Bantu mingi kibeni ke bakaka mbotika konso mvula, yo yina beto kele na mfunu ya bisika mingi sambu na kusambila Yehowa. Yo yina, Babiro yina kele na nsi-ntoto ya mvimba ya Ke Tadilaka Kisalu ya Kutunga na konso teritware yidikaka mambu sambu na kutunga to kuyidika bisika ya lusambu kuluta 2 700 na mvula ya kisalu 2020. a

 Diambu ya mawa kele nde, maladi yai ya coronavirus ya me panzana na ntoto ya mvimba kangaka bampangi nzila sambu na kusala mambu mutindu bo yidikaka yo. Sambu bampangi na beto ya babakala mpi ya bankento kubaka ve maladi yai mpi sambu na kuzitisa bansiku yina bamfumu ya luyalu tulaka, Komite ya Bambasisi ya Nto-Kimvuka lombaka bampangi mingi na kuzenga kisalu ya kutunga yina vandaka kusalama na ntoto ya mvimba. Ata mpidina, na mvula ya kisalu 2020, bampangi tungaka mpi yidikaka bisika ya lusambu kuluta 1 700 na ntwala nde maladi yai kupanzana na ntoto. Katula yo, bo manisaka bisalu ya nene ya kutunga na bateritware ya Babetele kuluta 100. Tala mutindu bisalu zole ya kutunga yina manaka me natila bampangi na beto mambote.

 Betele ya Cameroun. Betele ya ntama yina vandaka na Douala vandaka kibeni fioti mpi yo vandaka kulomba nde bo kumisa yo nene. Komite ya Bambasisi tadilaka makuki ya kuyidika Betele ya insi yina, kansi kisalu kuyidika Betele yango zolaka kubaka mbongo mingi kuluta mbongo yina bo basisaka sambu na kusumba kisika yina. Bo tadilaka mpi mpila ya kutunga diaka banzo ya nkaka na kisika ya nkaka yina bo sumbaka to kusumba banzo yina kele dezia mpi kuyidika yo, kansi ata kima mosi ve salamaka sambu mambu ya luzingu vandaka ve kupesa nzila.

 Na ntangu yina, bampangi waka nde bamfumu ya luyalu yidikaka mambu sambu na kusala nzila (mukidi) na Nordi ya Douala na lweka ya Banzo ya Balukutakanu na beto ya Nene. Nzila (mukidi) yina ta sadisa mingi sambu na bima ya nkaka ya mfunu (kuran, masa mpi buna na buna) kuvanda na banzo mpi na lupangu na beto yina. Mambu yina vandaka kibeni kima yina Betele vandaka kusosa. Yo yina Nto-Kimvuka ndimaka nde bo tunga Betele ya mpa na lweka mosi ya lupangu yina Nzo ya Nene ya Balutakanu vandaka.

 Bambangi ya Yehowa ti bakompani yina ke salaka bisalu ya kutunga salaka kisalu yina kisika mosi. Kusala mutindu yina salaka nde kisalu yina kubaka ve ntangu mingi mpi mbongo kubasika ve mingi. Kisalu yina lombaka kaka mbongo fioti. Mbongo yango vandaka kibeni na nsi ya mbongo yina zolaka kubasika. Yo sadisaka organizasio na kubumba mbongo ya badolare kuluta bamilio zole. Bampangi ya dibuta ya Betele kwendaka kukota na banzo yina ya mpa ntangu fioti na ntwala nde maladi ya coronavirus kupanzana na ntoto.

 Bampangi ya Betele ya Cameroun zwaka kisika mosi ya mbote ya kuvanda mpi ya kusadila Yehowa. Bo ke mona nde Betele yina ya mpa kele dikabu ya me katuka na Yehowa. Mpangi-bakala mosi ti nkento na yandi ke tuba nde: “ Beto ke zola kusala ngolo mpi kumonisa nde beto ke baka kibeni dikabu yai na valere.”

