lombaka nde Departema ya Ke Sumbaka Bima kusumba bisadilu yai mpi kutinda yo na ngonda ya Aprili mpi ya Mayi 2020. Bangonda yai vandaka ntangu yina bantu ya ke tekaka bima lendaka ve kusala kisalu na bo mutindu bo ke salaka yo sambu maladi ya coronavirus vandaka kupesa bo ve nzila. Ata mpidina, na nsuka ya ngonda ya Mayi, babiro mingi ya ke salaka kisalu ya kubalula, Babetele mpi bisika ya nkaka yina bampangi ke salaka kisalu ya kubalula vandaka na mfunu ya bisadilu.

 Mpangi Jay Swinney yina ke twadisaka bisalu ya Departema ya Ke Sumbaka Bima ke tuba nde: “Badepaterma ya Betele ti bantu yina kele na nganda ya Betele, bayina ke tekaka bima vandaka kuwakana mbote. Kima yina sadisaka beto na kusala mambu yai nswalu mpi na kusadila mbote mbongo ya makabu sambu na kusadisa bampangi na beto kele kaka mpeve santu ya Yehowa.”

 Mpangi Nicholas Ahladis yina ke sadisaka na Badepartema ya Ke Talaka Mambu ya Kubalula ke tuba nde: “Bampangi ya ke salaka kisalu ya kubalula, bayina vandaka kubasika diaka ve na ntangu yina bakaka kikesa ya mingi ntangu bo zwaka kisadilu yai. Ata bo vandaka diaka ve kisika mosi ti bampangi ya nkaka ya ke salaka mpi kisalu yai ya kubalula, bo zwaka dibaku ya kusala kisalu yai na kimvuka mpi ya kukotisa ndinga ya badiskure, ya badrame, mpi ya bankunga na bandinga kuluta 500.”

 Sambu na kubasisa manaka ya Lukutakanu ya Distrike ya 2020 ya kele ti ntu-diambu “Beno Vanda Ntangu Yonso na Kiese! sambu na bampangi ya ntoto ya mvimba, bisalu mingi salamaka. Yai kele kaka kisalu mosi na kati ya bisalu yango. Makabu na beno ya luzolo ya mbote yina beno pesaka na nzila ya donate.pr418.com mpi na banzila ya nkaka salaka nde beto kuka kusumba bima yai ya mfunu.