Bampeve ya imbi kemonisaka bonso nde bafwa kezingaka

Bible ketuba nde Satana ke “mukusi ya bantu yonso.” (Nzayikusu 12:⁠9) Satana na bampeve ya imbi nandi kezola ve nde beto ndima Ndinga ya Nzambi, Bible. Bau keyunsa na kundimisa bantu nde bafwa ke na kuzinga sika yankaka ya kimpeve. Beto zikisa fyoti inki mutindu bau kesalaka.

Mabundu ya luvunu

Mabundu mingi kelonga nde muntu ke na moyo yina, na nima ya lufwa ya nitu ya kinsuni, yau kekwendaka na nsi ya kimpeve. Bau kelongaka nde nitu kefwãka, kansi nde moyo kefwãka ve. Dyaka, bau kendimaka nde moyo lenda fwa ve, nde yau kefwãka ve.

Kansi ikele yau ve Ndinga ya Nzambi kelonga. Kansi, Bible kemonisa nde moyo, ke muntu yandi mosi, kansi ikele ve nde mwa kima mosi ya nkaka ke na kati ya muntu. Mumbandu, na ntendula mosi ya kugangama y’Adam, Bible ketuba nde: “Ebuna Jéhovah Nzambi salaka muntu na mfututu ya ntoto yempi yandi tulaka na mbombo nandi mpema ya luzingu, ebuna muntu kitukaka moyo ya kezinga.”​—(Genese 2:⁠7) Buna, Adam kubakaka ve moyo; yandi vandaka moyo.

 Bambisi mpi mebingama myoyo.​—⁠Genese 1:20, 21, 24, 30.

Sambu ngogo ya Bible “moyo” kezola tubila muntu yandi mosi, beto lenda yituka ve na kuwa nde myoyo kefwaka. Masonuku ketuba nde:

“Moyo yina kesala disumu​—⁠yandi, yandi takufwa.”​—⁠Ezekiel 18:⁠4.

“Ebuna Samsoni tubaka nde: ‘Bika moyo na mono kufwa nzila mosi na bafilistia!’”​—⁠Bazuzi 16:⁠30.

“Keti nzila mepesama, na sabata, na kusala kisalu ya mbote to na kusala kisalu ya imbi, na kugulusa moyo to na kufwa yau?”​—⁠Malako 3:⁠4.

Mikapu yankaka ya Bible kemonisa nde bau lenda kufwa moyo (Genese 17:14), bau lenda kufwa yau na mbele (Yosua 10:37), lenda kufwa yau na menga ya kukonda kubasika (Yobo 7:15), lenda kudinda na masa (Yonasi 2:⁠5). Na yau, moyo kefwãka.

Kana nge tanga Bible na luyantiku tii na nsuka na yau, nge tamona ve ntubilu “moyo ya konda kufwa.” Moyo ya muntu ke mpeve ve. Dilongi ya moyo ya konda kufwa ke dilongi ya Bible ve. Kele dilongi ya Satana na bampeve ya imbi nandi. Jéhovah mebuya luvunu yonso ya mabundu.​—⁠Bingana 6:16-19; 1 Timote 4:1, 2.

 Ba médiums

Satana ke na nzila yankaka dyaka ya yandi kekusaka bantu: ba médiums. Médium ke muntu yina lenda baka bansangu ya mekatuka kibeni na bampeve ya imbi. Bantu mingi, na ba médiums yango bau mosi, kebanzaka nde bansangu yina kekatukaka na bampeve ya bafwa. Kansi, mutindu beto memona yau na Bible, yau lenda salama ve.​—⁠Mpovi 9:5, 6, 10.

Ebuna, na nani bansangu yina kekatukaka? Na muntu yankaka ve kaka na bampeve ya imbi. Bampeve ya imbi ke na ngolo ya kutala luzingu ya bantu ntangu bau ke na kuzinga; bau kezaba inki mutindu muntu vandaka kutuba, luse nandi vandaka inki mutindu, inki yandi vandaka sala mpi yina yandi vandaka kuzaba. Yau ke mpasi sambu na bau na kulanda bantu yina mefwãka.​—⁠1 Samuel 28:3-19.

 Bankenda ya luvunu

Satana ke na nzila yankaka sambu na kunungisa luvunu nandi na yina ketadila bafwa: bankenda ya luvunu. Mbala mingi, bankenda yina ya luvunu kekangaka bantu nzila na kundima Bible.​—⁠2 Timote 4:⁠4.

N’Afrika ikele na bankenda mingi nde bantu lenda kutana na nima ya lufwa na bau. Mbala mingi bau kemonaka bau ntama na bisika ya bafwa yina vandaka kuzinga ntete na ntwala ya lufwa na bau. Kansi nge kudiyufula bangyufula yai: ‘Keti yau ke dyambu ya mayele na kuyindula nde muntu yina ke na ngolo ya kukatuka tuka bafwa lenda sala yau na sika yankaka ya ntama na dibuta nandi mpi na banduku nandi?’