 Babiro Yina Bo Ke salaka Kisalu ya Kubalula Mikanda mpi Bavideo (RTO) na Ndinga Tojolabal na Insi Mexique. Bamvula mingi me luta, kimvuka ya bampangi yina ke salaka kisalu ya kubalula na ndinga Tojolabal na Betele ya Amérique centrale, ke salaka kisalu yai banda ntama pene-pene ya Mbanza Mexico. Kansi bantu ke tubaka ndinga Tojolabal mingi-mingi na Altamirano mpi na Margaritas na kiteso ya bakilometre 1 000 ti Betele. Diambu yai salaka nde, bampangi yina ke salaka kisalu ya kubalula na ndinga yai kukuka ve kubalula na kulanda mutindu bantu ke tubaka ndinga yango konso kilumbu. Diaka, yo vandaka mpasi sambu Betele kuzwa bampangi-babakala mpi bankento ya me fwana pene-pene ya Betele sambu bo sadisa kimvuka ya bampangi yai ya ke salaka kisalu ya kubalula mikanda mpi ya kukotisa ndinga.

 Mambu yina salaka nde Komite Sambu na Kusonika ya Nto-Kimvuka kubaka lukanu ya kukatula kimvuka ya bampangi yina ke salaka kisalu ya kubalula na ndinga Tojolabal na Betele mpi kunata bo kisika yina bantu ke tubaka yo. Sambu na kusala yo, Betele bakaka lukanu ya kusumba nzo mosi mpi ya kuyidika yo. Kansi, kusala mutindu yina vandaka kulomba mbongo mingi kibeni kuluta kutunga babiro to kufutila.

 Mpangi mosi ya ke salaka kisalu yina ya kubalula ke monisa mutindu yandi bakaka mambote: “Na bamvula 10 yina mono me sala na kisalu ya kubalula na Betele, mono me bikaka ve kukutana ti ata dibuta mosi pene-pene ya ke tubaka ndinga na mono na Betele. Awa babiro na beto me kuma kibeni na kati-kati ya kisika yina bantu ke tubaka Tojolabal. Konso kilumbu, mono ke kutanaka ti bantu yina ke tubaka Tojolabal. Yo me sadisaka mono na kuzaba bangogo mingi ya mpa mpi kisalu ya mono ke salaka me bonga.”

Bisalu Yina Ta Salama na Mvula ya Kisalu 2021

 Na mvula ya kisalu 2021, organizasio me yidika mambu sambu na kutunga Babiro 75 Yina Bo Ke salaka Kisalu ya Kubalula Mikanda mpi Bavideo mpi banzo ya nkaka sambu na banzo-nkanda ya Kimfumu. Bisalu ya nene yina ke salama na Babetele nana ke landa kusalama, tanga mpi kisalu ya kutunga babiro ya mpa ya nene ya ntoto ya mvimba na Ramapo na New York mpi kisalu ya kunata Babetele ya Argentine mpi ya Italie kisika ya nkaka. Diaka, yo ke lomba nde organizasio kutunga Banzo ya Kimfumu kuluta 1 000, kuyidika bisika 6 000 ya kusala balukutakanu sambu yo kele diaka ve mbote mpi yo ke lomba nde bo tunga ya nkaka, mpi yo ke lomba nde bo yidika Banzo ya nkaka ya Kimfumu 4 000.

 Mbongo yina organizasio basisaka sambu na bisalu yai yonso ya kutunga mpi ya kuyidika bisika ya lusambu katukaka na wapi? Mpangi Lázaro González yina kele na Komite ya Filiale ya Amérique centrale pesaka mvutu na ngiufula yai ntangu yandi vandaka kutubila kisalu ya kutunga Babiro Yina Bo Ke Salaka Kisalu ya Kubalula Mikanda mpi Bavideo na ndinga Tojolabal. Yandi tubaka nde: “Na bwala na beto, beto ke vandaka ve ti mbongo mingi. Kana kimvuka ya mvimba ya bampangi sadisaka beto ve, yo zolaka kuvanda mpasi sambu bo tunga babiro ya kusala kisalu ya kubalula sambu na bampangi na beto. Mbongo yina bampangi na beto ya ntoto ya mvimba pesaka me sala nde bampangi ya ke salaka kisalu ya kubalula kukuma pene-pene ti bimvuka ya bantu yina ke tubaka bandinga yina bo ke balulaka. Beto ke pesa bampangi na beto ya ntoto ya mvimba mersi mingi sambu na lusadisu na bo.” Ya masonga, bisalu yai yonso ya kutunga ke salamaka kaka na nsadisa makabu yina beno ke pesaka sambu kisalu kusalama na ntoto ya mvimba. Bampangi mingi ke pesaka makabu yango na nzila ya Internet na donate.pr418.com..