KAPU 35

Inki Mutindu Mono Lenda Kuma Nduku ya Nzambi?

Jeremy bakisaka mfunu ya kuta kinduku ti Nzambi na nima ya kukutana ti bampasi. Yandi ke tuba nde: “Ntangu mono vandaka ti bamvula 12, papa yambulaka dibuta na beto. Kilumbu mosi na mpimpa, ntangu mono vandaka kusamba na zulu ya mbeto, mono bondilaka Yehowa sambu papa kuvutuka.”

Jeremy yantikaka kutanga Biblia sambu yandi vandaka kudiyangisa. Ntangu yandi tangaka Nkunga 10:14, yo simbaka kibeni ntima na yandi. Verse yango ke tuba mambu yai sambu na Yehowa: “Muntu ya mawa ke kwisaka na nge; nge kele nsadisi ya mwana yina me konda tata.” Jeremy ke tuba diaka nde: “Mono waka bonso nde Yehowa ke tubila mono mpi ke songa mono nde yandi kele nsadisi mpi Tata na mono. Yandi kele tata ya mbote kuluta batata yonso!”

YO VANDA nge ke kutana ti mambu ya mutindu mosi ti ya Jeremy to ve, Biblia ke monisaka nde Yehowa ke zolaka nde nge kuma nduku na yandi. Yo yina, Biblia ke tubaka nde: “Beno kwenda pene-pene na Nzambi, ebuna yandi ta kwisa pene-pene na beno.” (Yakobo 4:8) Yindula fioti mambu ya verse yai ke zola kutuba: Yehowa ke zola nde nge kuma nduku na yandi ata nge lenda mona yandi ve mpi ata yandi kele ve nivo mosi ti nge!

Kansi sambu nge kuma nduku ya Nzambi, nge fwete sala bikesa. Beto baka mbandu: Kana nge kele ti kintuntu na kati ya nzo, nge fwete zaba nde yo ke yelaka ve yo mosi. Sambu yo yela mbote, nge fwete losila yo masa mbala na mbala mpi kutula yo na kisika ya mbote. Yo kele mpi mutindu mosi sambu na kinduku na beto ti Nzambi. Inki nge lenda sala sambu na kukumisa ngolo kinduku na nge ti Nzambi?

Mfunu ya Kulonguka

Kinduku ke lombaka mambu zole ntangu beno ke solula: kuwidikila mpi kutuba. Yo kele mpi mutindu mosi sambu na kinduku na beto ti Nzambi. Beto ke widikilaka mambu yina Nzambi ke tubaka ntangu beto ke tangaka mpi ke longukaka Biblia.—Nkunga 1:2, 3.

Mbala ya nkaka nge ke sepelaka ve ti kulonguka. Batoko mingi ke sepelaka kaka kutala televizio, kusala bansaka mpi kulutisa ntangu ti banduku. Kansi kana nge ke zola kusala kinduku ti Nzambi, nge fwete sala mambu yina yandi ke zolaka. Nge fwete tanga Ndinga na yandi sambu na kuwidikila yandi.

Ata mpidina, kudiyangisa ve. Kulonguka Biblia fwete vanda ve kizitu. Nge lenda sala yonso sambu yo natila nge kiese ata nge ke sepelaka ve ti yo. Ntete, nge fwete bumba ntangu ya kulonguka Biblia. Lais, mwana nkento mosi, ke tuba nde: “Mono ke vandaka ti programe na mono. Kutanga kapu mosi ya Biblia kele kima ya ntete ya mono ke salaka konso suka.” Maria ya kele ti bamvula 15, ke vandaka mpi ti programe ya mutindu ya nkaka. Yandi ke tuba nde: “Mono ke tangaka mwa baverse ya Biblia konso mpimpa na ntwala ya kulala.”

Sambu nge kuma ti programe na nge mosi ya kulonguka Biblia, tala  lupangu ya kele na lutiti 3. Sonika awa na nsi ntangu yina nge ta lutisaka ata baminuta 30 sambu na kulonguka Ndinga ya Nzambi.

․․․․․

Kusala programe kele kaka luyantiku. Kana nge me yantika kulonguka Biblia, nge ta bakisa mpenza nde kutanga yo ke vandaka ve ntangu yonso pete. Ziku nge ke ndima mpi mambu yai ya Jezreel, yina kele ti bamvula 11, ke tuba na pwelele yonso: “Bitini ya nkaka ya Biblia ke vandaka mpasi na kubakisa mpi yo ke vandaka ve ti masolo ya ke sekisa.” Kana nge ke kudiwaka mpi mutindu yai, kuyambula ve. Tadila ntangu yonso kulonguka na nge ya Biblia bonso ntangu yina nge ke baka sambu na kuwidikila Yehowa Nzambi, nduku na nge. Kana nge ke sala bikesa ya kulonguka Biblia, nge ta kuma kusepela ti yo mpi yo ta natila nge mambote!

