Biblia tubaka na ntwala nde bitumba, kunikana ya ntoto, bipupa mpi ‘mambu ya nkaka ya ke pesa boma’ ta vanda mingi. (Luka 21:10, 11) Mambu yina ya Biblia tubaka dezia na ntwala landaka kusalama na mvula ya kisalu 2022. a Mu mbandu, bitumba ke mana kaka ve na Ukraine mpi yo ke tula luzingu ya bamilio ya bantu na kigonsa. Maladi ya COVID-19 me mana kibeni ntete ve na bansi mingi na ntoto. Katula yo, bisumbula ya lugangu mu mbandu, kunikana ya ntoto na Haïti mpi mipepe ya ngolo yina ke bebisaka bima mpi ke fwaka bantu me salama na Amerique central, na Philippines mpi na sudi-esti ya Afrika. Inki mutindu Bambangi ya Yehowa me sadisa bantu yina me bwila mambu yai ya mpasi?

 Na mvula ya kisalu 2022, organizasio na beto sadisaka bantu yina bwilaka bisumbula kiteso ya 200. Na kimvuka, beto sadilaka mbongo bamilio 12 ya badolare sambu na kusadisa bampangi. b Tala mutindu beto sadilaka makabu sambu na kusadisa bampangi yina bwilaka bisumbula ya lugangu.

 Na Mposo 14 août 2021, ntoto nikanaka na Haïti (magnitude 7.2). Diambu ya mawa kele nde, Bambangi ya Yehowa tatu fwaka: Bampangi-bankento zole mpi mpangi-bakala mosi. Bantu yina gulukaka bikalaka ti bampasi na nitu mpi na mabanza sambu na kunikana yina ya ntoto. Mpangi-bakala mosi na zina ya Stephane ke tuba nde: “Na mbanza ya mvimba, bantu mingi fwaka mpi bo vandaka kuzika bantu mingi konso mposo bangonda kuluta zole.” Mpangi-bakala ya nkaka na zina ya Éliézer, ke tuba nde: “Bambangi mingi ya Yehowa vandaka ve ti banzo, bo vandaka ve ti bilele, basapatu mpi bima ya nkaka ya mfunu. Bampangi mingi salaka bangonda mingi bo ke zinga kaka ti boma sambu konso mbala mambu yina ya mpasi vandaka kuvutukila bo na mabanza.”

 Organizasio na beto sadisaka bampangi nswalu. Betele ya Haïti pesaka batone kuluta 53 ya bima ya kudia, batenta, babashe, matela, mpi bima ya kutudila charge (chargeur solaire) sambu na kutula charge na batelefone. Diaka, na mvula ya kisalu 2022, beto tungaka diaka to beto yidikaka banzo. Yo vandaka banzo kuluta 100. Beto basisaka mbongo kuluta milio mosi ya badolare sambu na kusadisa bampangi.

 Bampangi na beto ya babakala mpi ya bankento pesaka mersi mingi. Lorette ke tuba nde: “Kunikana ya ntoto bukaka nzo na beto yonso mpi yo bebisaka kisika na beto ya mumbongo. Beto vandaka ve ata ti kima ya kudia. Kansi organizasio ya Yehowa sadisaka beto, bo pesaka beto bima yonso ya beto vandaka ti yo mfunu.” Micheline ke tuba nde: “Kunikana ya ntoto bebisaka nzo yina bana na mono zole ya babakala mpi mono mosi vandaka kuzinga. Mono vandaka ve kuzaba kima ya kusala katula kaka kusamba sambu bo sadisa beto mpi Yehowa pesaka mvutu na nzila ya organizasio na yandi. Sesepi, beto kele ti nzo mosi ya bo me tunga mbote ya beto lenda zinga. Mono me baka lukanu ya kusala yonso yina mono lenda sala, sambu na kumonisa ntonda na Yehowa.”

 Bamfumu monaka mpi bikesa yina beto salaka sambu na kusadisa bantu yina me bwila mpasi. Ntwadisi ya kisika yina bo ke yambaka bantu ya me konda bisika ya kuvanda tubaka nde: “Mono ke losila beno bintuntu mutindu beno kwisaka nswalu kupesa lusadisu. Mono ke sikisa beno sambu beno me monisa luzitu ya mingi sambu na bamfumu. Mono kele na kiese ya kumona nde dikebi na beno ke vandaka ve na mbongo. Kansi, beno ke zolaka kusadisa bantu. Beno ke salaka mambu sambu na zola.”

 Na Kintete 24 janvier 2022, Mupepe ya ngolo ya bo ke binga Ana bulaka na Mozambique na nima yo kwendaka na ndambu ya westi ya Malawi. Mupepe yango salaka nde mvula ya ngolo kunoka mpi yo nataka mipepe ya nkaka ya vandaka kuluta na vitesi ya 100 kilometre na ngunga mosi. Yo bebisaka bansinga ya kura, yo bukaka ba pont mpi yo salaka nde banzo mpi bima kudinda na masa.

