Bampeve ya imbi kesyamisaka bantu na kubendumuka na Nzambi

Kansi sambu na inki Satana mpi bampeve ya imbi nandi medasuka na kukusa bantu mpidyai? Sambu bau kezola benda bantu na kulanda mbendumuka na bau. Bau kezola nde beto sambila bau. Bau kezola nde beto kundima luvunu na bau mpi nde beto sala mambu yina keyangidisa Jéhovah ve. Kati na mambu yina, ikele na mambu mingi ya kinkulu to nsiku ya bambuta ya ikele na ngwizani na bafwa.

Lufwa ya muntu yina mezolama mingi kepesaka kyadi mingi. Kumonisa mawa sambu na muntu yina mefwa to kudila ke dyambu mosi ya imbi ve. Yezu “dilaka” na lufwa ya Lazare, nduku nandi.​—⁠Yoane 11:⁠35.

Ikele na binkulu mingi sambu na yina ketadila lufwa, mpi ya meswaswana mingi na ntoto ya mvimba. Mingi kati na yau kele imbi ve na minsiku ya Bible; kansi, bansadilu yankaka ke na lufulu nde bafwa kezingaka na nima ya lufwa mpi nde bau lenda mona bazinga. Kulala na mafwa, kulutisa ndilu na kusala matanga mpi bamambu kidikidi ya kelutaka na ntangu ya kuzika mvumbi yonso yina ke na kisina nde boma ya bampeve ya bafwa. Na yau, sambu bafwa “kezabaka kima mosi ve,” bayina kesalaka mambu yai kenungisa luvunu ya Satana.​—⁠Mpovi 9:⁠5.

 Binkulu yankaka to bansadilu yankaka ya matanga kekatukaka na kundima nde bafwa ke na mfunu ya bazinga mpi nde kesalaka imbi na bazinga kana bau kulembika ntima na bau ve. Na ba nsi yankaka, bau kesalaka feti mpi ketambikaka bimenga na nima ya bilumbu 40 to mvula mosi ya lufwa ya muntu yina. Feti yina mpi bimenga yina yau kesalamaka sambu na kusadisa muntu ya mefwa sambu na ‘kuluta’ tii na nsi ya bampeve. Mbala mingi mpi yau kemonanaka nde bantu ketiamuna masa to malafu na ntoto to madya sambu muntu yina mefwa.

Bima ya mpidyai ke mbote ve sambu yau kenungisa luvunu ya Satana na yina ketadila bafwa. Keti Jéhovah lenda zola nde beto vukana na mambu ya kinkulu mutindu yau metendulama na Bible? Ata fyoti ve!​—⁠2 Korinte 6:14-18.

Bansadi ya Nzambi ya kyeleka kevukanaka ve na mambu yonso yina kenungisa luvunu ya Satana. Na yau, na zola yonso, bau kesadisaka bazinga mpi kekatulaka bau na ntantu. Bau kezaba nde kaka Jéhovah yandi mosi lenda futumuna muntu yina mefwa.​—⁠Yobo 14:14, 15.

 Lusambu ya bampeve ya imbi mebuyama na Nzambi

Bantu yankaka kevandaka na bangwizani mbala mosi na bampeve ya imbi, to na nzila ya médium. Yau kebingamaka nde lusambu ya bampeve ya imbi. Vaudou, kindoki, magie, kusala kinganga-ngombo mpi kusolula na bafwa ke mitindu ya lusambu ya bampeve ya imbi.

Bible kebuya mambu yina na bangogo yai: “Na kati na beno muntu lenda monana ve ya kesala  . . . kinganga-ngombo, to bayina ketubaka mambu kekwisa na ntwala, to bandoki, to nganga-nkisi, to yina kezabisa mambu takwisa na nima, to bayina keyufulaka bafwa. Bayina yonso tasala mambu yai Jéhovah mebuya bau.”​—⁠Deteronome 18:10-12.

Sambu na inki Jéhovah kekebisa beto ngolo na kusala bansadilu yai?

Sambu na mambote na beto, Jéhovah kekebisa beto na mitindu yonso ya lusambu ya bampeve ya imbi. Yandi kezola bantu mpi  kekudibanzaka mingi sambu na bau, yempi yandi kezaba nde bayina kele na bangwizani na bampeve ya imbi kekudibendila bampasi.

Mumbandu dyambu ya kumilaka Nilda, médium ya Brésil. Bampeve ya imbi bebisaka luzingu nandi. Yandi tubaka nde: “Mono vandaka na maboko ya bampeve  . . .  bau vandaka kupesa mono bantuma. Mono vandaka ntangu yankaka na kansansa ya mbote ya kezaba kima, ntangu yankaka kansansa na mono vandaka kuzaba ata kima mosi ve, ye mono kotaka lupitalu sambu na mitungisi ya mabanza. Bampeve ya imbi pesaka mono mpasi mingi mpi ba nerfs na mono kubelaka. Mono yantikaka na kunwa bankisi mpi na kunwa malafu mbala na mbala kukonda kusukisa. Yempi yau salaka bamvula mingi.”

Ebuna, na lusadisu ya Jéhovah mpi ya ba Témoins nandi ya ikele na ntoto, Nilda katukaka na bupusi ya bampeve ya imbi. Bubu yai, yandi ke na luzingu mosi ya mbote mpi ya kyese mingi. Yandi ketuba nde: “Mono kepesa ndongisila na muntu yonso nde: beno meka ve na kuwakana na bampeve [ya imbi], ata sambu na mwa ntangu fyoti.”

[Kifwanisu ya kele na lutiti 19]

Binkulu yankaka kisina na yau kele nde bafwa lenda mona beto, yau ke luvunu

[Kifwanisu ya kele na lutiti 20]

Binkulu yankaka metungama na dilongi yai nde bafwa ke na mfunu ya lusadisu na beto, yau ke luvunu

[Kifwanisu ya kele na lutiti 21]

Nzambi kezolaka ve mambu yai. Yandi kelomba nde beto kangama kaka na yandi mosi.​—Esode. 20:5

[Kifwanisu ya kele na lutiti 22]

Mbala mingi, bampasi kekumilaka bantu yina kesadilaka lusambu ya bampeve ya imbi. Bau lenda vidisa nzo na bau, kimpwanza na bau, ata mpi luzingu na bau