Kisambu Kele Mfunu Mingi

Kisambu ke sadisaka beto na kusonga Nzambi mambu na beto. Kisambu kele dikabu mosi ya kitoko kibeni! Nge lenda samba Yehowa Nzambi na konso ntangu yina, yo vanda na mpimpa to na ntangu. Yandi ke vandaka ntangu yonso ya kuyilama sambu na kuwidikila nge. Diaka, yandi ke zolaka kuwa mambu ya nge ke zola kusonga yandi. Yo yina Biblia ke tubaka nde: ‘Na mambu yonso na nzila ya kisambu mpi ntangu nge ke bondila ti kupesa matondo, zabisa Nzambi mambu ya nge ke lomba.’—Bafilipi 4:6.

Mutindu verse yina me monisa yo, kele ti mambu mingi ya nge lenda zabisa Yehowa na kisambu. Mu mbandu bampasi mpi basusi na nge. Nge lenda pesa yandi mpi mersi sambu na mambu yina yandi me sadila nge. Ya kieleka, nge ke pesaka banduku na nge mersi sambu na mambu ya mbote yina bo ke sadilaka nge. Mutindu mosi, nge lenda pesa Yehowa mersi sambu yandi ke sadilaka nge mambu mingi yina banduku na nge lenda sala ve.—Nkunga 106:1.

Sonika awa na nsi mambu yina nge lenda pesila Yehowa mersi.

․․․․․

Ntembe kele ve nde bantangu ya nkaka nge ke kutanaka ti mambu ya ke pesaka nge boma mpi ya ke yangisaka nge. Yo yina, Nkunga 55:22 ke tuba nde: “Losila Yehowa kizitu na nge, ebuna yandi ta sadisa nge. Yandi ta pesa ve nzila ata fioti nde muntu ya lunungu kubwa.”

Sonika awa na nsi mambu ya ke yangisaka nge, yina nge lenda samba sambu na yo.

․․․․․

Mambu ya Nge Ke Kutana ti Yo

Kele ti kima ya nkaka yina nge fwete vila ve na kinduku na nge ti Nzambi. Davidi, mosi ya bantu yina sonikaka mukanda ya bankunga, ke tuba nde: “Beno meka mpi beno mona nde Yehowa kele mbote.” (Nkunga 34:8) Davidi sonikaka Nkunga 34 na nima ya kukutana ti mambu yina vandaka kupesa yandi boma. Yandi vandaka kutina ntotila Saule yina vandaka kusosa kufwa yandi. Yo vandaka diambu mosi ya mpasi mingi. Kansi, yo lombaka nde yandi tina na bwala ya bantu ya Filistia yina vandaka bambeni na yandi. Ntangu Davidi bakisaka nde bo vandaka kusosa kufwa yandi, yandi kusaka nde yandi kele muntu ya kilawu mpi yo sadisaka yandi na kutina.—1 Samuele 21:10-15.

Davidi bulaka ve ntulu nde mayele na yandi mosi sadisaka yandi na kutina. Kansi, yandi tubaka nde Yehowa muntu sadisaka yandi. Na verse 4 ya Mukanda ya Nkunga ya beto me katuka kutubila na zulu, yandi sonikaka nde: “Mono yulaka Yehowa, mpi yandi pesaka mono mvutu. Yandi gulusaka mono na mambu yonso yina vandaka kupesa mono boma.” (Nkunga 34:4) Mambu yina Davidi kutanaka ti yo pusaka yandi na kutuba nde “beno meka mpi beno mona nde Yehowa kele mbote.” *

Keti nge ke yibuka kima mosi ya nge me kutanaka ti yo na luzingu yina monisaka nde Yehowa sadisaka nge? Kana nge ke yibuka yo, sonika yo awa na nsi. Yo ke tendula ve nde kima yango fwete vanda kaka ya nene. Yindula ata balusakumunu ya fioti-fioti ya konso kilumbu yina nge ke tudilaka ve dikebi.

․․․․․

Mbala ya nkaka bibuti na nge me longaka nge Biblia. Kana mpidina, zaba nde yo kele mpenza lusakumunu. Ata mpidina, nge fwete kumisa kinduku na nge ti Nzambi ngolo. Kana nge me salaka yo ntete ve, nge lenda sadila mambu ya kapu yai ke tubila sambu na kukumisa ngolo kinduku yango. Yehowa ta sakumuna bikesa ya nge ke sala. Biblia ke tuba nde: “Beno landa na kulomba, ebuna bo ta pesa beno; beno landa na kusosa ebuna beno ta mona.”—Matayo 7:7.

[Noti na nsi ya lutiti]

VERSE YA MFUNU NA KAPU YAI

“Kiese na bantu yina ke bakisaka mbote nde bo kele ti nzala ya mambu ya kimpeve.”—Matayo 5:3.

NDONGISILA

Tanga balutiti tanu ya Biblia konso kilumbu mpidina nge ta manisa kutanga yo na mvula mosi.

