KAPU 18

Fula na ‘Kulanda Mono’

1-3. (a) Na nki mutindu Yezu kubikisaka bantumwa na yandi, mpi sambu na nki yo vandaka ve kukabwana mosi ya mawa? (b)  Sambu na nki beto fwete zaba luzingu ya Yezu banda yandi mevutukaka na zulu?

 BABAKALA kumi na mosi metelama na zulu ya ngumba mosi. Ti zola ya nene mpi kuyituka bo ketala muntu ya kumi na zole. Yandi kemonana bonso muntu, kansi na kutuba ya kyeleka yo kele Yezu yina mefutumuka mpi mekuma dyaka mwana ya Yehowa ya kuluta ngolo na kati ya bana na yandi ya mpeve. Yezu mevukisa bantumwa na yandi sambu bo kutana na mbala ya nsuka na zulu ya Ngumba ya Banti ya Olive.

² Ngumba yai kele na kati ya bangumba ya matadi ya kelandana. Kima kekabisa yo ti Yeruzalemi kele muwanda ya Kidroni. Ngumba yai keyibusa Yezu mambu mingi mpenza. Mbanza ya Betani, kisika Yezu kufutumunaka Lazare, kele na miwanda yai. Bamposo fyoti kaka meluta, Yezu kukatukaka na Betfaze, mbanza mosi ya mfinama, mpi kukotaka ti lukumu yonso na Yeruzalemi. Mbala yankaka kilanga ya Getsemane, kisika Yezu kulutisaka bangunga ya kuluta mpasi na ntwala nde bo kanga yandi, kuvandaka mpi na zulu ya Ngumba ya Banti ya Olive. Ntangu yai, kaka na zulu ya ngumba yai, Yezu keyilama na kubikisa balongoki na yandi yina kele mpi banduku na yandi ya kuluta ngolo. Yandi metubila bo bangogo ya nsuka ya mawete mpi na nima yandi meyantika kutombuka na zulu! Bantumwa metelama kukonda kunikana mpi ketala mutindu Mfumu na bo yina bo vandaka kuzola ketombuka na zulu. Nsuka-nsuka dituti mefika yandi mpi bo kemona yandi dyaka ve.​—Bisalu 1:6-12.

³ Keti nge kemona bonso nde yo kele nsuka mosi ya kyese mpi ya mawa, kukabwana mosi ya mawa? Mutindu yina ve. Na kutuba ya kyeleka, mutindu bawanzyo zole keyibusa bantumwa ntangu yai, disolo ya luzingu ya Yezu mesuka nte te ve. (Bisalu 1:10, 11) Na mitindu mingi, kukwenda na yandi na zulu kele kaka luyantiku. Ndinga ya Nzambi kebika beto ve na mudidi na yina metala mambu yina kukuminaka Yezu na nima. Yo kele mfunu nde beto zaba luzingu ya Yezu banda yandi mevutukaka na zulu. Sambu na nki? Yibuka nde Yezu kusongaka Piere na kufula na ‘kulanda yandi.’ (Yoane 21:19, 22) Beto yonso fwete zitisa nsiku yai, sambu na mwa-ntangu kaka ve, kansi beto fwete sola na kuzitisa yo luzingu na beto ya mvimba. Sambu na kusala mutindu yina, beto fwete bakisa mambu ya Mfumu na beto kesala ntangu yai mpi mikumba yina yandi mebakaka na zulu.