 Mupepe yina ya ngolo natilaka Bambangi ya Yehowa kuluta 30000 ya ke zingaka na Malawi mpi na Mozambique bampasi. Charles kele mpangi-bakala mosi ya pesaka maboko na kisalu ya kusadisa bantu. Yandi ke tuba nde: “Ntangu mono monaka mutindu bampangi vandaka kumona mpasi mpi bima yina bo vidisaka, mono waka mawa mingi mpi mono monaka ve kima ya kusala.” Mambu vandaka mbi mingi sambu bima na bo ya kudia mpi bima ya bo katulaka na bilanga dindaka na masa. Bantu mingi vandaka diaka ve ti banzo. Diambu ya mawa kele nde, mpangi-bakala mosi ti nkento na yandi mpi bana na bo zole ya bankento fwaka na masa sambu bwatu yina kwendaka kugulusa bo balukaka.

 Mupepe yina ya ngolo vandaka kubangisa. Na 1 heure ya mpimpa, na Nchalo na Malawi, dibuta ya Sengeredo waka makelele ya masa yina vandaka kukulumuka ntinu mpi yo vandaka kupesa boma. Bamasa zole ya fioti fulukaka! Mpangi-bakala Sengeredo bakaka lukanu ya kuyambula nzo na yandi. Yandi bakaka lukanu mosi ya mbote sambu ntama mingi ve masa ya mvula yina fulukaka bwisaka nzo. Bima na bo bebaka mpi ya nkaka kulumukaka na masa. Dibuta yai bakaka lukanu ya kukwenda na Nzo ya Kimfumu. Bo ke salaka minuta 30 katuka na nzo na bo tii na Nzo yina ya Kimfumu. Kansi na ntangu yai, bo salaka bangunga zole. Ntangu bo kumaka, bilele na bo yonso vandaka ya kuteba na masa mpi bo vandaka ya kulemba. Ata mpidina bo gulukaka.

 Betele ya Malawi mpi Betele ya Mozambique yantikaka nswalu kisalu ya kusadisa bampangi yina bwilaka kisumbula yina ya lugangu. Bo songaka bankengi ya nziunga mpi bankuluntu na kusosa kuzaba bima yina bampangi ya bwilaka mpasi yai kele ti yo mfunu mpi na kupesa bo kikesa. Bo pesaka Bakomite mingi ya Ke Pesaka Bantu Yina Me Bwila Mpasi mukumba ya kulandila kisalu ya kusadisa bampangi. Bakomite yango yantikaka mbala mosi kusadisa bampangi na beto na kuzwa bima ya kudia mpi bima ya nkaka ya mfunu. Mbongo 33 000 ya badolare basikaka sambu na kusadisa bampangi mpi mbongo kuluta 300 000 ya badolare sambu na bisalu ya kuyidika mpi kutunga diaka banzo ya bampangi.

 Bakomite ya Ke Sadisaka Bantu Yina Me Bwila Mpasi ke sadilaka mbongo na mayele. Diambu yai kele kibeni mfunu sambu bima ke mata ntalu. Mu mbandu, na bangonda nsambwadi ya ntete yina bampangi salaka kisalu yai, fufu ya masangu—ya kele madia ya mfunu na Malawi—mataka ntalu tii na kiteso ya 70%. Ntalu ya karbira mpi mataka. Sambu na kubumba mbongo, bampangi sumbaka bima mingi kibeni ya kudia mpi ya kutungila banzo kaka na bwala yai. Bo kitisilaka bo ntalu ya bima yina mpi bo basisaka ve mbongo ya mingi yina ke basikaka sambu na transpore ya bima.

 Kisalu ya kusadisa bantu yina me bwila mpasi simbaka ntima ya bansadi ya Yehowa. Felisberto kele mpangi-bakala mosi na Mozambique. Yandi ke tuba nde: “Mono me monaka ntete ve organizasio mosi ya me pesaka bantu bima mingi: bima ya kutungila banzo, transpore, bantu sambu na kutunga banzo, bima ya kudia, mpi bandongisila ya zola. Lusadisu yai vandaka mbandu ya ke monana ya zola yina bampangi fwete vanda ti yo, yina Yezu tubilaka na Yoane 13:34, 35.” Ester kele mufwidi na Malawi. Nzo na yandi bukanaka. Yandi ke tuba nde: “Mono vandaka ve kuzaba kima ya kusala sambu mono vandaka ti mbongo fioti mpamba sambu na kutunga nzo ya nkaka. Yo yina ntangu bampangi kwisaka mpi tungilaka mono nzo, mono monaka bonso nde mono kele dezia na Paladisu.”

 Mutindu beto ke kwenda malembe-malembe na nsi-ntoto ya mpa yina Yehowa me silaka beto, beto ke vingila nkutu kumona bisumbula mingi diaka ya lugangu. (Matayo 24:7, 8) Ata mpidina, beto ke pesa beno mersi mingi sambu na makabu yina beno ke pesaka na luzolo yonso, beto ke ndima kibeni nde bansadi ya Yehowa ta baka lusadisu yina bo ta vanda ti yo mfunu. Na donate.pr418.com, bo ke tendula mutindu ya kupesa makabu. Matondo mingi sambu na kikalulu na beno ya kukaba.