BAMPANGI YINA KE YAMBA BANTU Kisalu ya bampangi yina ke yamba bantu kele ya kusadisa beno. Beto ke lomba beno na kuwakana mbote ti bo mpi kulanda lutwadisu yina bo ke pesa beno na yina me tala parking, kutwadisa bantu, kubumba bisika ya kuvanda mpi mambu ya nkaka.

MBOTIKA Bakiti yina bo ta bikisa sambu na bampangi yina ta baka mbotika ta vanda na ntwala ya estrade katula kaka kana bo me songa kisika ya nkaka. Bampangi yina ta baka mbotika fwete vanda pana na ntwala nde diskure ya mbotika kuyantika na Mposo na ntwala ya midi. Konso muntu fwete nata lele na yandi ya kudipila masa mpi lele ya mbote sambu na kubakila mbotika.

MAKABU Mbongo basikaka mingi sambu na kuzwa bisika ya mbote ya kuvanda, baapareyi ya sonorizasio mpi kusala bisalu mingi ya nkaka sambu beto landa lukutakanu yai ya distrike na kiese mpi beto pusana pene-pene ya Yehowa. Makabu na beno ya luzolo ya mbote ke sadisaka na kuvutula mbongo yina basikaka mpi kupesa maboko na kisalu yina ke salama na ntoto ya mvimba. Sambu na kusadisa beno, bakesi ya makabu yina bo me sonikaka pwelele kele na bisika yonso na kati ya lupangu yai. Beno lenda pesa mpi makabu na nzila ya Internet na donate.pr418.com. Beto ke sepelaka mingi ti makabu yonso ya beno ke pesaka. Nto-Kimvuka ke pesa beno mersi mutindu beno ke pesaka makabu sambu na kupesa maboko na mambote ya Kimfumu.

LUSADISU YA NTETE Beno vila ve nde yo kele sambu na kusansa kaka bamaladi yina muntu me bela na kintulumukina.

BIMA YINA VILAKA YINA BO LOKUTAKA Bima yonso yina munkwa na yo me monana ve, beno fwete nata yo na departema ya Bima Yina Vilaka Yina Bo Lokutaka. Kana nge me vidisa konso kima yina, kwenda kusosa yo na departema yai. Bana yina me vila kisika bibuti na bo kele, beno fwete nata bo mpi na departema yai. Kansi, sambu mambu ya mutindu yai kusalama ve, beto ke lomba beno na kukengila bana na beno mbote-mbote mpi na kuvanda kisika mosi ti bo.

BISIKA YA KUVANDA Beto ke lomba beno na kuzitisa bantu ya nkaka. Kuvila ve nde, nge lenda bumba bisika ya kuvanda kaka sambu na bantu yina ke kwisa kumosi ti nge na kamio, bayina nge ke zingaka ti bo nzo mosi, to bayina ke longukaka Biblia ti nge. Kutula ve bima na zulu ya bakiti yina nge ta vandila ve.

KISALU YA LUZOLO YA MBOTE Kana nge ke zola kupesa maboko na kisalu yina ta salama na lukutakanu yai ya distrike, zabisa bantu ya Departema ya Baluzayisu mpi ya Kisalu ya Luzolo ya Mbote.