Luzingu ya Yezu Banda Yandi Mekatukaka na Ntoto

4. Inki mutindu Biblia kumonisaka dezia mambu yina zolaka kusalama na zulu na nima ya kuvutuka ya Yezu kuna?

⁴ Masonuku ketubaka ve ata kima mosi na yina metala kukuma ya Yezu na zulu, mutindu bo yambaka yandi, mpi kyese yina yandi waka ntangu yandi kutanaka dyaka ti Tata na yandi. Kansi, Biblia kumonisaka dezia mambu yina zolaka kusalama na zulu ntangu fyoti na nima ya kuvutuka ya Yezu kuna. Na nsungi ya bamvu-nkama kuluta 15, Bayuda vandaka kusala mbala na mbala nkinsi mosi ya santu. Kilumbu mosi konso mvula, nganga-Nzambi ya nene vandaka kukota na Kisika ya Kuluta Santu ya tempelo sambu na kupanza menga ya bimenga ya Kilumbu ya Ndolula na ntwala ya sanduku ya kuwakana. Na kilumbu yina, nganga-Nzambi ya nene vandaka kumonisa Mesia. Yezu kulungisaka ntendula ya mbikudulu ya nkinsi yai mbala mosi sambu na kimakulu ntangu yandi vutukaka na zulu. Yandi kotaka mpi kumonanaka na ntwala ya Yehowa na zulu​—kisika ya kuluta santu na luyalanganu​—mpi kupesaka Tata na yandi mbalu ya kimenga ya nkudulu na yandi. (Baebreo 9:11, 12, 24) Keti Yehowa kundimaka yo?

5, 6. (a) Inki nzikisa kumonisaka nde Yehowa kundimaka kimenga ya nkudulu ya Kristu? (b) Banani kebaka mambote ya nkudulu, mpi nki mutindu?

⁵ Beto kebaka mvutu na kutadilaka mambu yina kulutaka bilumbu fyoti na nima ya kutombuka ya Yezu na zulu. Kimvuka ya fyoti ya Bakristu kiteso ya 120 kuvukanaka na Yeruzalemi  na suku mosi ya nzo ya etaze, ntangu na mbala mosi makelele bonso mupepe ya ngolo kufulukaka na kisika yina. Baludimi bonso ya tiya kumonikaka na zulu ya ba-intu na bo, ebuna bo fulukaka ti mpeve santu mpi bo yantikaka kutuba na bandinga ya kuswaswana. (Bisalu 2:1-4) Dyambu yai kutendulaka lubutuku ya dikanda mosi ya mpa, Izraele ya kimpeve, yina vandaka bantu ya mpa “yina ya Nzambi solaka” mpi “banganga-Nzambi ya Mfumu ya nene” sambu na kusala luzolo ya Nzambi na ntoto. (1 Piere 2:9) Yo kele pwelele nde, Yehowa Nzambi kundimaka mpi kusepelaka na kimenga ya nkudulu ya Kristu. Kupanzana yai ya mpeve santu kuvandaka na kati ya balusakumunu ya ntete yina bantu kubakaka na nzila ya nkudulu.

⁶ Banda na ntangu yina, nkudulu ya Kristu mepesaka balongoki na yandi ya nsi-ntoto ya mvimba mambote. Yo vanda beto kele na kati ya “kibuka ya fyoti” yina bo me tulaka mafuta, yina tayala ti Kristu na zulu, to na kati ya “mameme ya nkaka” yina tazinga na nsi ya luyalu na yandi na ntoto, beto kebakaka mambote ya kimenga na yandi. (Luka 12:32, NW; Yoane 10:16) Kivuvu na beto mpi ndolula ya masumu na beto mesimbama na nkudulu yai. Kana beto landa na kumonisa lukwikilu na nkudulu yina, na kulandaka Yezu konso kilumbu, beto lenda vanda ti kansansa ya bunkete mpi kivuvu ya kitoko sambu na makwisa.​—Yoane 3:16.

