KAPU 8

Bantu Yankaka Kele Ti Kiyeka Kuluta Beto

YA KYELEKA, nge tandima nde bantu yankaka ke ti kiyeka, to bo ke nene mpi ngolo kuluta nge ti munu. Nani nge kemona nde yandi ke na kiyeka kuluta beto?— Yehowa Nzambi. Ebuna Mwana na yandi, Longi ya Nene? Keti yandi ke ti kiyeka kuluta beto?— Ee, yandi ke na yo.

Yezu vandaka kuzinga ti Nzambi na zulu. Yandi vandaka Mwana ya kimpeve, to wanzyo. Keti Nzambi kusalaka bawanzyo to bana ya kimpeve yankaka?— Ee, yandi salaka bawanzyo mingi mpenza. Bawanzyo yango mpi ke na kiyeka ti ngolo mingi kuluta beto.—Nkunga 104:4; Daniele 7:10.

Keti nge keyibuka zina ya wanzyo yina kusolulaka ti Maria?— Zina na yandi Gabriele. Yandi tubilaka Maria nde bebe na yandi tavanda Mwana ya Nzambi. Nzambi kutulaka luzingu ya Mwana na yandi ya kimpeve na kati ya divumu ya Maria na mpila nde Yezu kubutuka bonso bebe na ntoto.—Luka 1:26, 27.

Keti nge kekwikila na kima yai ya kuyituka? Keti nge kekwikila nde Yezu kuzingaka ti Nzambi na zulu?— Yezu kutubaka nde yandi zingaka na zulu. Inki mutindu Yezu kuzabaka mambu ya mutindu yina? Ntembe kele ve nde Maria kutelaka yandi mambu ya Gabriele kutubaka na ntangu Yezu kuvandaka mwana ya fyoti. Dyaka, yo le vanda nde Yozefi kutubilaka Yezu nde Tata na yandi ya kyeleka kuvandaka Nzambi.

Nkutu ntangu Yezu kubakaka mbotika, Nzambi kutubaka katuka kuna na zulu nde: “Yai kele Mwana na mono.” (Matayo 3:17) Ebuna na mpimpa, na ntwala nde yandi kufwa, Yezu kusambaka nde: “Tata, ntangu yai pesa mono lukumu bonso yina ya mono  vandaka na yo ntete ntangu mono vandaka ti nge, pana ntoto vandaka me salama ntete ve.” (Yoane 17:5) Ee, Yezu kulombaka nde Nzambi kupesa yandi dyaka luzingu yina yandi vandaka na yo ti Yandi na zulu. Inki mutindu yandi zolaka kwenda kuzinga kuna?— Yo lombaka kaka nde Yehowa Nzambi kukumisa yandi dyaka muntu ya kimpeve, to wanzyo.

Ntangu yai, mu kezo yula nge ngyufula mosi ya mfunu. Keti bawanzyo yonso ke ya mbote? Inki nge keyindula?— Na nsungi mosi buna na ntangu ya ntama, bo yonso kuvandaka mbote. Bo vandaka mbote sambu Yehowa kusalaka bo mbote, mpi bima yonso ya yandi kesalaka kevandaka ya mbote. Kansi na nima, wanzyo mosi kukumaka ya mbi. Inki mutindu yo salamaka?

Sambu na kuzwa mvutu, beto fwe vutuka na ntangu yina Nzambi kusalaka bakala ti nkento ya ntete, Adami ti Eva. Bantu mingi ketubaka nde disolo ya bantu yai ke disolo mosi ya luvunu ya bantu bo mosi meyidikaka. Kansi Longi ya Nene kuzabaka nde yo vandaka disolo ya kyeleka.

Ntangu Nzambi kusalaka Adami ti Eva, yandi tulaka bo na kilanga mosi ya kitoko na kisika mosi ya bo vandaka kubinga Edeni. Yo vandaka parki to paladisu. Bo zolaka kuvanda ti bana mingi, dibuta mosi ya nene mpi kuzinga mvula na mvula na Paladisu. Kansi yo lombaka nde bo longuka dilongi mosi ya mfunu. Yo ke dilongi mosi ya beto metubilaka dezia. Beto tala kana beto keyibuka yo dyaka.

Yehowa kutubilaka Adami ti Eva nde bo le dya bambuma yonso ya bo mezola yina kuvandaka na banti ya kilanga yina. Kansi yo lombaka nde bo  dya ve bambuma ya nti mosi. Nzambi kutubilaka bo mambu yina zolaka kukumina bo kana bo dya yo. Yandi tubaka nde: “Nge ta fwa.” (Kuyantika 2:17) Kansi, yo lombaka nde Adami ti Eva kulonguka nki dilongi ya mfunu?—

Dilongi yango kuvandaka dilongi ya bulemfu. Ee, sambu na kuvanda na luzingu yo kelombaka kulemfuka na Yehowa Nzambi! Yo fwanaka ve nde Adami ti Eva kutuba kaka na munoko nde bo talemfukila yandi. Yo lombaka nde bo monisa bulemfu na bo na mambu ya bo vandaka kusala. Kana bo lemfukilaka Nzambi, bo zolaka kusonga nde bo vandaka kuzola yandi mpi bo vandaka kuzola nde yandi vanda Mfumu na bo. Kana bo salaka mpidina, bo zolaka kuzinga mvula na mvula na Paladisu. Kansi, kana bo dyaka mbuma ya nti yina, yo zolaka kusonga nde inki?—

Yo zolaka kusonga nde bo vandaka bantu mosi ya kuzabaka ve kupesa mersi na Nzambi sambu na bima yina ya yandi pesaka bo. Keti nge zolaka kulemfuka na Yehowa kana nge vandaka kuna?— Na luyantiku, Adami ti Eva vandaka kulemfuka. Kansi na nima, muntu mosi ya kulutaka bo na kiyeka kukusaka Eva. Yandi pusaka Eva na kukonda kulemfuka na Yehowa. Muntu yango kuvandaka nani?—

