Na Marsi 2020, Kimvuka Yina Ke Tadilaka Mambu ya Sante na Ntoto ya Mvimba (OMS) tubaka nde COVID-19 me panzana na ntoto ya mvimba. Bantu mingi yindulaka ve nde maladi yango ta landa kuniokula nsi-ntoto mvula mosi to bamvula mingi na nima. Maladi yai me niokula sante ya bamilio ya bantu, yo me niokula mabanza na bo mpi me bebisa mambu na bo ya mbongo. Bambangi ya Yehowa kele mpi na kati ya bantu yango. Inki mutindu Bambangi ya Yehowa yidikaka mambu sambu na kusadisa bampangi na ntangu yina ya maladi?

 Na lutwadisu ya Komite ya Mitambusi ya Nto-Kimvuka, bo tulaka Bimvuka kuluta 950 ya Ke Sadisaka Bantu Yina Me Bwila Mpasi na ntoto ya mvimba sambu na kusadisa bampangi na nsungi ya maladi ya COVID-19. Na bisika ya nkaka, bo yidikaka mambu sambu bampangi-babakala mpi bankento ya bisika yango kupesa bampangi lusadisu mpi na bansi ya nkaka diaka, Bambangi ya Yehowa bakaka lusadisu ya luyalu. Bimvuka yina Komite ya Mitambusi tulaka yidikaka mpi mambu sambu na kusadisa bantu mingi kibeni.

 Mu mbandu, beto tubila mambu yina salamaka na Paraguay. Zulunalu mosi tubaka nde mutindu maladi yai me panzana na ntoto ya mvimba mpi me bebisa mambu ya mumbongo, “bantu mingi ya Paraguay kele ve ti bima ya kudia.” Kansi Kimvuka ya kele na Paraguay Yina Ke Sadisaka Bantu Yina Me Bwila Mpasi yantikaka dezia kupesa bampangi bima ya kudia yina bo lenda dia bamposo zole. Bo pesaka bima mingi (bima ya kudia, bankisi ya kutudila bunkete) yina bampangi ya kele bantu iya na dibuta lenda sadila bamposo zole. Konso kesi vandaka na valere ya badolare kiteso ya 30.

 Inki bampangi yina kudipesaka sambu na kusadisa bampangi ya nkaka yina bwilaka mpasi ke salaka sambu na kuditanina mpi kutanina bantu ya nkaka na kubaka ve maladi ya COVID-19? Bo ke lwataka bamaske mpi bo ke vandaka ve pene-pene ti bantu ya nkaka. Bo ke zikisaka mpi mbote nde bakompani yina bo ke kwendaka kusumba madia ke bumbaka bima na bisika ya bunkete mpi ke yidikaka mbote mambu sambu bantu kubaka ve maladi. Mu mbandu, bantu yonso ya ke simbaka bakesi ya madia ke lwataka bima yina ke taninaka bo, bo ke yobisaka bakaminio mpi bo ke tulaka yo nkisi yina ke fwaka mikrobe, bo ke tulaka mpi nkisi yango ya ke fwaka mikrobe na bisika yina bo ke tulaka bakesi yina ya madia. Na nima, bampangi yina ke pesaka bantu ya nkaka madia yango ke vandaka ve pene-pene ti bampangi-babakala mpi bankento yina bo ke kwendaka kubikila madia.

 Banda na Yanuari 2021, Komite ya Mitambusi ndimaka nde bampangi kusadila mbongo kuluta bamilio 25 ya badolare sambu na kusadisa bampangi na mpasi yina COVID-19 me nata. Babetele mpi Bimvuka Sambu na Kusadisa Bantu Yina Me Bwila Mpasi ke sadila mbote kibeni mbongo yina mpi ke salaka yonso sambu na kuzwa bima ya mfunu ya kuzingila na ntalu mosi ya mbote. Mu mbandu na insi Chili, bampangi yina ke yidikaka mambu sambu na kusadisa bampangi yina me bwila mpasi zolaka kusumba bakilo 750 ya madesu mosi buna (lentilles). Kansi ntalu ya madesu yai katukaka kumata banda ngonda mosi dezia. Ata mpidina, bo bakaka lukanu ya kusumba yo ata yo vandaka ntalu. Bangunga zole na nima ya kuwakana ti muntu yina vandaka kuteka yo, muntu yango songaka bo nde muntu ya nkaka katukaka kuvutula madesu yina yandi sumbaka. Sesepi, na kisika ya kutekila bampangi madesu na ntalu yina ya mingi mutindu bo wakanaka, muntu yango tekilaka bampangi madesu yina na ntalu yina bo vandaka kuteka yo ngonda mosi na ntwala.