7. Inki kiyeka Yezu kubakaka na nima ya kuvutuka na yandi na zulu, mpi nki mutindu nge lenda pesa yandi maboko?

⁷ Inki Yezu kesalaka na zulu banda yandi mevutukaka kuna? Yandi kele ti kiyeka ya nene mpenza. (Matayo 28:18) Ya kyeleka, Yehowa kutulaka Yezu mfumu ya dibundu ya Bukristu, mukumba yina yandi kelungisaka ti zola mpi lunungu yonso. (Kolosai 1:13) Mutindu bo tubilaka yo na ntwala, Yezu mepesaka babakala ya kuyela mukumba ya kulungisa bampusa ya mameme na yandi. (Efezo 4:8) Mu mbandu, yandi ponaka Polo na kuvanda “ntumwa sambu na . . . bantu yina kele Bayuda ve,” mpi kutindaka yandi na kupanza nsangu ya mbote na bisika yonso. (Roma 11:13; 1 Timoteo 2:7) Penepene ya nsuka ya mvu-nkama ya ntete, Yezu kusikisaka, kulongisilaka, mpi kusungikaka mabundu nsambwadi na provense ya Roma yina kuvandaka na Azia. (Kusonga, bakapu 2-3) Keti nge kendimaka  nde Yezu kele Ntu ya dibundu ya Bukristu? (Efezo 5:23) Sambu na kufula na kulanda yandi, nge fwete yedisa kikalulu ya kulemfuka mpi ya kusala kumosi ti dibundu na beno.

8, 9. Inki kiyeka Yezu kubakaka na mvu 1914, mpi yo fwete tendula inki sambu na beto na badesizio ya beto kebakaka?

⁸ Yezu kubakaka kiyeka mingi dyaka na mvu 1914. Na mvula yina, Nzambi tulaka yandi Ntotila ya Kimfumu ya Mesia ya Yehowa. Ntangu luyalu ya Yezu kuyantikaka, “bitumba bwaka na kati ya zulu.” Inki kusalamaka na nima? Bo losaka Satana ti bademo na yandi na ntoto, ebuna nsungi mosi ya mawa kuyantikaka. Bamvita, nku, boma, maladi, kunikana ya ntoto, mpi nzala ya kemonana bisika yonso mpi ya kenyokula bantu bubu yai keyibusa beto nde Yezu kele na kuyala na zulu ntangu yai. Satana kele kaka “mfumu ya nsi-ntoto yai” sambu na “ntangu mingi ve.” (Kusonga 12:7-12; Yoane 12:31; Matayo 24:3-7; Luka 21:11) Kansi, Yezu kele na kupesa bantu ya nsi-ntoto ya mvimba dibaku ya kundima luyalu na Yandi.

⁹ Yo kele mfunu nde beto vanda na lweka ya Ntotila yina kele Mesia. Na badesizio na beto ya konso kilumbu, beto fwete sosa kundimama na yandi, kansi kundimama ya nsi-ntoto yai ve ya kubeba. Na ntangu “Ntotila ya bantotila yonso, Mfumu ya bamfumu yonso” ketala bantu, ntima na yandi ya lunungu kele ya kufuluka ti makasi mpi kyese. (Kusonga 19:16) Sambu na nki?

Makasi mpi Kyese ya Ntotila Yina Kele Mesia

10. Yezu ke muntu ya nki mutindu, mpi ata mpidina, inki mambu kepesa Mfumu na beto makasi ya lunungu?

¹⁰ Bonso Tata na yandi, Mfumu na beto kele muntu ya kyese. (1 Timoteo 1:11) Ntangu yandi vandaka na ntoto, Yezu vandaka ve makambu ngolo to kusosa-sosa bifu ya bantu. Ata mpidina, kele ti mambu mingi ya kesalama na ntoto bubu yai yina fwete pesa yandi makasi ya lunungu. Ntembe kele ve nde yandi kele na makasi sambu na bimvuka yonso ya mabundu yina ketubaka na luvunu yonso nde bo kemonisaka yandi. Yandi tubaka mbala mingi na ntwala nde: “Bantu yina ke bingaka mono nde: ‘Mfumu, Mfumu’, bo yonso ve ta kota na Kimfumu ya Nzambi, kansi bantu yina ke salaka luzolo ya Tata na mono yina kele na zulu,  bo kaka bantu ta kota na Kimfumu ya Nzambi. Na kilumbu yina, bantu mingi ta yula mono nde: ‘Mfumu, Mfumu! . . . Beto ve bantu vandaka kusala bidimbu mingi na zina na nge?’ Na ntangu yina mono ta tubila bo nde: ‘Mono me zabaka beno ntete ve. Beno bantu ke salaka mambu ya mbi, beno katuka awa na meso na mono.’”​—Matayo 7:21-23.

