Konso ngonda, beto ke vingilaka ti nzala ya ngolo manaka yina ke pesaka beto kikesa mpi bavideo yina bo ke songaka na JW Télédiffusion. Kansi, bampangi na beto mingi na Afrika lenda landa ve manaka yina na nzila ya Internet. Sambu na nki?

 Bansi mingi ya Afrika ke vandaka kibeni ve ti Internet. Mpi na bisika yina Internet kele, yo ke vandaka ve ya mbote to nkutu, yo ke vandaka ntalu mingi. Mu mbandu kilumbu mosi, nkengi mosi ya nziunga na insi Madagascar kwendaka na kisika yina Internet kele sambu na kubaka manaka yina ke basikaka konso ngonda na JW Télédiffusion. Yandi futaka mbongo badolare 16. Ntalu ya mbongo yina me luta mbongo yina bantu ya nkaka ke zwaka na mposo mosi. a

 Ata Internet kele mpasi, bamilio ya bantu na Afrika lenda landa sesepi manaka ya JW Télédiffusion kukonda kusadila Internet. Inki mutindu?

 Banda na 2017, bantu yina ke zingaka na bansi ya Afrika yina kele na sudi ya Sahara ke landaka JW Télédiffusion na nzila ya satelite. Bantu lenda landa shene yango konso mposo na bandinga 16 kukonda kufuta mbongo.

 Sambu na kusadisa bantu na kulanda manaka yina, Bambangi ya Yehowa ke futaka mbongo sambu televizio mosi kusongisa manaka yango na nzila ya satelite. Satelite yina bo ke sadilaka ke kumaka na bansi ya Afrika kiteso ya 35 yina kele na sudi ya Sahara. Beto ke futaka konso ngonda mbongo badolare kuluta 12000. Konso mbala, beto ke yikaka mbongo ya nkaka sambu bo songa balukutakanu ya nkaka na shene ya nkaka kaka ntangu yo ke salama. Yo ke sadisaka bantu mingi na kulanda manaka ya balukutakanu ya distrike to bamanaka ya nkaka ya sipesiali yina ke salamaka ntangu mpangi mosi ya kele na kati ya bampangi yina bo me pesaka mukumba ya kukwenda kutala Babetele me kwenda kutala Betele mosi.

 Bantu mingi yo vanda bayina kele ve Bambangi ya Yehowa ke talaka shene yina ya JW na televizio na nzo. Kansi, bampangi na beto mingi kele ve ti makuki ya kusumba ba-apareyi yina yo ke lombaka kuvanda ti yo sambu na kulanda shene yina na satelite. Sambu na kusadisa bo, bo me tulaka ba-apareyi yango yina na Banzo ya Kimfumu kuluta 3670 sambu na kusadisa bampangi-bankento mpi bampangi-babakala na kulanda JW Télédiffusion kuna. Kana Nzo ya Kimfumu kele dezia ti televizio to apareyi ya kusongila bifwanisu (projecteur), yo ke lombaka mbongo badolare 70 sambu na kusumba ba-apareyi yina ya nkaka. Kana nde Nzo ya Kimfumu kele ve ti bima yina, yo ke lombaka mbongo badolare 350 sambu na kusumba ba-apareyi yonso.

 Bampangi na beto ya babakala mpi ya bankento ke monisaka ntonda mingi sambu na shene yina. Nkuluntu mosi ya insi Cameroun ke tuba nde: “Yo kele bonso mana na kati-kati ya ntoto ya zelo na zelo sambu na dibuta na beto.” Odebode, mpangi-bakala mosi na insi Nigéria ke tuba nde: “Beto ke talaka shene yina na dibuta mbala tatu konso mposo. Bana na mono ke vingilaka ti nzala ya ngolo bantangu yina. Nkutu bo ke lombaka nde bo tala mpi shene yina ya JW na bantangu ya nkaka.” Rose ke zingaka mpi na Nigéria. Yandi ke tuba nde: “Na kisika ya kulanda bansangu ntangu yonso na televizio, mono me kumaka kulanda shene ya JW na satelite. Kana mono ke landa bansangu, mono ke waka makasi kukonda mpasi sambu na mambu ya mono ke monaka ebuna tansio na mono ke mataka. Kansi JW Télédiffusion ke pesaka kibeni kikesa mpi ngemba. Yo kele shene ya mono ke zolaka mingi. Yo kele lusakumunu ya nene ya me katuka na Yehowa.”

 Nkengi mosi ya nziunga na insi Mozambique ke tuba nde na nziunga na yandi, bo me tulaka ba-apareyi na Banzo ya Kimfumu sambu na kubaka shene yina na satelite. Bampangi ya kele na mabundu yina ke kwisaka ngunga mosi to bangunga mingi na ntwala nde balukutakanu kuyantika sambu na kulanda JW Télédiffusion na nzila ya satelite.

 Sambu na lukutakanu ya bansi mingi yina salamaka na Johannesburg na Afrique du Sud, bo sadilaka shene yina sambu bampangi kulanda badiskure ya nene, mu mbandu badiskure yina mpangi mosi ya Nto-Kimvuka salaka. Bampangi landaka yo na bisika uvwa. Sphumelele ke sadilaka Yehowa na Departema ya Ke Talaka Mambu ya télédiffusion na Afrique du Sud. Yandi ke tuba nde: “Ntete, beto vandaka kusala nde bantu kulanda badiskure na nzila ya Internet. Kansi yo ke lombaka kuvanda ti Internet ya mbote mpi kufuta mbongo. Shene JW na satelite kele ve ntalu mpi yo kele mbote.”

 Na nsadisa ya makabu yina beno ke pesaka na luzolo sambu na kupesa maboko na kisalu yina ke salama na ntoto ya mvimba, bampangi na beto mingi ya babakala mpi ya bankento na Afrika ke landa JW Télédiffusion na nzila ya satelite. Beto ke pesa beno mersi sambu na makabu yina beno ke pesaka na nzila ya bametode ya mutindu na mutindu yina kele na donate.pr418.com.