Biblia ketuba nde nyoka mosi kusolulaka ti Eva. Kansi nge mezaba nde nyoka ketubaka ve ata fyoti. Ebuna, inki  kusalaka nde yo tuba?— Wanzyo mosi kusalaka nde yo monana bonso nde nyoka vandaka kutuba. Kansi, na kuta masonga muntu vandaka kutuba kuvandaka wanzyo. Wanzyo yina yantikaka na kuyindula mambu ya mbi. Yandi zolaka nde Adami ti Eva kusambila yandi. Yandi zolaka nde bo sala mambu ya yandi vandaka kutuba. Yandi zolaka kubaka kisika ya Nzambi.

Yo yina wanzyo yina ya mbi kukotisaka bangindu ya mbi na mabanza ya Eva. Yandi tubilaka yandi na nsadisa ya nyoka nde: ‘Nzambi kutubilaka nge ve kyeleka. Kana nge dya mbuma ya nti yai, nge tafwa ve. Nge takuma mayele bonso Nzambi.’ Keti nge zolaka kundima mambu yina ndinga yai kutubaka?—

Eva yantikaka na kuzola kima yina Nzambi kupesaka yandi ve. Yandi dyaka mbuma ya nti yina bo buyisaka bo. Na nima, yandi pesaka yankaka na Adami. Adami kundimaka ve mambu yina nyoka kutubaka. Kansi mpusa na yandi ya kuvanda ti Eva kuvandaka ngolo mingi kuluta zola na yandi sambu na Nzambi. Yo yina yandi mpi kudyaka mbuma ya nti yina.—Kuyantika 3:1-6; 1 Timoteo 2:14.

Inki mambu yo natilaka bo?— Adami ti Eva kumaka bantu ya kukonda kukuka, bo nunaka, mpi bo fwaka. Ebuna, sambu bo kumaka bantu ya kukonda kukuka, bana na bo yonso mpi kukumaka bantu ya kukonda kukuka mpi nsukansuka bo  nunaka mpi bo fwaka. Nzambi kukusaka ve! Ya kyeleka, sambu na kuvanda na luzingu yo kelombaka kaka kulemfuka na Nzambi. (Roma 5:12) Biblia kezabisa beto nde wanzyo yina kukusaka Eva, bo kebingaka yandi Satana Dyabulu, mpi bawanzyo yankaka yina kukumaka bawanzio ya mbi, bo kebingaka bo bademo.—Yakobo 2:19; Kusonga 12:9.

Ntangu yai, keti nge mebakisa sambu na nki wanzyo mosi ya mbote ya Nzambi kusalaka kukumaka mbi?— Yandi kumaka mbi sambu yandi yantikaka kuyindula mambu ya mbi. Yandi vandaka na nzala ya kukuma Muntu ya Nene. Yandi zabaka nde Nzambi kusongaka Adami ti Eva na kubuta bana, mpi yandi zolaka nde bana yina yonso kusambila yandi. Dyabulu kezolaka nde bantu yonso kukonda bulemfu na Yehowa. Yo yina yandi kesosaka na kutula bangindu ya mbi na mabanza na beto.—Yakobo 1:13-15.

Dyabulu ketubaka nde ata muntu mosi ve kezolaka mpenza Yehowa. Yandi ketubaka nde nge ti munu, beto kezolaka ve Nzambi mpi nde beto kezolaka mpenza ve kusala mambu yina ya yandi ketubaka. Yandi ketubaka nde beto kelemfukaka na Yehowa kaka ntangu beto kemonaka nde mambu yonso kesalama mutindu ya beto kezolaka. Keti Dyabulu ketaka masonga? Keti beto kesalaka mutindu yina?

Longi ya Nene kutubaka nde Dyabulu kele muntu ya luvunu! Yezu kulemfukilaka Yehowa sambu na kumonisa mpenza nde yandi kezolaka Yandi. Nkutu Yezu kulemfukilaka ve Nzambi kaka na ntangu yo vandaka pete. Yandi vandaka kulemfuka ntangu yonso, ata na ntangu bantu yankaka vandaka kupesa yandi mpasi. Yandi kangamaka kaka na Yehowa, tii na lufwa. Yo yina Nzambi kuvutulaka yandi dyaka na luzingu sambu yandi zinga kimakulu.

Ebuna, nge tatuba nde nani ke mbeni na beto ya kuluta nene?— Mbeni na beto kele Satana Dyabulu. Keti nge le mona yandi?— Ata fyoti ve! Kansi beto mezaba nde yandi kele, mpi nde yandi ke ti kiyeka mpi ngolo mingi kuluta beto. Kansi, nani ke ti kiyeka kuluta Dyabulu?— Yehowa Nzambi meluta yandi. Yo yina beto mezaba nde Nzambi le tanina beto.

Tanga mambu ya metala Muntu yina beto fwe sambila: Kulonga 30:19, 20; Yozue 24:14, 15; Bingana 27:11; mpi Matayo 4:10.

[Kifwanisu ya kele na lutiti 47]

Mbala yankaka nki mambu Yozefi ti Maria kutubilaka Yezu?

[Kifwanisu ya kele na lutiti 48, 49]

Inki mutindu Adami ti Eva zolaka kuzinga mvula na mvula na Paladisu?

[Kifwanisu ya kele na lutiti 50]

Nani vandaka kusala nde nyoka kusolula ti Eva?

[Bifwanisu ya kele na lutiti 50]

Inki mambu kukuminaka Adami ti Eva na nima ya kukonda kulemfuka na Nzambi?