11-13. Sambu na nki bantu yankaka lenda mona mpasi na kubakisa bangogo ya ngolo yina Yezu kutubilaka bantu yina vandaka kusala “bidimbu mingi” na zina na yandi, kansi sambu na nki yandi kele na makasi? Pesa mbandu.

¹¹ Bantu mingi yina kekudibingaka Bakristu bubu yai lenda mona mpasi na kubakisa bangogo yai. Sambu na nki Yezu ketubila bantu yina vandaka kusala “bidimbu mingi” na zina na yandi bangogo ya ngolo ya mutindu yai? Mabundu ya Kikristu metwadisaka makabu ya mawa, mesadisaka bansukami, metungaka balupitalu mpi banzo-nkanda, mpi mesalaka bisalu mingi yankaka. Na kubakisa sambu na nki yo mefwana nde Yezu kuwila bo makasi, beto tadila mbandu mosi.

¹² Tata mosi ti nkento na yandi kezola kusala nzyetelo. Bo lenda kwenda ve ti bana na bo, yo yina bo mebaka nkento mosi na kisalu sambu na kulangidila bana na bo. Bo kepesa yandi bantuma yai ya pete: “Langidila bana na beto. Disa bo, sala yonso sambu bo vanda bunkete, mpi tanina bo na bigonsa.” Kansi ntangu bibuti mekwisa kuvutuka, bo mewa mpasi na ntima sambu bo mekuta bana na bo kefwa na nzala, mvindu, kebela-bela, mpi kepesa mawa. Bo kedila sambu yandi tudila bo dikebi, kansi yandi kesala ve ata kima. Sambu na nki? Yandi kele na zulu ya kimatinu, keyobisa banela. Ti makasi, bibuti kelomba yandi bantendula. Nkento yina kevutula nde: “Tala bisalu ya mu mesala! Keti banela ke bunkete ve? Mu meyidika mpi bima yina kuvandaka ya kubeba na nzo, yonso sambu na beno!” Keti bibuti tavanda na kyese? Ata fyoti ve! Bo lombaka yandi ve na kusala bisalu yina; bo zolaka kaka nde yandi keba bana na bo. Sambu yandi buyaka na kulanda bantuma na bo, yo tapesa bo makasi.

¹³ Kikristu mesalaka mambu bonso nkento yina bo bikilaka bana na kulangidila. Yezu kubikilaka mimonisi na yandi ba ntuma ya kudisa bantu na kimpeve na kulongaka bo kyeleka ya Ndinga ya Nzambi mpi na kusadisaka bo na kuvanda bunkete na kimpeve. (Yoane 21:15-17) Kansi, Kikristu melemfukilaka ve lutwadisu yai ata fyoti. Kikristu mebikaka bantu nzala na kimpeve, mekotisaka bo na mavwanga ti malongi ya luvunu, mpi na mudidi na yina metala bakyeleka ya luyantiku ya Biblia. (Yezaya 65:13; Amosi 8:11) Ata nkutu bikesa yina yandi kesala sambu na kutomisa nsi-ntoto yai lenda pesa yandi ve nswa ya kukonda kulemfuka na luzolo yonso. Nkutu, ngidika ya nsi-ntoto yai kele bonso nzo yina bo fwete panza! Ndinga ya Nzambi kemonisa pwelele nde kubika fyoti bo tafwa ngidika ya nsi-ntoto ya Satana.​—1 Yoane 2:15-17.

