Sadila Jéhovah, Satana ve

Beto yonso fwete pona. Kana beto kesadila Jéhovah, to beto kesadila Satana na bampeve nandi ya imbi. Beto lenda sadila bau zole ve sika mosi. Kansi yau ke dyambu ya mayele na kusadila Jéhovah!

Jéhovah ke mbote

Mutindu beto yitaka kumona yau, bampeve ya imbi keyangalalaka na kusala bantu imbi mpi na kukusa bau. Jéhovah kesalaka mpidyai ve. Yandi kezolaka bantu mutindu tata kezolaka bana nandi. Yandi kele Yina kepesaka “makabu ya mbote mpi ya lunga.” (Yakobi 1:17) Yandi kebuyisaka bantu ata kima mosi ve, ata yau kele mpasi mingi sambu na yandi.​—Efeso 2:4-7.

Yindula fyoti bima yina Yezu, Mwana ya Nzambi, salaka na ntoto. Yandi pesaka dyaka na ba bába ndinga mpi na bantu ya kufwa meso ngolo ya kumona. Yandi gulusaka bantu ya maladi ya wazi mpi bantu ya makulu ya kifu. Yandi basisaka bampeve ya imbi mpi gulusaka bamaladi ya mitindu yonso. Na ngolo ya Nzambi, yandi futumusaka mpi bafwa .​—Matai 9:32-35; 15:30, 31; Luka 7:11-15.

Na sika ya kuta luvunu sambu na kukusa beto, Nzambi ketubaka ntangu yonso kyeleka. Yandi kekusaka ata muntu mosi ve.​—Ntalu 23:⁠19.

 Losa bisalu ya kusumuka

Mutindu buteke ya yuyu kekangaka nzinzi, kiteso mosi mpi bindimandima mpi luvunu mekanga bamilyo ya bantu bonso na boloko. Bau ke na boma ya bafwa. Bau ke na boma ya bampeve ya imbi. Bau kekudibanza mingi ye kebanga sambu na kuloka, sambu na mambu takwisa na nima, sambu na kindoki mpi sambu na bankisi. Bau ke bampika ya bindimandima mpi ya binkulu ya bambuta ya metungama na luvunu ya Satana Diabulu. Bansadi ya Nzambi mekangama na mutambu ata mosi ve ya mambu yai.

Jéhovah meluta Satana na ngolo. Kana nge sadila Jéhovah, yandi tatanina nge na bampeve ya imbi. (Yakobi 4:⁠7) Bau lenda loka nge ve. Mumbandu, na Nigeria, bandoki tatu ya nene zolaka kuloka Témoin de Jéhovah mosi ya kubuyaka na kukatuka na mbanza sambu nde yandi kufwa. Ntangu bau monaka nde nkisi yango mesala kima mosi ve, mosi na bau kuwãka boma mingi, yandi kwendaka kukutana na Témoin yina mpi yandi dodokilaka yandi sambu yandi kulolula yandi.

Kana bampeve ya imbi ketungisa nge, nge lenda binga Jéhovah na zina nandi kibeni mpi yandi tatanina nge. (Bingana 18:10) Kansi sambu na kubaka lutaninu ya Nzambi, nge fwete kabwana mvimba na yonso yina ke na ngwakana na lusambu ya bampeve ya imbi. Ikele yau, ntama, dyambu ya bansambidi ya Nzambi na bwala Efeso kusalaka. Bau vukisaka mikanda na bau yonso ya magie mpi bau yokaka yau tiya. (Bisalu 19:19, 20) Bubu yai, bansadi ya Nzambi fwete sala kiteso mosi mpi. Yambula kindoki, bankisi, bansinga ya “kuditanina,” mikanda ya magie mpi kima yonso yina kele na ngwizani na bisalu ya bampeve ya imbi.

 Sadila lusambu ya kyeleka

Kana nge kezola kuyangidisa Nzambi, yau mefwana kaka ve nde nge yambula mpi nge sukisa na kufula na kusala mambu ya imbi. Nge fwete sadila lusambu ya kyeleka ya vedila. Bible kesonga yina nge fwete sala:

 Vukana na ba Témoins de Jéhovah

Satana na bampeve ya imbi nandi ke na bantu awa na ntoto ya kelonga mpi kesala mambu ya imbi. Kansi Jéhovah mpi ke na bansadi. Ikele ba Témoins de Jéhovah. (Isaya 43:10) Na ntoto ya mvimba, bau meluta bamiliyo sambanu. Bau kesalaka kikesa na kusala mambu ya mbote mpi na kulonga kyeleka na bantu. Na ba nsi mingi, nge lenda kutana na bau na Salle du Royaume na bau, sika wapi bau tayamba nge na kyese yonso.

Kisalu na bau ke ya kusadisa bankweno na bau na kusadila Nzambi. Bau talonguka Bible kumosi na nge, na nzo na nge, bau tasadisa nge na kuzaba inki mutindu nge lenda sambila Jéhovah mutindu mosi ya mbote. Nge tafuta kima mosi ve. Ba Témoins ke na kyese ya kulonga kyeleka sambu bau kezolaka mfinangani na bau mpi bau kezolaka Jéhovah Nzambi.

[Kifwanisu ya kele na lutiti 23]

Yezu, Mwana ya Nzambi, monisaka zola na bantu na kugulusaka bimbefo na bau

[Kifwanisu ya kele na lutiti 24]

Bantu ya Efeso yokaka na tiya mikanda na bau ya magie

[Kifwanisu ya kele na lutiti 25]

Kulonguka Bible.—Yoane 17:3

[Kifwanisu ya kele na lutiti 25]

Kuvukana na balukutakanu ya bukristu.—Ebeleo 10:24, 25

 [Kifwanisu ya kele na lutiti 26]

Kusamuna nsangu na bantu yankaka.—Matai 24:14

[Kifwanisu ya kele na lutiti 26]

Kusambila Jéhovah.—Filipo 4:6, 7

[Kifwanisu ya kele na lutiti 26]

Kubaka mbotika.—Bisalu 2:41

[Kifwanisu ya kele na lutiti 27]

Ba Témoins de Jéhovah tasadisa nge na kusadila Nzambi