YEZU vandaka kutubila kisambu mbala mingi. Na bilumbu na yandi, bamfumu ya mabundu ya Bayuda vandaka kusamba “na mampambu [kisika banzila me kutana] ya banzila ya nene.” Sambu na nki? “Sambu bantu kumona bo.” Ntembe kele nde bo vandaka kusala buna sambu bantu kumona nde bo vandaka kudipesa na bisambu. Mingi na kati na bo vandaka kusala bisambu ya nda mpi kuvutukila mambu ya mutindu mosi bonso nde Nzambi ta wa bo kaka sambu “bo ke sadila bangogo mingi.” (Matayo 6:5-8) Yezu monisaka pwelele nde kusala mutindu yai kele ve na mfunu. Yandi salaka mutindu yai sambu na kusadisa bantu ya ntima-masonga na kuzaba mambu yina bo fwete sala ve ntangu bo ke samba. Kansi yandi sukaka ve kaka na kusonga bo mambu ya bo fwete sala ve ntangu bo ke samba.

Yezu longaka nde beto fwete monisa na bisambu na beto nde beto ke zola mpenza nde zina ya Nzambi kusantisama, Kimfumu na yandi kukwisa mpi nde luzolo na yandi kusalama. Yezu longaka mpi nde beto fwete lomba Nzambi na kupesa beto bima ya beto kele na yo mfunu. (Matayo 6:9-13; Luka 11:2-4) Yezu pesaka bambandu ya monisaka nde kana beto ke zola nde Nzambi kuwa bisambu na beto, beto fwete monisa kukanga ntima, lukwikilu mpi kudikulumusa. (Luka 11:5-13; 18:1-14) Katula kulonga, Yezu yandi mosi vandaka kupesa mbandu ya mbote na diambu yango.—Matayo 14:23; Marko 1:35.

Ntembe kele ve nde mambu yina Yezu longaka sadisaka balongoki na yandi na kukuma kusala bisambu ya mbote. Kansi Yezu vingilaka tii na mpimpa ya kilumbu na yandi ya nsuka awa na ntoto sambu na kulonga bo kima mosi ya mpa mpi ya mfunu mingi sambu na kisambu.

Na mpimpa ya nsuka na ntwala nde Yezu kufwa, yandi pesaka bantumwa na yandi yina landaka kukangama ti yandi kikesa mingi mpenza. Ntangu lungaka sambu na kusonga bo kima mosi ya mpa. Yezu songaka bo nde: “Mono kele nzila mpi kieleka mpi luzingu. Ata muntu mosi ve ke kwisaka na Tata kana yandi kwisa ve na nzila na mono.” Na nima yandi silaka bo mambu yai ya ke pesa kikesa: “Konso kima yina beno ke lomba na zina na mono, mono ta sala yo, sambu Tata kubaka nkembo na nzila ya Mwana. Kana beno lomba konso kima yina na zina na mono, mono ta sala yo.” Na nsuka ya disolo na yandi, yandi tubaka nde: “Tii ntangu yai, beno me lombaka ntete ve ata kima mosi na zina na mono. Beno lomba ebuna beno ta baka, sambu kiese na beno kuvanda ya kulunga.” —Yoane 14:6, 13, 14; 16:24.

Mambu yai vandaka mpenza mfunu mingi. Mukanda mosi ke tubaka nde yo kele “kima mosi ya mpa sambu na kisambu.” Yezu zolaka ve kutuba nde bantu ta kuma kusamba diaka ve Nzambi mpi nde bo ta kuma kusamba yandi. Kansi yandi monisaka kaka mutindu ya mpa ya kukwenda pene-pene na Yehowa Nzambi.

Ya kieleka, Nzambi ke waka ntangu yonso bisambu ya bantu yina ke kangamaka kaka na yandi. (1 Samuele 1:9-19; Nkunga 65:2) Kansi, banda ntangu Izraele salaka kuwakana ti Nzambi, yo vandaka kulomba nde bantu yonso yina vandaka kuzola nde Nzambi kuwa bisambu na bo kundima nde Izraele vandaka dikanda yina Nzambi ponaka. Diaka banda na bilumbu ya Salomo, yo vandaka kulomba nde bo ndima nde Nzambi ponaka tempelo sambu yo vanda kisika yina bo ta pesaka yandi bimenga. (Kulonga 9:29; 2 Bansangu 6:32, 33) Kansi mambu yai ya Nzambi yidikaka sambu na lusambu vandaka kaka sambu na mwa ntangu. Mutindu ntumwa Polo sonikaka yo, Nsiku yina Nzambi pesaka Izraele mpi bimenga yina bo vandaka kupesa na tempelo vandaka “kivudi ya [kumonisa] mambu ya mbote yina ke kwisa, kansi yo kele ve mambu yina yo mosi.” (Baebreo 10:1, 2) Yo vandaka kulomba nde kivudi yai kubika kisika na mambu yina kele ya kieleka. (Bakolosai 2:17) Banda na mvula 33 ya ntangu na beto, sambu bantu kuvanda ti kinduku ya mbote ti Yehowa, yo vandaka kulomba diaka ve nde bo kangama na Nsiku ya Moize. Kansi yo vandaka kulomba nde bantu kulemfukila muntu yina Nsiku vandaka kutubila, disongidila Yezu Kristu.—Yoane 15:14-16; Bagalatia 3:24, 25.