14. Inki kisalu kepesaka Yezu kyese bubu yai, mpi sambu na nki?

¹⁴ Na ndambu yankaka, Yezu fwete vanda na kyese mingi ntangu yandi ketalaka na ntoto, katuka na zulu, mpi kemonaka bamilio ya bantu kesala kisalu ya kukumisa bantu balongoki sambu na kuzitisa ntuma yina yandi pesaka balongoki na yandi na ntwala ya kukwenda na zulu. (Matayo 28:19, 20) Beto kele ti dibaku ya nene mpenza ya kusala kisalu yina kepesa Ntotila yina kele Mesia kyese! Bika beto vanda ti lukanu ya kuyambula ve na kusadisa “mpika ya kwikama mpi ya mayele.” (Matayo 24:45, NW) Na kuswaswana ti bantwadisi ya mabundu ya Kikristu, kimvuka yai ya fyoti ya bampangi yina bo me tulaka mafuta ketwadisaka kisalu ya kusamuna na bulemfu yonso mpi kedisaka mameme ya Kristu na kwikama yonso.

15, 16. (a) Mawi ya Yezu kele inki sambu na kukonda zola yina mefuluka bubu yai, mpi inki mutindu beto kezaba yo? (b) Sambu na nki yo mefwana nde Yezu kuwila mabundu ya Kikristu makasi?

¹⁵ Beto lenda ndima nde Ntotila kewaka makasi ntangu yandi kemonaka kukonda zola yina mefuluka na ntoto bubu yai. Beto lenda yibuka mutindu Bafarize kusambisaka Yezu sambu yandi belulaka muntu na Kisabatu. Bo vandaka ntima ngolo mpi ntu-ngolo mingi, na mpila nde bo vandaka kusuka kaka na mutindu na bo ya kubakisa Nsiku ya Moize mpi nsiku ya munoko. Bidimbu ya nkumbwa ya Yezu vandaka kunatila bantu mambote mingi! Kansi kyese, ndembikilu, mpi lukwikilu ya ngolo yina bidimbu ya nkumbwa ya mutindu yai vandaka  kupesa bantu vandaka kutendula ve ata kima mosi sambu na Bafarize. Mawi ya Yezu kuvandaka inki sambu na bo? Kilumbu mosi yandi “talaka bantu yonso ndambu na ndambu, yandi vandaka kutala bo ti makasi; yandi monaka mpi ntantu mingi na ntima sambu na ntu-ngolo na bo.”​—Marko 3:5.

¹⁶ Bubu yai, Yezu kemonaka mambu mingi yina kesala nde yandi kuwa “ntantu mingi.” Meso ya bantwadisi ya mabundu ya Kikristu kele ya kufwa sambu bo kele ya kukangama na binkulu mpi malongi yina kewakanaka ve ti Masonuku. Dyaka, kisalu ya kusamuna nsangu ya mbote ya Kimfumu ya Nzambi kepesa bo makasi. Na bandambu mingi ya ntoto, bamfumu ya mabundu kebasisaka bambangika ya nku sambu na kunyokula Bakristu yina kesalaka ngolo na masonga yonso sambu na kusamuna nsangu yina ya Yezu kusamunaka. (Yoane 16:2; Kusonga 18:4, 24) Kaka na ntangu yina, bantwadisi yai ya mabundu kesyamisaka mbala na mbala bantu na bo na kukwenda na bamvita mpi kufwa bankaka​—bonso nde kusala mutindu yina lenda pesa Yezu Kristu kyese!