 Kansi ntangu bampangi na beto kwisaka kubaka madesu ya bo sumbaka, muntu yina tekilaka bo yo sosaka nde bo baka yo ve mpi yandi sosaka kuvutudila bo mbongo. Yandi tubaka nde bo ke pona-ponaka bilungi ntangu bo ke kabisilaka bantu madia. Bo ke salaka mambu kaka bonso bantu ya bimvuka ya nkaka. Mpangi-bakala mosi salaka kisambu mosi ya nkufi na nsi ya ntima. Na nima yandi songaka muntu yina tekilaka bo madesu yina nde konso dibundu tadilaka dezia bima yina bampangi ya kele na dibundu na bo kele ti yo mfunu. Bampangi songaka yandi mpi nde mutindu bo ta pesa bima yango na bampangi ya kele na dibundu mpi ya me katukaka na bisika ya mutindu na mutindu, konso kesi ya madia ta vanda ya muntu yandi mosi mpi yo ta vanda ti madia yina mabuta ke diaka mingi. Na nsuka, bo songaka muntu yina tekilaka bo bima nde Bambangi ya Yehowa ke pesaka mbongo na luzolo yonso sambu na kusadisa bampangi yina me bwila mpasi. Mambu yina yitukisaka kibeni muntu yango. Yandi ndimaka kukitisa ntalu ya madesu mpi yandi kabilaka bampangi bakilo 400 ya madesu na mbala ya nima yina bo kwendaka kusumba yo.

 Lusu kele mpangi-nkento mosi ya me kumaka mbuta. Yandi ke zingaka na Libéria ti bantu tanu ya dibuta na yandi. Kilumbu mosi na suka, ntangu yandi vandaka kudia mwa kima mpi kutanga mukapu ya kilumbu yina, mutekulu na yandi ya bakala ya bamvula 7, monaka nde bo me dia dezia bima yonso ya bo bikalaka ti yo. Yandi yulaka nde: “Beto ta dia nki?” Lusu songaka yandi nde yandi sambaka dezia sambu na yo mpi nde yandi ke tula ntima nde Yehowa ta pesa bo bima yina bo kele na yo mfunu. Na nima ya midi ya kilumbu yina, bankuluntu ya dibundu na bo bingaka Lusu sambu na kusonga yandi na kukwenda kubaka dikabu na bo ya bima. Yandi ke tuba nde: “Mutekulu na mono ya bakala tubaka nde sesepi, mono me zaba nde Yehowa ke waka bisambu mpi yandi ke pesaka mvutu sambu yandi me pesa mvutu na kisambu na nge.”

 Na République démocratique du Congo, nkento mosi ya ke vandaka pene-pene ti dibuta mosi ya Bambangi ya Yehowa monaka mutindu Bambangi ya nkaka ya Yehowa vandaka kukwisa kubikala dibuta yina madia. Yandi songaka bakala na yandi nde: “Kana coronavirus me mana, beto ta kuma Bambangi ya Yehowa, sambu bo me lungisa bampusa ya bampangi na bo ya babakala mpi ya bankento na ntangu yai ya mpasi.” Bakala na yandi yulaka yandi: “Nge ke zola kukuma Mbangi ya Yehowa kaka sambu na saki mosi ya loso?” Nkento vutudilaka yandi nde: “Ve, kansi saki yina ya loso ke monisa zola ya masonga.”

 Kana Bambangi ya Yehowa me sadisa bampangi na bo ya babakala ti ya bankento na nswalu yonso na ntangu yai ya maladi ya coronavirus me panzana na ntoto ya mvimba, yo kele sambu na makabu yina beno ke pesaka na luzolo yonso. Beto ke pesa beno mersi mutindu beno sadilaka bametode yina kele na site donate.pr418.com sambu na kupesa makabu.