Bisumbula ya lugangu me salama mingi na 2020. Maladi ya coronavirus yina me panzana na ntoto ya mvimba yantikaka mpi kaka na mvula yina. Inki mutindu Bambangi ya Yehowa sadisaka bampangi yina bwilaka bampasi yina?

 Na mvula ya kisalu 2020, a Komite ya Bantwadisi ya Nto-Kimvuka ndimaka nde bampangi kusadila mbongo ya badolare b bamilio 28 sambu na kusadisa bampangi yina bwilaka mpasi. Yo sadisaka sambu na kusadisa bampangi yina bwilaka bampasi kuluta 200 mu mbandu, maladi ya coronavirus, mipepe ya ngolo ya mutindu na mutindu yina bulaka, kudinda ya banzo na Afrika sambu masa fulukaka, nzala yina kotilaka bampangi na Vénézuéla, mpi mushipu ya ngolo yina vandaka na Zimbabwe. Mbongo ya makabu yina bampangi ke pesaka sadisaka sambu na kusumba madia, masa, bilele, bankisi ti bima yina bo ke sadilaka sambu na kutula bunkete, kuyidika banzo mpi kutunga yo. Beto tadila mwa bambandu ya ke monisa kisalu yango ya kusadisa bampangi yina ke bwilaka mpasi.

 Coronavirus. Na nsi-ntoto ya mvimba, bampangi na beto ya babakala mpi bankento bakaka maladi yai. Maladi yango yangisaka mabanza ya bankaka mpi yo salaka nde bo vanda diaka ve ti mbongo. Sambu na kusadisa bo, bampangi salaka na ntoto ya mvimba Bakomite ya Ke Talaka Kisalu ya Kusadisa Bampangi yina Me Bwila Mpasi. Bampangi yina vandaka na bakomite yango landaka kusosa kuzaba bampusa ya bampangi na beto mpi bo vandaka kupesa mbala mosi barapore yina vandaka kusadisa Komite ya Bantwadisi na kuzaba mutindu ya kutambusa mbote kisalu ya kusadisa bampangi yina me bwila mpasi.

 Na 2020 ya mvimba, Bakomite ya Ke Talaka Kisalu ya Kusadisa Bampangi yina Me Bwila Mpasi sadisaka bampangi mingi na kuzwa madia, masa, bima ya kusadila sambu na kuvanda na sante ya mbote mpi bankisi. Na bisika ya nkaka, bampangi yina salaka na bakomite yango salaka kisalu yina ti bankuluntu ya bisika yango sambu na kusadisa bampangi na beto na kuzwa lusadisu yina bamfumu ya leta ke pesaka.

 Bantu yina kele ve Bambangi ya Yehowa monaka mutindu bo vandaka kusadisa bampangi. Mu mbandu, Field Simwinga, mfumu mosi ya distrike ya Nakonde na Zambie songaka bampangi na beto nde: “Beto ke pesa beno mersi mingi mutindu beno me kwisa na ntangu ya me fwana sambu na kupesa mabuta yina bwilaka mpasi bima yina bo vandaka ti yo mfunu.”

 Nzala na Angola. Maladi yai coronavirus ya me panzana na ntoto ya mvimba me sala nde nzala kukota na insi Angola mpi bima ya kudia kumata kibeni ntalu. Bampangi na beto mingi ya babakala mpi ya bankento monaka mpasi kibeni sambu na kusumba bima ya kudia.

 Bampangi lombaka Betele ya Brésil na kusadisa bampangi ya Angola. Bo lombaka bo na kutindila bampangi ya insi Angola bima ya kudia. Sambu na kusadila mbote mbongo ya makabu yina bampangi ke pesaka sambu na kusadisa bampangi yina me bwila mpasi, bampangi sosaka mbote-mbote kuzaba mutindu ya kuluta mbote ya kusumba bima mpi ya kutindila yo bampangi. Bampangi sumbaka mpi tindaka konso kita ya bima kaka ti mbongo badolare 22 mpamba. Kansi konso kita vandaka ti bakilo 20 ya bima ya kudia mu mbandu loso, madesu mpi wile (huile). Awa, bo me tinda dezia bita ya bima ya kudia 33 544. Yo ke sala batone 721 ya bima. Ntangu bo vukisaka yo ti bima ya insi Angola, bima yina ya kudia sadisaka bantu kuluta 50 000.