17. Inki mutindu balongoki ya kyeleka ya Yezu kepesaka ntima na yandi kyese?

¹⁷ Na luswaswanu ya Kikristu, balongoki ya kyeleka ya Yezu kesalaka ngolo na kuzola bantu yankaka. Bo kesamunaka nsangu ya mbote na “bantu yonso,” kaka mutindu Yezu kusamunaka, ata yandi kutanaka ti kimbeni. (1 Timoteo 2:4) Mpi zola ya bo kemonisaka bo na bo kele nene; yo kele kidimbu ya ntete yina kesadisaka bantu na kuzaba bo. (Yoane 13:34, 35) Ntangu bo kesadilaka bampangi na bo Bakristu mambu ti zola, luzitu, mpi lukumu, bo kelandaka mpenza mbandu ya Yezu mpi kepesaka ntima ya Ntotila yina kele Mesia kyese!

18. Inki kima kepesaka Mfumu na beto mpasi na ntima, kansi inki mutindu beto lenda pesa yandi kyese?

¹⁸ Beto vila mpi ve nde Mfumu na beto kewaka mpasi na ntima ntangu balongoki na yandi kekangaka ve ntima, kebikaka nde zola na bo sambu na Yehowa kukuma madidi, mpi keyambulaka na kusadila yandi. (Kusonga 2:4, 5) Kansi, Yezu kevandaka na kyese sambu na bayina kekangaka ntima tii na nsuka. (Matayo 24:13) Dyaka, kuluta yonso, bika beto vila ve ata fyoti ntuma ya  Kristu kupesaka ya kufula na ‘kulanda yandi.’ (Yoane 21:19) Bika beto tadila ndambu ya balusakumunu yina Ntotila yina kele Mesia tapesa na bantu yina takanga ntima tii na nsuka.

Bansadi ya Kwikama ya Ntotila Kebaka Balusakumunu Mingi

19, 20. (a) Kulanda Yezu tapesa beto inki balusakumunu bubu yai? (b) Inki mutindu kulanda Kristu lenda sadisa beto na kulungisa mpusa na beto ya kuvanda ti tata?

¹⁹ Kulanda Yezu tapesa beto balusakumunu na luzingu bubu yai. Kana beto ndima Kristu bonso Mfumu na beto, kana beto landa bantuma na yandi mpi kubika nde mbandu na yandi kutwadisa beto, beto tazwa bimvwama yina bantu ya nsi-ntoto ya mvimba kesosaka kukonda kuzwa yo. Beto tavanda ti kisalu yina tapesa lukanu mpi mfunu na luzingu na beto, dibuta ya bampangi-Bakristu yina mevukana na nsadisa ya zola ya kyeleka, kansansa ya bunkete, mpi ngemba ya mabanza. Na bunkufi, beto tavanda ti luzingu ya kyese mpenza. Mpi beto tazwa dyaka mambote mingi.

²⁰ Yehowa meponaka Yezu na kuvanda “Tata ya Mvula na Mvula” sambu na bantu yina kele ti kivuvu ya kuzinga kimakulu na ntoto. Yezu kuyingaka Adami, tata na beto ya kinsuni, yina kuyekulaka bana na yandi yonso. (Yezaya 9:5, 6) Ntangu beto kendimaka Yezu bonso ‘Tata na beto ya Mvula na Mvula,’ na kumonisaka lukwikilu na yandi, beto kevandaka ti kivuvu ya kyeleka ya luzingu ya mvula na mvula. Dyaka, beto kefinamaka ngolo mpenza ti Yehowa Nzambi. Mutindu beto mekatuka kulonguka yo, kusala kikesa na kulanda mbandu ya Yezu konso kilumbu kele mutindu ya kuluta mbote ya kulemfukila ntuma yai ya Nzambi: “Beno kele bana yina ya Nzambi ke zolaka; yo yina beno fweti meka na kusala bonso yandi.”​—Efezo 5:1.

