Bampeve ke bigangwa ve ya kuvandaka ntete mpi kufwãka na ntoto

Bampeve kele. Na nsi ya bigangwa ya kimpeve ya konda kumonana, ikele na bampeve ya mbote mpi ya imbi. Keti bau vandaka ntete bantu ya vandaka kuzinga mpi bau fwãka na ntoto?

Ve. Ya kuswaswana na mutindu bankaka keyindulaka, kana muntu mefwa ke na sika mosi ve ya kimpeve yandi kekwendaka. Inki mutindu beto kezaba yau? Sambu Bible ketubila yau. Bible ke mukanda ya kyeleka ya mekatuka na Nzambi mosi kaka ya kyeleka, ya ke na zina Jéhovah. Jéhovah gangaka bantu; yandi kezaba mbotembote inki kekumilaka bau na ntangu bau kekufwa.​—⁠Nkunga 83:18; 2 Timote 3:⁠16.

Bible ketuba nde Nzambi gangaka Adam, muntu ya ntete, “na mfututu ya ntoto.” (Genese 2:⁠7) Yandi tulaka yandi na Paladisu, kilanga ya Edeni. Kana Adam lemfukaka na nsiku ya Jéhovah, nga yandi lendaka kufwa ve; tii bubu yai, yandi lendaka vanda ke na kuzinga na ntoto. Kansi ntangu, yandi kululaka na luzolo nandi mosi nsiku ya Nzambi, Nzambi tubilaka yandi nde: “Nge [tavutuka] na ntoto, sambu nge mekatuka na yau. Sambu nge ke mfututu mpi nge tavutuka na mfututu.”​—⁠Genese 3:⁠19.

Yau kezola tuba inki? Beto yindula fyoti: Adam vandaka wapi ntangu Jéhovah gangaka yandi na mfututu? Sika mosi ve. Yandi vandaka ve, na zulu, mpeve ya bingamaka sambu na kubutuka. Yandi vandaka sika mosi ve. Ntangu Jéhovah tubaka nde Adam ‘tavutuka na ntoto,’ yandi zolaka tuba nde yandi takufwa. Adam kukwendaka ve na nsi ya kimpeve. Na lufwa, yandi kitukaka kima ya mpamba, ya ikele  ve. Lufwa, ke kikalulu ya kukonda luzingu.

A ebwe sambu na bafwa yankaka? Keti bau mpi sukaka na kuzinga? Tala mvutu ya Bible:

“Bau yonso [bantu na bambisi] kekwendaka kaka sika mosi. Bau yonso mekatuka na mfututu, yempi bau yonso kevutukaka na mfututu.”​—⁠Mpovi 3:⁠20.

“[Ba] fwa  . . . kezabaka ata kima mosi ve.”​—⁠Mpovi 9:⁠5.

“Zola na bau, kimbeni na bau, mpi kimpala na bau mefwa.”​—⁠Mpovi 9:⁠6.

“Kisalu kele ve, ngindu kele ve, ngangu kele ve, mayele kele ve na Schéol [mazyami], sika nge kekwenda.”​—⁠Mpovi 9:⁠10.

“[Muntu] kevutuka na ntoto; kilumbu yina bangindu nandi yonso tafwa.”​—⁠Nkunga 146:⁠4.

Keti nge kemona mpasi na kundima mikapu yai? Kana nde ee, yindula fyoti dyambu yai: Na mabuta mingi, bakala muntu kesosaka mbongo sambu na kulungisa nsatu ya bantu ya dibuta nandi. Mpi kana nde yandi  kufwa, mbala mingi dibuta nandi takutana na bampasi. Mbalankaka, nkento nandi mpi bana nandi takonda ata kima ya kudisumbila madya. To mbalankaka mpi bambeni ya bakala yai tanyokula bau ngolo kibeni. Nge kudiyufula fyoti: ‘Kana bakala yina ke na kuzinga na nsi ya bafwa, sambu na inki yandi lenda fula ve na kupesa bantu ya dibuta nandi bima yina bau ke na yau mfunu? Sambu na inki yandi lenda ve kutanina bau na bantu ya imbi ya mpidina?’ Ikele sambu nde Masonuku menunga: muntu yina ke na luzingu ve, lenda sala ata kima mosi ve.​—⁠Nkunga 115:⁠17.

Keti yau zola tuba nde bafwa tazingaka dyaka ve? Ikele ve. (Beto tatubila lufutumuku na mwa ntwala.) Kansi, yau zola tuba nde, bafwa kezabaka ve yina nge kesala. Bau lenda mona nge ve, lenda wila nge ve to kutubila nge ve. Yau ke mfunu ve nde nge tita bau to nge kuwa boma sambu na bau. Bau lenda sadisa nge ve, yempi bau lenda sala nge imbi ve.​—⁠Mpovi 9:4; Isaya 26:⁠14.

[Kifwanisu ya kele na lutiti 4]

Adam katukaka na mfututu; yandi vutukaka na mfututu

[Kifwanisu ya kele na lutiti 5]

Kaka bantu kezinga lenda sala bima yai yonso

[Kifwanisu ya kele na lutiti 6]

Bafwa lenda ve kusadisa bantu yina ke na nzala to lenda ve kutanina bantu yina mekuma na kigonsa