Beto ta vilaka ve lukutakanu ya Distrike ya 2020. Yo vandaka lukutakanu na beto ya ntete ya distrike yina bo kotisaka ndinga ya manaka mpi ya bantu talaka na ntoto ya mvimba na nzila ya Internet. Kansi na Malawi mpi na Mozambique, bampangi mingi ya babakala mpi ya bankento landaka lukutakanu yai ya distrike kukonda kusadila Internet. Ebuna inki mutindu bo landaka yo?

 Sambu na bampangi ya Malawi mpi ya Mozambique, Komite ya Mitambusi mpi Komite ya Kulonga ya Nto-Kimvuka ndimaka nde bo landa lukutakanu yina ya distrike na nzila ya televizio mpi ya radio. Sambu na nki bo ndimaka nde bampangi kulanda yo mutindu yina? Yo kele sambu na Malawi, Internet kele ntalu mingi mpi bampangi-fioti mpamba lenda sadila yo. William Chumbi ke sadilaka Yehowa na Betele ya Malawi. Yandi kele na kati ya bampangi ya Komite ya Filiale yai. Yandi ke tuba nde: “Radio ti televizio kele bima zole mpamba yina bampangi-babakala mpi bankento lenda sadila sambu na kulanda lukutakanu.” Luka Sibeko ke sadilaka mpi Yehowa na Betele ya Malawi, yandi kele mpi na Komite ya Filiale. Yandi ke tuba nde: “Kana bo lutisaka yo ve na televizio mpi na radio, bampangi fioti mpamba na teritware na beto bantu zolaka kulanda lukutakanu yina ya distrike.” Na insi Mozambique mpi, bampangi fioti mpamba lendaka kuvanda ti makuki ya kusumba ba-apareyi ya me fwana yina bo lenda sadila sambu na kulanda lukutakanu ya distrike, katula Internet yina kele ntalu mingi.

 Mutindu maladi ya COVID-19 panzanaka na ntoto ya mvimba, bashene ya televizio mpi baradio vandaka dezia kutula balukutakanu na beto ya dibundu. a Bampangi na beto lombaka batelevizio mpi baradio yina na kuyika ntangu ya nkaka na zulu ya ntangu yina bo me tulaka na mpila nde bantu kulandaka lukutakanu na beto ya distrike

 Na Malawi, bampangi na beto kutanaka ti diambu mosi ya mpasi. Mbala mingi, bashene ya televizio mpi baradio me bakaka lukanu nde bo fwete tulaka konso manaka yina na televizio to na radio kaka na ngunga mosi. Bo me bakaka lukanu yina sambu bo ke bangaka nde kana manaka mosi buna kele nda, bantu ta lemba mpi bo ta landa yo diaka ve. Kansi bampangi songaka bo nde kisalu ya beto ke salaka ke sadisaka bantu yonso. Ata ntangu bantu ke basikaka ve na banzo na bo (confinement), beto ke pesaka bo nsangu ya mbote yina ke katukaka na Biblia mpi yo ke sadisaka bo na kuvanda bantu ya mbote mpi na kuzinga na kiese na dibuta. Ntangu bo waka mambu yina, bo ndimaka kuyika bampangi bangunga ya nkaka na zulu ya yina bo me tulaka.

 Na insi Malawi, bo tulaka lukutakanu ya distrike na shene mosi ya televizio mpi na shene mosi ya radio. Bantu mingi kibeni ke landaka bashene yai na insi ya mvimba. Na insi Mozambique, bo tulaka lukutakanu ya distrike na shene mosi ya televizio mpi na bashene 85 ya radio.

 Na bansi yina zole, organizasio basisaka mbongo ya badolare b 28227 sambu bankwa ya televizio kutula lukutakanu ya distrike. Organizasio basisaka mpi mbongo ya badolare kiteso ya 2 777 sambu radio ya bansi yina kutula lukutakanu yina ya distrike.

 Bampangi na beto salaka ngolo sambu na kusadila na mutindu ya mbote mbongo ya makabu. Mu mbandu na insi Malawi, bo wakakanaka sambu bankwa ya baradio mpi ya batelevizio kukutisa ntalu. Bantu yai kitisaka ntalu tii na 30 %, yo salaka nde organizasio kusala ekonimi ya mbongo ya badolare 1 711. Na insi Mozambique, baradio ya nkaka ndimaka kukitisa ntalu sambu bantu me zabaka nde Bambangi ya Yehowa ke vandaka masonga mpi nde bo ke futaka mbongo na ntangu bo wakanaka ti bo.

 Bampangi na beto vandaka na kiese ya kulanda lukutakanu ya distrike na radio to na televizio. Patrick kele nkuluntu na Malawi, yandi ke tuba nde: “Beto ke pesa Nto-Kimvuka mersi sambu na yonso yina bo me sala sambu na beto na ntangu yai ya maladi me panzana na ntoto ya mvimba.” Isaac kele mpi na Malawi, yandi ke tuba nde: “Beto ke vandaka kaka ti radio, yo yina beto ke pesa organizasio ya Yehowa mersi mutindu yo me pesa beto nzila ya kulanda lukutakanu ya distrike na radio. Mutindu organizasio yidikaka mambu me sala nde dibuta na mono ya mvimba kulanda mbote lukutakanu ya distrike. Sambu na beto, yo vandaka kibeni kima ya ke monisa nde Yehowa ke zolaka bansadi na yandi.”

 Lukutakanu ya distrike 2020 vandaka lukutakanu ya ntete yina mpangi mosi ya ke longaka nsangu ya mbote landaka. Yandi ke tuba nde: “Mambu yonso yina bo salaka sambu beto landa lukutakanu ya distrike na televizio ke yibusa mono nde Yehowa kele Nzambi nkwa-ngolo yonso. Maladi yai me kanga yandi ve nzila kupesa beto madia ya kimpeve, mpi Yehowa me natila mono yo nkutu na salon na mono. Sambu na mono, yo kele kima yina ke monisa nde bansadi ya Yehowa ke zolanaka kibeni. Mono ke ndima kibeni nde yai kele dibundu ya kieleka.”

 Nkuluntu ya nkaka na zina ya Wyson ke tuba nde: “Mono ke pesa mpika ya kwikama mpi ya mayele mersi. Yandi ke lungisa bampusa na beto na zola yonso na ntangu yai ya maladi. Beto ke zingaka na bwala mosi ya kele na kati ya babwala yina bantu kele bansukami ya ngolo na ntoto ya mvimba. Mutindu bo yidikaka mambu sambu beto landa lukutakanu ya distrike na radio mpi na televizio me pesa bantu ya nkaka na kati na beto yina kele ve ti mbongo makuki ya kulanda mbote lukutakanu yai.”

 Sambu na lukutakanu ya distrike 2021, Komite ya Mitambusi mpi Komite Sambu na Kulonga me sala mpi nde mambu kusalama mutindu yo salamaka na 2020: Bo ta tula lukutakanu ya distrike na televizio mpi na radio na bisika ya nkaka. Mbongo yina bo ta pesa sambu bo tula manaka yai ta katuka na wapi? Yo ta katuka na makabu ya luzolo ya mbote yina bampangi ya ntoto ya mvimba ke tulaka. Bamingi ke pesaka makabu yango na donate.pr418.com. Beto ke pesa beno mersi sambu na kikalulu na beno ya kukaba.