Dyaka, yau lenda vanda mpi nde muntu yina kemonana bonso muntu yina mefwãka. Mumbandu, ntangu bau vandaka kusamuna na bwala, bakristu zole monaka mununu mosi ya bakala vandaka kulanda bau na nima tuka mwa bangunga mingi. Bau yufulaka yandi kikuma yandi vandaka landa bau, mpi muntu yina vutulaka nde yandi monaka mosi na bau bonso mpangi nandi ya mefwãka mwa bamvu meluta. Kyeleka, yandi kudikusaka, kansi yandi buyaka na kundima yau. Yindula fyoti yina mbuta muntu yina zabisaka na nima na banduku nandi mpi na bamfinangani!

 Bamonameso, bandosi mpi mingóngó

Na ntembe ve nge mewãka mbalankaka bantu ketuba nde bau monaka, kuwãka to kulalaka ndosi ya mambu ya ngituka. Bayina kekutanaka na mambu ya bampeve ya imbi kevandaka na boma ya ngolo. Marein, yina kezingaka n’Afrika ya weste, vandaka kuwa mbala na mbala mungóngó ya nkaka nandi ya nkento ya mefwãka ya vandaka kubinga yandi na mpimpa. Na boma yina Marein kutulaka mulolo mpi vumulaka bantu ya nzo na bau. Na nima yandi kumaka zobazoba.

Bubu yai, kana nde bafwa vandaka na luzingu ya kyeleka, keti yau ke dyambu ya mayele na kuyindula nde bau lenda bangisa bantu yina bau kezolaka? Ata fyoti ve. Ikele bampeve ya imbi kebasisaka bansangu ya imbi ya mutindu yai.

Ebuna, inki beto tatuba sambu na bansangu yina kemonanaka bonso nde yau kepesa lusadisu to ke ya mbote? Mumbandu, na Sierra Leone, Gbassay vandaka kebela. Yandi lalaka ndosi yempi monaka tata nandi ya mefwãka kezabisa yandi nde: yandi fwetele kwenda na nti mosi, yandi baka dititi na yau, yandi vukisa yau ti masa ebuna yandi kunwa yau yonso. Na ntwala ya kusala yau yandi fwanaka kutubisa muntu ve. Yandi landaka bantuma yina yempi yandi gulukaka.

Nkento yankaka ketuba nde bakala nandi, ntangu yandi kufwãka, yandi basikilaka yandi na mpimpa.  Yandi ketendula nde yandi vandaka kitoko mpi vandaka na bilele ya kitoko.

Bansangu yina mpi bamonameso yina kemonanaka bonso ke ya mbote mpi ya mfunu. Keti yau kekatukaka na Nzambi? Ve. Jéhovah ke “Nzambi ya kyeleka.” (Nkunga 31:⁠5) Ata fyoti ve yandi lenda yangalala ve na kutudila beto mitambu to na kukusa beto. Kaka bampeve kesalaka yau.

Kansi keti bampeve ya mbote kele? Ve. Ata bau kemonanaka bonso bampeve mosi ya mfunu, bau kele imbi. Ntangu Diabulu tubaka na Eva, yandi monanaka bonso nduku. (Genese 3:⁠1) Kansi yandi kumaka inki na nima ya kuwila yandi mpi na nima ya kusala yina yandi songaka yandi? Yandi fwãka.

Nge kezaba nde yau ke mpasi na muntu ya imbi na kukituka bonso nduku na bantu yina yandi kezola kukusa. Kingana mosi y’Afrika ketubaka nde: “Meno ya mpembe, ntima ndombe.” Kansi Ndinga ya Nzambi ketuba nde: “Satana kibeni kekitukaka bonso wanzyo ya nsemo.”​—⁠2 Korinte 11:⁠14.

Nzambi kesadilaka dyaka ve bandosi, bamonameso to mingóngó ya bampeve sambu na kusolula na bantu awa na ntoto. Yandi ketwadisa bau mpi kepesa bau bandongisila na nzila ya Bible, ya lenda kumisa muntu “ya lunga sambu na bisalu yonso ya mbote.”​—⁠2 Timote 3:⁠17.

Na yau, ntangu Jéhovah kekebisa beto na mayele ya imbi ya Diabulu, ikele nde sambu yandi kezola beto. Yandi kezaba nde bampeve ya imbi ke bambeni na beto ya nene.

[Kifwanisu ya kele na lutiti 13]

Bantu, bambisi, bambisi ya masa mpi bandeke: bau yonso ke myoyo

[Bangogo ya kemonisa kisina ya foto]

Na lusadisu ya bafoto yina bakamaka na IRIS-EXPORT MEXICHROME

[Kifwanisu ya kele na lutiti 14]

Bible kemonisa nde moyo kekonda kufwa ve

[Kifwanisu ya kele na lutiti 15]

Bampeve ya imbi kekusaka mpenza nde bau ke bampeve ya bafwa

[Kifwanisu ya kele na lutiti 16]

Bankaka ketubaka nde bau memonaka bantu ya mekatuka na bafwa

[Kifwanisu ya kele na lutiti 17]

Bampeve ya imbi kekusaka bantu na bandosi, na bamonameso, mpi na mingóngó

[Kifwanisu ya kele na lutiti 18]

Satana tubaka na Eva nde yandi takufwa ve. Eva kwikilaka yandi, kansi na nsuka yandi fwãka