 Bampangi na beto ya Angola waka inki mutindu sambu na lusadisu yina? Alexandre kele mpangi mosi ya ke zingaka na bwala mosi ya ntama ya Angola. Yandi ke tuba nde: “Mono ke mona nde lusadisu yai kele kima yina ke monisa nde Yehowa ke zolaka mono mpi nde mono kele ve mono mosi. Organizasio ya Yehowa ke bakaka mono na valere.” Mariza kele mama mosi ya ke sansaka bana na yandi yandi mosi. Yandi ke tuba nde: “Yehowa me wa kisambu na mono. Mono ke pesa yandi ti organizasio na yandi mersi.”

 Lusadisu na Ntangu ya Mushipu Mosi ya Ngolo na Zimbabwe. Na mvula ya kisalu 2020, mushipu mosi ya ngolo vandaka na Zimbabwe. Yo salaka nde bantu mingi kibeni kuniokwama sambu na nzala ya ngolo. Bambangi ya Yehowa mingi vandaka ve ti bima ya kufwana sambu na kudia.

 Bampangi salaka Bakomite tanu Sambu na Kusadisa bampangi mpi kupesa bo bima ya kudia. Bansamuni mingi pesaka maboko. Bo vandaka kukangisa bima yango, kutula yo na bakaminio mpi bampangi ya nkaka pesaka bakaminio na bo sambu na kunata bima. c Na mvula ya kisalu 2020, bo sadilaka mbongo ya badolare 691 561 sambu na kusadisa bampangi kuluta 22 700 na kuzwa bima ya kudia.

 Bantangu ya nkaka, ntangu bima yango vandaka kukwisa, bampangi vandaka me manisa dezia bima na bo mosi ya kudia yina bo vandaka ti yo. Ntangu bima yina kwisaka, bampangi na beto pesaka Yehowa lukumu. Nkutu bankaka yantikaka kuyimba bankunga ya Kimfumu.

 Na bwala mosi, bampangi zole ya bankento yina babakala na bo me fwaka vandaka na lukutakanu mosi yina bimvuka ya bantu me salaka, vandaka kusala mpi na lukutakanu yango, bimvuka yina vandaka kutubila lusadisu ya bima ya kudia yina bo zolaka kupesa. Kansi ntangu bo kumaka kutubila mambu ya politiki na lukutakanu yango, bampangi yina ya bankento tubaka nde bo ta ndima ve kusala mambu yina bo songaka na kusala na ntwala ya kubaka madia yango. Bo katukaka na lukutakanu yina. Bantu sekaka bo mpi bo songaka bo nde: “Beno kwisa ve kusosa bima ya kudia na banzo na beto.” Kansi bamposo zole mpamba na nima, bampangi na beto kumaka na bwala yina mpi bo pesaka bampangi na beto yina bima ya kudia. Bampangi na beto yai bakaka madia na bo na ntwala nde madia ya bantu ya bimvuka yina kukwisa.

 Kisalu ya Kusadisa Bampangi Yina Me Bwila Mpasi butaka mpi mbuma ya mbote na insi Zimbabwe. Mu mbandu, beto tubila mambu yina Prisca kutanaka ti yo. Yandi ke zingaka na bwala mosi ya fioti. Ata mushipu yina ya ngolo nataka bampasi, Prisca vandaka kukwenda konso Kitatu mpi konso Kitanu na kisalu ya kulonga bantu nsangu ya mbote. Yandi vandaka mpi kusala mutindu yina ata na ntangu yina bantu vandaka kukwenda kusala bilanga. Bantu ya bwala yina yandi ke zingaka vandaka kuseka yandi. Bo vandaka kusonga yandi nde: “Nge ke bika dibuta na nge kufwa na nzala sambu na kisalu na nge yina ya kulonga.” Prisca vandaka kusonga bo nde: “Yehowa ke yambulaka ve ata fioti bansadi na yandi.” Ntangu fioti na nima, organizasio pesaka yandi madia. Diambu yai yitukisaka bantu ya nkaka ya ke zingaka pene-pene ti yandi. Bo songaka Prisca nde: “Nzambi me yambula nge ve ata fioti, beto ke zola kuzaba mambu mingi sambu na Nzambi.” Bubu yai, bantu nsambwadi ya ke zingaka pene-pene ti yandi ke landaka balukutakanu ya dibundu yina bo ke tulaka na radio.

 Mutindu beto ke kuma pene-pene ya nsuka ya nsi-ntoto yai, bisumbula ya lugangu ta salama mingi. (Matayo 24:3, 7) Beto ke pesa beno mersi mingi sambu na makabu yina beno ke pesaka na luzolo yonso, na nzila ya bametode ya mutindu na mutindu yina kele na donate.pr418.com. Beto ta sadila yo na mutindu ya mbote sambu na kusadisa bampangi yina ke niokwama, sambu bo baka bima yina bo kele na yo mfunu na ntangu ya bo kele ti yo mfunu.