KETI NGE ZABAKA YO . . .

Mutindu nge ke tanga mukanda yai mpi ke sadila bandongisila ya Biblia yina yo ke pesa ke monisa nde Yehowa ke tudilaka nge dikebi.—Yoane 6:44.

MAMBU YINA MONO TA SALA!

Sambu kulonguka ya Biblia kunatila mono mambote, mono ta ․․․․․

Sambu mono kuma kusamba mbala na mbala, mono ta ․․․․․

Mambu ya mono me longuka yina mono ta zola kuyula kibuti (bibuti) na mono kele ․․․․․

INKI NGE KE YINDULA?

● Inki nge lenda sala sambu nge kuma kusepela ti kulonguka na nge ya Biblia?

● Sambu na nki Yehowa ke zolaka kuwa bisambu ya bantu ya kukonda kukuka?

● Inki mutindu nge lenda kuma kusamba diaka mbote?

[Bangogo sambu na kubenda dikebi]

Ntangu mono vandaka leke, mono vandaka kuvutukila mambu ya mutindu mosi na kisambu. Kansi bubu mono ke sambaka sambu na mambu ya mbote mpi ya mbi ya ke kuminaka mono konso kilumbu. Sambu konso kilumbu ke vandaka ti mambu na yo, yo ke sadisaka mono na kuvutukila ve mambu ya mutindu mosi.’’—Eve

[Lupangu/​Kifwanisu]

Longuka Biblia Mbote-Mbote

1. Pona disolo mosi ya Biblia yina nge ta sepela kutanga. Samba sambu na kubaka mayele ya kubakisa mambu ya nge ke tanga.

  2. Tanga disolo yango mbote-mbote. Kutanga ve ntinu-ntinu. Mona na mabanza mambu ya nge ke tanga. Sala yonso sambu na kudikotisa na disolo. Meka kumona mambu ya ke salama, kuwa bandinga ya bantu ya disolo yango ke tubila, kuwa nsudi, kuwa ntomo ya bima mpi mambu ya nkaka. Sala bonso nde nge kele pana ntangu mambu yango ke salama!

3. Yindula mambu ya nge me katuka kutanga. Kudiyula bangiufula bonso yai:

● Sambu na nki Yehowa sonikisaka disolo yai na Ndinga na yandi?

● Mbandu ya nki bantu mono fwete landa mpi mbandu ya banani mono fwete landa ve?

● Inki malongi ya mfunu mono lenda baka na disolo yai?

● Disolo yai ke longa mono nki sambu na Yehowa mpi mutindu na yandi ya kusala mambu?

4. Sala kisambu ya nkufi na Yehowa. Songa yandi malongi ya nge me baka na kulonguka na nge ya Biblia mpi mutindu nge ke kana kusadila yo na luzingu na nge. Ntangu yonso nge fwete pesaka Yehowa mersi sambu na dikabu yina yandi me pesaka nge, disongidila Ndinga na yandi ya Santu Biblia!

[Kifwanisu]

“Ndinga na nge kele mwinda sambu na dikulu na mono, mpi nsemo sambu na nzila na mono.”—Nkunga 119:105.

[Lupangu/​Kifwanisu]

Tula Mambu ya Mfunu na Kisika ya Ntete

Keti nge ke monaka nde nge ke vandaka ve ti ntangu ya kusamba mpi ya kulonguka Biblia? Mbala mingi, mambu ya nge ke tulaka na kisika ya ntete ke salaka nde yo salama mutindu yina.

Meka kusala mambu yai: Baka ekolo mosi mpi tula matadi mingi ya nene na kati. Na nima fulusa yo ti zelo. Kana nge sala mutindu yai, ekolo ta fuluka ti matadi mpi zelo.

Sesepi, basisa matadi mpi zelo yango na kati mpi tula yo na lweka. Meka kusala yo na mutindu yai: Tula ntete zelo na kati ya ekolo mpi na nima meka mpi kutula matadi. Kisika ya kutula matadi ta vanda diaka ve sambu nge me tula ntete zelo na kati ya ekolo.

Yo ke longa nge nki? Biblia ke tubaka nde: “Zikisa mambu ya kuluta mfunu.” (Bafilipi 1:10) Kana nge ke tula mambu ya fioti-fioti mu mbandu bansaka na kisika ya ntete, nge ta vanda ve ata fioti ti ntangu ya kufwana sambu na kusala mambu ya mfunu, disongidila mambu ya Nzambi. Kansi kana nge ke landa ndongisila yai ya Biblia, nge ta vanda ti ntangu ya kusala mambu ya mfunu mpi ntangu ya kusala bansaka. Sambu mambu kusalama mutindu yai, yo kele mbote nde nge tula mambu ya mfunu na kisika ya ntete!

[Kifwanisu]

Sambu kinduku na nge ti Nzambi kukuma ngolo, nge fwete yidika yo kaka mutindu bo ke yidikaka kintuntu mosi ya kele na kati ya nzo