Yezu monisaka mpenza mutindu beto lenda kwenda pene-pene na Yehowa. Yandi monisaka nde yandi kele nduku mosi ya ngolo yina me kangudilaka beto nzila sambu Nzambi kuwa bisambu na beto mpi yandi pesa beto bamvutu. Inki ke sadisaka Yezu na kusala mambu yai sambu na beto?

Sambu beto yonso ke butukaka bantu ya masumu, ata kima mosi ve ya beto lenda sala mpi ata kimenga mosi ve ya beto lenda pesa ta kuka katula masumu na beto to kusadisa beto na kusala kinduku ti Yehowa Nzambi na beto ya santu. (Baroma 3:20, 24; Baebreo 1:3, 4) Kansi Yezu me pesaka luzingu na yandi ya kukuka sambu na masumu ya bantu. Yo me sadisaka bo na kuta diaka kinduku ti Nzambi. (Baroma 5:12, 18, 19) Banda pana, bantu yonso yina ke zolaka nde Yehowa kulolula masumu na bo mpi bo ‘tuba ti masonga’ na ntwala na yandi, fwete monisa lukwikilu na kimenga ya Yezu mpi kusamba na zina na yandi.—Baefezo 3:11, 12.

Ntangu beto ke sambaka na zina ya Yezu, beto ke monisaka lukwikilu na mambu tatu ya mukumba yina yandi ke vandaka ti yo na kulungana ya mambu yina Nzambi ke kana kusala: (1) Yandi kele “Mwana-Dimeme ya Nzambi,” yina kimenga na yandi ke salaka nde Nzambi kulolula masumu na beto. (2) Yehowa muntu futumunaka yandi mpi bubu yai yandi kele “nganga-nzambi ya nene” sambu na kupesa bantu mambote ya kimenga na yandi. (3) Yandi mpamba muntu kele “nzila” yina beto lenda samba Yehowa.—Yoane 1:29; 14:6; Baebreo 4:14, 15.

Beto ke pesaka Yezu lukumu kana beto ke samba na zina na yandi. Yo me fwana nde beto pesa yandi lukumu sambu luzolo ya Yehowa kele nde “na zina ya Yezu mabolongo yonso . . . kufukama mpi konso ludimi kundima pwelele nde Yezu Kristu kele Mfumu na nkembo ya Nzambi, Tata na beto.” (Bafilipi 2:10, 11) Kansi kima ya kuluta mfunu, Yehowa yina me pesaka Mwana na yandi sambu na beto ke bakaka lukumu kana beto ke samba na zina ya Yezu.—Yoane 3:16.

Biblia ke tubilaka batitre mpi bazina mingi yina Yezu kele na yo sambu na kusadisa beto na kubakisa kiyeka ya nene yina yandi kele na yo. Yo ke sadisaka beto na kubakisa mambote mingi yina beto ke bakaka na mambu yina Yezu me salaka, na mambu yina yandi ke sala mpi na mambu yina yandi ta sala sambu na beto. (Tala lupangu “ Mukumba ya Mfunu Yina Yezu Kele ti Yo”.) Ya kieleka, Nzambi me pesaka Yezu “zina yina me luta bazina yonso ya nkaka.” * Nzambi me pesaka yandi kiyeka yonso na zulu mpi na ntoto.—Bafilipi 2:9; Matayo 28:18.

Ya kieleka mutindu beto me tubila yo, beto fwete samba na zina ya Yezu sambu Yehowa kuwa bisambu na beto. (Yoane 14:13, 14) Kansi beto fwete kumisa ve ata fioti bangogo “na zina ya Yezu” bonso nkunga. Sambu na nki?

Beto baka mbandu mosi. Yindula nde komersa mosi me tindila nge mukanda mosi mpi yandi me sukisa yo ti bangogo “mpangi na nge ya zola . . .” Keti nge ke yindula nde bangogo yai me katuka mpenza na ntima na yandi to yandi me landa kaka mpila bantu ke sonikaka mikanda? Ya kieleka, ntangu beto ke sadila zina ya Yezu na bisambu na beto fwete, yo fwete vanda ve ata fioti bonso bangogo yina bantu ke tulaka na nsuka ya mukanda kaka sambu na kumonisa bantu yina ta tanga yo nde bo kele luzitu. Biblia ke tubaka nde beto fwete “samba ntangu yonso.” Beto fwete sala yo na ‘ntima ya mvimba,’ kansi ve kuvutukila mambu ya mpila mosi mbala na mbala.—1 Batesalonika 5:17; Nkunga 119:145.

Inki lenda sadisa nge na kusadila ve bangogo “na zina ya Yezu” bonso nkunga? Nge fwete yindula mingi kibeni bikalulu ya mbote yina Yezu ke vandaka na yo! Yindula mambu yina yandi me salaka dezia mpi yina yandi ke zola kusala sambu na nge. Ntangu nge ke samba, nge fwete pesa Yehowa mersi mpi kukumisa yandi sambu na mukumba ya kuluta nene yina yandi me pesaka Mwana na yandi. Kana nge ke sala mutindu yai, nge ta kuma mpenza kutula ntima na mambu yai ya Yezu silaka: “Kana beno lomba kima mosi na Tata, yandi ta pesa beno yo na zina na mono.”—Yoane 16:23.