Bangogo ya Luyantiku

Mutangi ya Luzolo:

“Kwisa kulanda mono.” (Marko 10:21) Na nsadisa ya bangogo yai, Yezu Kristu kebinga beto na kulanda yandi. Keti nge mendimaka emvitasio na yandi? Kusala mutindu yina tavanda ti bupusi ya ngolo na luzingu na nge. Sambu na nki?

Yehowa kutindaka Mwana na yandi mosi kaka ya kubutukaka na ntoto sambu yandi pesa luzingu na yandi bonso nkudulu. (Yoane 3:​16) Mwana yai kufwaka kaka ve sambu na beto, kansi yandi songaka beto mpi mutindu ya kuzinga. Na mambu yonso ya yandi salaka, yandi taninaka kwikama na yandi mpi kupesaka ntima ya Tata na yandi kyese. Yezu kusongaka beto mpi mutindu beto lenda fwanana ti Tata na yandi. Bangogo mpi bisalu ya Mwana kumonisaka na mutindu mosi ya kukuka banzila mpi luzolo ya Tata.​—Yoane 14:9.

Biblia ketuba nde Yezu kele “mbandu sambu [beto] landa yo.” (1 Piere 2:21) Kana beto kezola kupusana penepene ya Yehowa, kana beto kezola kuvanda ti luzingu ya mbote mpenza ntangu yai, mpi kana beto kezola kubikala na nzila ya kenataka na luzingu ya mvula na mvula, beto fwete landa mbotembote bitambi ya Kristu.

Sambu na kuyantika nzyetelo yai, beto fwete yikana ti luzingu ya Yezu na ntoto. Yo yina, yo mefwana nde beto longuka ti dikebi luzingu ya Yezu mutindu Biblia ketubilaka yo. Kuyindulula mambu yina Yezu kutubaka mpi kusalaka, mpi kutadila mutindu beto lenda landa mbandu na yandi na bangogo mpi na bisalu tasadisa beto na kumona pwelele mutindu ya kulanda yandi.

Bika nde mukanda yai kusadisa nge na kuyedisa zola na nge sambu na Yezu mpi Yehowa. Mpi bika nde zola yina kupusa nge na kulanda mbotembote bitambi ya Yezu sambu na kupesa ntima ya Yehowa kyese ntangu yai mpi kimakulu.

Bambasisi