21. Inki mutindu balongoki ya Kristu kemonisaka nsemo na nsi-ntoto mosi ya kele na mpimpa?

²¹ Na ntangu beto kelanda mbandu ya Yezu mpi ya tata na yandi, Yehowa, beto kevandaka ti dibaku mosi ya kitoko. Beto kemonisaka nsemo mosi ya ngolo. Na nsi-ntoto mosi ya kele na kati ya mpimpa, kisika Satana kekusa bamiliare ya bantu mpi bo kelanda bikalulu na yandi, beto bantu ya kelandaka Kristu kepanzaka nsemo ya kuluta ngolo bisika yonso​—nsemo ya bakyeleka ya Masonuku, ya bikalulu ya mbote ya Bukristu, ya kyese ya masonga, ya ngemba, mpi ya zola ya kyeleka. Na ntangu yina mosi, beto kefinamaka ngolo mpenza ti Yehowa, mpi yo kele lukanu ya kuluta nene yina konso kigangwa ya mayele lenda baka.

22, 23. (a) Inki balusakumunu bantu yina kefula na kulanda Yezu na kwikama yonso tabaka na bilumbu kekwisa? (b) Lukanu na beto fwete vanda inki?

²² Yindula mpi mambu yina Yehowa kezola kusala sambu na nge na bilumbu kekwisa na nzila ya Ntotila na yandi yina kele Mesia. Kubika fyoti Ntotila yina tanwana mvita ya lunungu ti ngidika ya bima ya mbi ya Satana. Ntembe kele ve ata fyoti nde Yezu muntu tanunga! (Kusonga 19:11-15) Na nima, Kristu tayantika Luyalu na yandi ya Bamvula Funda na ntoto. Guvernema na yandi ya zulu tapesa mambote ya nkudulu na bantu yonso ya kwikama mpi takumisa bo bantu ya kukuka. Yindula nde nge kele ti mavimpi ya mbote, leke mpi ngolo ntangu yonso, kesala na kyese ti dibuta mosi ya kele na bumosi sambu na kukitula ntoto yai paladisu! Na nsuka ya Luyalu yina ya Bamvula Funda, Yezu tavutula kimfumu na Tata na yandi. (1 Korinto 15:24) Kana nge fula na kulanda Kristu na kwikama yonso, nge tabaka lusakumunu mosi ya kitoko mpenza yina nge lenda yindula ve: “Dipanda ya lukumu yina ya bana ya Nzambi ta baka”! (Roma 8:21) Ee, beto tabaka balusakumunu yonso yina Adami ti Eva kuvandaka na yo, kansi yina bo vidisaka. Sambu beto takuma bana ya Yehowa ya babakala ti ya bankento, beto tavandaka dyaka ve ti tashe ya masumu ya Adami. Ya kyeleka, “lufwa ta vandaka diaka ve.”​—Kusonga 21:4.

²³ Yibuka leke yina ya mvwama ya beto tubilaka na Kapu ya 1. Yandi buyaka emvitasio yai ya Yezu: “Kwisa kulanda mono.” (Marko 10:17-22) Kusala ve ata fyoti kifu ya mutindu yina! Ndima emvitasio ya Yezu ti kyese yonso. Vanda ti lukanu ya kukanga ntima, ya kufula kulanda Ngungudi ya Mbote konso kilumbu, konso mvula, mpi zinga sambu na kumona ntangu yandi talungisa nsuka-nsuka balukanu yonso ya Yehowa!

[Bangyufula ya disolo ya kulonguka]

 [Lupangu ya kele na lutiti 191]

Inki Mutindu Nge Lenda Landa Yezu?

● Inki tasadisa nge na kuwakanisa mabanza na nge ti ya Kristu?​—1 Korinto 2:13-16.

● Na nki mambu nge kele ti lukanu ya kulanda Yezu mbote-mbote?​—1 Piere 2:21.

● Inki mutindu nge tatina kigonsa ya kubika nde zola na nge sambu na Yezu kukuma madidi?​—Kusonga 3:14-18.

● Inki mutindu nge lenda monisa nde nge kezola mpenza nde Kristu kuyala ntoto ntama mingi ve na bilumbu kekwisa?​—Kusonga 22:17, 20.